Read Yupik 2 Samuel 24 Bible Online

2 Samuel 24 - Yupik bible

2 Samuel 24

¹Cat iliitni ATANREM qenrutai Israel-aaq, David-aakun-llu arenqiallugutmun tekiucetai. ATANREM qanrutaa, “Ayagluten naaqsarturki yui Israel-aam Judah-m-llu.”

²Tua-i David-aam ellimerraa Joab-aq, anguyagtet angayuqrat: “Ayii atanerruaten malikluki tamalkuitnun ilakellriartainun Israel-aam nunam iquanek ayagluten akianun, naaqluki-llu yuut. Nallunricuganka qaillun amllertaciit.”

³Tau͡gaam Joab-am kiugaa angayuqaq, “Elpet Ucurnarqellriami, ATANREM-gguq kitak Agayutvet amllerivkaqiliki Israel-aam yui yuinaat talliman (100) cipervagluku watua amllertaciat, unguvainanerpeni-llu kitak tangerqiu tuaten pivkarluku. Tau͡gaam ciin Elpet Ucurnarqellriami waten piyugcit?”

⁴Tau͡gaam angayuqam Joab-amun atanerruarinun-llu picirkiutni maligtaquvkaraa; unilluku tua-i ayagluteng naaqsarturait Israel-aam yui.

⁵Jordan-aaq qerarluku qavartartut ungalalirnerani Aroer-aam, nunarpak tauna qukaani kuignayuum, nunautiini Gad-am. Tuaken ayagtut negetmun Jazer-aamun,

⁶kiturluteng Gilead-aamun Kadesh-aamun-llu, Hittite-at nunautiitnun. Tua-i-llu ayagluteng Dan-amun, Dan-amek-llu ayagluteng calaratmun Sidon-aamun.

⁷Tua-i-llu ayagluteng ungalatmun cayailkut'legmun nunarpiinun Tyre-am, tamalkuitnun-llu nunarpainun Hivite-at Canaan-aarmiut-llu, tua-i-llu nangnermek Beersheba-mun, ungalalirnerani Judah-m.

⁸Tua-i iralut qulngunritaraat kinguatni erenret-llu yuinaat utertut Jerusalem-aamun, ayagamarra'arluteng nunarpak tamana qaqilluku.

⁹Qanrutkaat angayuqamun amllertaciata naaqutiit angutet anguyagten͞guyugngalriit: tiissitsaam avga yuinarnek akimiarnek cipluku (800,000) Israel-aami tiissitsaam-wa avga (500,000) Judah-mi.

¹⁰Tau͡gaam kinguani David-aam igaucillmi yugnek, umyuarniunguq, qanertuq-llu ATANERMUN, “Assiilngirtua assiitellriamek cakneq waten pillemkun! Au͡g'ariteqernga. Umyugailngurtun waten pillruunga.”

¹¹ATANEQ qanertuq Gad-amun, David-aam prophet-aaranun, “Ayagluten qanrucarturru David-aaq pingayunek piarkainek cucukelciiqatarniluku. Elliin cucukellra wii piciqaqa.”

¹³Gad-aq ullagaa, qanrulluku-llu ATANREM qanellrinek, apluku-llu, “Naliat piqatarta? Pingayun allrakut piitnallerkaat nunavni wall'u-qaa pingayun iralut qimagaurallerkan inglukestevnek wall'u erenret pingayun cangerlallerkaat nunavni? Kitaki umyuangcausgu, qanrullua-llu camek kiutevnek ut'rutarkamnek ATANERMUN.”

¹⁴David-aaq kiuguq, “Wiinga ciunerkairutellriatun ayuqua! Tau͡gaam anucimirqecetaaresqumanritua yugteggun. Elliin tau͡gaam ATANREM anucimirqecetaarlikut, tua-i-wa ellii naklegtalriaruan.”

¹⁵Tua-i ATANEQ taivkariuq cangerlagmek Israel-aamun, ayagnirluni tuani unuakumi elliin taqlerkiuraa tekilluku. Nuniit iquanek ayagnirluni akia tekilluku allat yuinaat pingayun qulmek cipluku tiissitsaat (70,000) Israel-aam yui tuquagut.

¹⁶ATANREM an'gilaan unatni yaggluku piunriqatartelluku Jerusalem-aaq, ATANREM umyuani cimiraa anucimirqecetaaqatallerminek yuut qanerluni-llu an'gilamun tuquteqatartiitnun, “Arulaira! Amllerriuq!” An'gilaq uitaluni kepliariviani Araunah-m, Jebusite-am.

¹⁷David-aam tangrraa an'gilaq tuquteqatartiit yuut, qanerluni-llu ATANERMUN, “Wiinga pinarqelriaruunga. Wiinga picurlallruunga. Camek uku'urluut yuut pillruat? Wiinga nakmiin-llu ilanka anucimirqecetaarkut.”

¹⁸Tuani ernermi Gad-am ullagaa David-aaq elliinun-llu qanerluni, “Ayagluten Araunah-m kepliarvianun ekuavigmek nauciyartua ATANERMUN.”

¹⁹David-aam niitaa ATANREM ellimerrutii ayagluni-llu Gad-am pisquciatun.

²⁰Araunah acitmun kiartuq tangerrluku-llu angayuqaq atanerruani-llu agiirtellriit. Cikluni nunamun palurtuq ciuqerranun David-aam

²¹apluni-llu, “Elpet Ucurnarqellriami, ciin maavet taisit?” David-aaq kiuguq, “Kipucarturqa kepliarviin naucinalua ekuavigmek ATANREM pikaanek, arulaircetevkarnaluku cangerlak.”

²²“Kiiki teguu, Elpet Ucurnarqellriami,” Araunah qanertuq, “elliiluten-llu ATANERMUN camek piyullerpenek. Wani-wa-tang kuluviit angucalut ekualuki elliitekaten ekuavigmi; wani-wa-llu qugcuutait kepliarcuutet-llu murait muragkaten.”

²³Araunah-m tamalkuita tunai angayuqamun qanrulluku-llu, “ATANREM Agayutvet ciuniuqiliu elliiten.”

²⁴Tau͡gaam angayuqam kiugaa, “Qang'a, akilirciqamken. Elliingaitua ATANERMUN Agayutemnun elliitnek wiinga akiinaki tegullemnek.” Kiputaa-llu kepliarvik kuluviit-llu angucalut yuinaak malruk qulmek cipluku (50) qerrirlinek.

²⁵Tua-i-llu nauciluni ekuavigmek ATANERMUN elliiluni-llu ekuagarkanek elliitnek ilakuyutem-llu piinek elliitnek. ATANREM-llu kiugaa piicautii, cangerlak-llu Israel-aami arulairtuq.