Read Yupik 2 Samuel 22 Bible Online

2 Samuel 22 - Yupik bible

2 Samuel 22

¹ATANREM aviutellrani David-aaq Saul-aamek allanek-llu ingluinek, David-aaq aturtuq mat'umek yuarutmek ATANERMUN.

²ATANEQ cayailkutkaqa; ellii pinilriaruuq capkutaqa.

³Agayutka cayailkutkaqa, elliini cam pingaitanga. Capkuciumalaraanga akngircailkutetun; akiurullua camun pivkarngaitanga. Anirturtekaqa; cayailkucirlua anirtularaanga callualrianek.

⁴Qayagaurtua ATANERMUN, elliin-llu aviutaanga inglumnek. Nanraumali ATANEQ!

⁵Tuqum qairin kassugutellruatnga; carvanrin piunririlriim naligaatnga;

⁶Aarnarqutiin tuqum kassugutaanga, qungum-llu negani civtaa wii piteklua.

⁷Arenqiallugutemni qayagaaqa ATANEQ, Qayagaurtua Agayutemnun ikayuusqellua. Agayuvigpamini niitaa erinaka; niitaa-llu qayagalqa ikayuusqellua.

⁸Tua-llu nuna qiivuq arulaluni-llu; tusnganri ellam uvaaluteng qiivut tua-i-wa Agayun qenercan!

⁹Puyuq an'uq qengagkenek, piunrircilria keneq ekualriit-llu qetget an'ut qanranek.

¹⁰Kilak allegluku ikirtaa atrarluni-llu, tungulria-wa amirluq it'gain acilirneratni.

¹¹Cukaluni tengluni ayagtuq yaqulgem ungungssimi qaingakun;[5] egilrallruuq yaqugkeni anuqem.

¹²Patuuq ellminek tan'germek; mamtulriit amirlut, muirumalriit mermek kassugutaat;

¹³kumalriit qetget ekuallagtut kalluum kenranek ciunrani.

¹⁴Tua-llu ATANEQ tem'irtuq kallugtun qilagmek, erinii Artuqailnguum Agayutem niitnauguq.

¹⁵Pitegcautni pitgautai eskavvluki-llu ingluni; kallugmek kenerpallagaluni ayakarcetai akvaqurluki.

¹⁶Imarpiim terr'a carriumauq, tusnganri-llu nunam patuirumaut ATANREM ingluni aarcirtullrani aarpagalluki-llu qenerrluni.

¹⁷ATANREM pakmaken yaggluni teguanga; nugtaanga et'ulrianek mernek.

¹⁸Aviutaanga pinilrianek inglumnek eq'ukestemnek-llu— taukut pininrussiyaagtut wangni.

¹⁹Arenqiallugingallemni, curugaatnga, tau͡gaam ATANREM murilkellruanga.

²⁰Ikayuraanga arenqiallugutmek anullua; anirturaanga ilukegcitekngamia.

²¹ATANREM nunulilaraanga ellualria atulaamku; atawaqercet'laraanga camek pinerrlugutailama.

²²Niisngallruaqa pisqutii ATANREM, avteksaitua Agayutemnek.

²³Maligtellruanka alerquutai tamalkuita; Narurteksaitanka elliin pisqutai.

²⁴Elliin nallunritaa picurlautaitelqa, wangnek murilkelqa assiitellriamek atuqsaunii.

²⁵Taumek elliin nunuliraanga assilria atulqa pitekluku, nallunrilamiu pinarqutailuciqa.

²⁶ATANEQ, piciuguten kinkunun imkunun piciulrianun elpenun, assirrlainarluten-llu kinkunun imkunun canganarqutailngurnun.

²⁷Menuituten kinkunun imkunun menuilngurnun, yugnikutaunak-llu yurrluulrianun.

²⁸Anirtularaten ellmikutuulriit, tau͡gaam atrartelaraten ucuryagtellriit.

²⁹Elpet, ATANEQ, tanqiutekamken; ayagcet'laran tan'geq wangnelnguq.

³⁰Pinimek cikirlua curugcet'laraten inglunka piyunarqucimek-llu cirlakutekamnek ingluliurutaitnun.

³¹Uum Agayutem—natlugneripagtat caliari, ukvernaqvagtat qaneryarai! Capkutatun ayuquq tamalkuitnun kinkunun yuartainun elliin aulukutiin.

³²ATANEQ kiimi Agayutnguuq; Agayun kiingan ingluliurucestekarput.

³³Una Agayun pinilria uqisvikaqa; picurlautaicet'laraa tumkaqa.

³⁴Tutmalqa elluarcetaa tuntutun; camun pivkaqsaitaanga ingrini.

³⁵Elitnaularaanga anguyallerkamun, wangnun aturyugngarivkarluku tukninqurraat urluvret.

³⁶ATANEQ, qaunqellua anirturavnga; ikayuutvet ucurnarivkaraanga.

³⁷Teguaruvkanritarpenga, paallakaqsaitua-llu.

³⁸Kingunrirturanka inglunka cirlakluki-llu; arulaiyuitua piunrirnatkamnun.

³⁹Iqutelaranka, makcesciiganateng-llu; ciuqamni cailkamtut cirlakumaluteng.

⁴⁰Pinimek cikiravnga anguyautellerkamun cirlakutmek-llu inglumnun.

⁴¹Inglunka qimagcet'laraten wangnek; piunrirtelaranka eq'ukestenka.

⁴²Kiartelartut ikayurtekameggnek, tau͡gaam kia anirtuqsaitai; qayagalartut ATANERMUN, tau͡gaam ellii kiuksaituq.

⁴³Passitanka, urr'atun-llu ayuqliriut; tutmautanka marayatun tumyarani.

⁴⁴Aviutelararpenga inglulitellrianek yumnek taqevkarpek'naku-llu atanirturilqa angayuqauvignek; yuut nallullrenka maa-i yuksagutanka.

⁴⁵Ilakumanrilnguut ciktaarvikaatnga; niicamegtenga, pisqutenka maligtait.

⁴⁶Caceskelli'irrluteng taigut qiivluteng cayailkutalegnek nunameggnek.

⁴⁷ATANEQ unguvauq! Nanrarluku ingluliurucesteka! Qanemcikluku angtatailucia pinilriim Agayutem anirturtem̄a!

⁴⁸Cirlakevkalarai inglunka; cirlakinrircet'larai angayuqauvillgutkelriit ataniuqenganka

⁴⁹anirturlua-llu inglukestemnek. ATANEQ, cirlakutmek cikirarpenga inglumnun akngircailkucirlua-llu nangcitalrianek angutnek.

⁵⁰Taumek nanraramken angayuqauvillgutkelriit akuliitni; Aturtua nanrautnek elpenun.

⁵¹Agayun cikiqengtuuq angtuanek cirlakutnek angayuqaminun; taqsuunani kenkutni maniuralaraa elliin cucukellminun, David-aamun kinguvrinun-llu akwarpak.