Read Yupik 2 Samuel 3 Bible Online

2 Samuel 3 - Yupik bible

2 Samuel 3

¹Callugturallrat ukut inglukellriit anausngastain Saul-aam nakmiin ilai, anausngastain-llu David-aam ak'anun pimallrulliniuq. David-aam piniriinallra maliggluku, inglukestai piniarusngiinallruut.

²Ukut arvinelgen qetunrai, tungliqutacirmegcetun yuurtellermeggni, yuurtellruut David-aamun Hebron-aami: Amnon-aaq, aanaluni Ahinoam-aamek, Jezreel-armiumek;

³Chileab-aaq, aanaluni Abigail-amek, Nabal-am aipainranek, Carmel-aarmiunek; Absalom-aaq-llu, aanaluni Maacah-mek, panianek Angayuqam Talmai-am Gesher-aarmium;

⁴Adonijah-q, aanaluni Haggith-aamek; Shephatiah-q aanaluni Abital-aamek;

⁵Ithream-aq-llu, aanaluni Eglah-mek. Tamarmeng ukut qetunrai yuurtellruut Hebron-aami.

⁶Callugturallrat taqeksaunani ayagturallrani David-aam Saul-aam-llu nakmiin ilain anguyagtain, Abner-aaq piniriinartuq Saul-aam maligcestaini.

⁷Erenret iliitni Ishbosheth-aam Saul-aam qetunraan Abner-aaq piciliraa tut'ellruniluku Saul-aam nulirruara Rizpah, pania Aiah-m.

⁸Mat'umek piterluni Abner-aaq cakneq qenertuq. “Umyuartequten-qaa nalluani piciunritlemkun Saul-aaq akngirrnayukluku? Ilumun-qaa umyuartequten kevgiuryukluku Judah?” ellii qanlertuq. “Piqarraamek ayaglua piciullruunga atavnun Saul-aamun tusngalrianun, anelgutainun, yugnikek'ngainun-llu, cirlakevkanrilkurcetellruamken-llu David-aamun; tau͡gken ernerpak picurlautmek nataqututen wangni arnamek picirluten!

⁹ATANREM akqaa David-aaq angayuqauvik Saul-aamek kinguvrinek-llu teguciqniluku David-aamun-llu ataniurceciiqnilukek tamarkegenka Israel-aaq Judah-llu, nuniita iquanek ayagluku iquanun. Waniwa Agayutem kaugturlua tuquskilia man'a piciurcetenrilkumku!”

¹¹Ishbosheth-aaq-llu cakneq alingami Abner-aamek camek qanerciigatuq.

¹²Abner-aaq qanerten̄ek ayagceciuq David-aamun, taum nalliini Hebron-aamelngurmun, qanresqelluki, “Kia man'a nuna atanirtuqatartau? Akqutmek taquten pillguteklua, ikayurniamken pikliutelluku Israel-aaq elpenun.”

¹³“Assirpaa!” David-aaq kiuguq. “Akqutmek taquciiqua elpenun ataucimek tau͡gaam piterlua: taitnarqan Saul-aam pania Michal-aaq wangnun taikuvet tangerrsarturlua.”

¹⁴David-aaq-llu ayagceciuq qaneryartulrianek Ishbosheth-aamun qanresqelluki, “Wangnun nulirqa utercessgu Michal-aaq. Akilitellruaqa yuinarnek tallimanek (100) Philistine-at nuugillrita amiitnek nuliqsagutnaluku.”

¹⁵Tua-i Ishbosheth-aam teguvkaraa uinganek Paltiel-aamek qetunraanek Laish-aam.

¹⁶Paltiel-aam-llu maligtaa tekilluku Bahurim-aaq, qiagurluni ayagtu'rluni. Tau͡gaam Abner-aaq qanellrani, “Uterten,” tuaten pillruuq.

¹⁷Abner-aam ullagluki ciuliqagtai Israel-aam qanrutellrui, “Ak'anun David-aaq angayuqaqsuumallruarci.

¹⁸Wani-wa una pillerkarci. Neq'akiciu waten ATANREM qanellra, ‘Aturluku kevgaqa David-aaq yuunka anirturciqanka Israel-aat Philistine-anek allanek-llu tamalkuitnek inglukestaitnek.’”

¹⁹Abner-aam cali qanrutai yuullgutkelriartai Benjamin-aam ayagluni-llu Hebron-aamun qanrucarturluku David-aaq qaillun Benjamin-aam Israel-aam-llu yui umyuallguteksagulluteng picirkillratnek.

²⁰Abner-aaq tekican David-aamun Hebron-aami yuinarnek (20) angutnek maligluni, David-aam kalukautellrui.

²¹Abner-aam David-aaq qanrutaa, “Ayaglua wani-wa pikliucartuqatarqa tamalkuan Israel-aaq Elpenun Takarnarqellriamun. Ciuniurciqaatgen angayuqauluten, piksullren-llu piksaguciiqan atanirturluku-llu nuna tamalkuan.” David-aam tua-i Abner-aaq akqaa cayailkuciumaciqniluku ayagtelluku-llu.

²²Tamatum kinguani Joab-aq allat-llu David-aam anguyagtain atanirturtait tekitut uayaryallermeggnek, tekiulluteng amllernek tegukengameggnek. Abner-aaq, tau͡gaam, Hebron-aami tamaantenrirluni David-aami, David-aam ayagcetellruaku akeqluku cayailkuciumaciqniluku.

²³Joab-aq anguyagten̄i-llu tekicata, qanrutaat Abner-aaq taillruniluku angayuqamun David-aamun ayagcecimallruniluku-llu akeqluku cayailkuciumaciqniluku.

²⁴Tua-i Joab-am ullagluku angayuqaq qanrutaa, “Camek taqutellrusit? Abner-aam ullallruaten—ciin tuaten ayagceciu?

²⁵Taillruuq iqlunaluten nallunrirnaluku-llu calallren tamalkuan natmun-llu ayallren tamalkuan. Ilumun tamana nallunritan!”

²⁶David-aaq unicamiu, Joab-aq ayagceciuq qanerten̄ek aqvavkarluku Abner-aaq, ut'rutaat-llu Sirah-m Elakaanek; tau͡gaam man'a nallullrua David-aam.

²⁷Abner-aaq tekican Hebron-aamun, Joab-am kiingan agutaa ikirtuqamun, kiingan qalarutqatarnganaku, tuani-llu kapaa aqsiigken'gun. Tua-i Abner-aaq tuqutauguq elliin tuqutellruaku Joab-am anelgutii Asahel-aaq.

²⁸David-aam niitellerminiu qanemciq, qanertuq, “ATANREM nallunritaa wiinga ukut-llu yuunka pinerrlugutaitqapiartukut tuqutaullran Abner-aam tungiinun.

²⁹Taum anucimirqecetaarutii tusngakili Joab-amun tamalkuitnun-llu nakmiin ilainun! Kinguvaqili ilakellriarini angutnek ciissingqerturluteng akuramegteggun, wall'u pellernarqellriamek ciissirluni qaimikun, wall'u arnartarnek tau͡gaam calitulimek, wall'u tuqutauluni anguyagmi, wall'u-qaa neqkaitu'rturluni.”

³⁰Tua-i tuaten Joab-aq anelgutni-llu Abishai-aq akinaurtuk Abner-aamun tuqutellra amaqlirmek anguyagmi Gibeon-aami pitekluku.

³¹Tua-i-llu David-aam ellimerturaa Joab-aq yui-llu aturait allguusqelluki, missuullernek atuusqelluki, angniilutekluku-llu Abner-aaq. Tungmagcillratni-llu Angayuqaq David-aaq, ellii, qunguk tunuagnegun piyuallruuq.

³²Abner-aaq tungmagcimallruuq Hebron-aami, angayuqaq-llu qastuluni qiallruuq qungumi, tamarmeng-llu yuut.

³³David-aaq atullruuq mat'umek angniilutmek Abner-aamun: “Ciin-kiq Abner-aaq tuqua usvitunrilngurtun?

³⁴Unatai qillengqavkenateng, It'gai-llu qillrutaunateng; Tuquuq tuqucimalriatun picurlaumalriatgun.” Yuut-llu qiatekenqigtaat.

³⁵Ernerpak yuut David-aaq camek neresquryaaqaat, tau͡gaam piciuluni akqiuq, “Agayutem igtellua tuquskilia camek nerkuma erneq iquklipailgan!”

³⁶Mat'um-llu umyugaat nall'artaa ilukegcitkaat-llu. Tangerrluku, cat tamarmeng angayuqam callrin ilukegcivkarai yuut.

³⁷Tamarmeng David-aam yuin Israel-aam-llu yuin taringumaat angayuqam ilagautenritellra tuqutaullranun Abner-aam.

³⁸Angayuqam qanrutai atanerruani, “Taringenritaci-qaa mat'umi ernermi angtuaq ciuliqagta tuqucianek Israel-aami?

³⁹Wiinga angayuqaunge'rma cucukumalua Agayutmek, ernerpak piniatuq ayuquciqa. Ukut Zeruiah-m qetunrai callugyunqessiyaagtut wangni. ATANREM anucimirqecetaaqiliki ukut picurlautellget pinarqutiit tangerrluku!”