Read Yupik 2 Samuel 4 Bible Online

2 Samuel 4 - Yupik bible

2 Samuel 4

¹Saul-aam qetunraan Ishbosheth-aam niitellerminiu Abner-aaq tuqucimaniluku Hebron-aami, alinguq, tamarmeng-llu yui Israel-aam alingenga'artut.

²Ishbosheth-aaq malrugnek atanerruangqertuq ciuliqagten͞gulriignek uayaaristen̄un, Baanah-nkuk Rechab-aq-llu, qetunraak Rimmon-aam, Beeroth-aarmiuk yuullgutkelriartaini Benjamin-aam. (Beeroth-aaq naaqutnguuq ilakluku Benjamin-aam.

³Nakmiin yui qimagaullruluteng Gittaim-amun, tuakenirnek-llu tuantauraraqluteng.)

⁴Alla kinguvra Saul-aam Jonathan-aam qetunraqellrua Mephibosheth-aaq, tallimanek allrakungqelleq Saul-aankuk Jonathan-aaq-llu tuqucimallragni. Qanemciq tekican tuqullragnek nunarpiinek Jezreel-am, aulukestiin kevkarluku qimallruuk; tau͡gaam cukangnaqsiyaallermini igcetaa, tussitelanguq-llu.

⁵Rechab-ankuk Baanah-llu ayagtuk Ishbosheth-aam eniinun tekillutek-llu tuavet erenrem qukallran nuniini qavaqaciinanrani.

⁶Arnaq amiigmi uitalria qavarningllermini qavaqallruluni mukaarkamek carririinanermini, tua-i Rechab-ankunun Baanah-llu itqata'arlutek itertuk.

⁷Itrumariamek, Ishbosheth-aam inarrvianun itertuk, tuani qavaryugluni qavarluni, tuqutaak-llu. Qamiqurra-llu kepaak, malikluku-llu ayagtuk, unugpak-llu piyualutek kuignayugkun Jordan Valley-kun.

⁸Tunaak-llu qamiquq atanermun David-aamun Hebron-aami qanrulluku-llu, “Wani-wa qamiqua Ishbosheth-aam, qetunraan ingluvet Saul-aam, tuqutessaagcetlerpet. Ernerpak ATANREM, elpet quyilriami, akinaurutmek cikiraten Saul-aamun kinguvrinun-llu.”

⁹David-aam kiugak, “Akqiunga unguvalriakun ATANERKUN, aviucestellemnun tamalkuitnek aarnarqellrianek!

¹⁰Qanertem tailuni Ziklag-ami qanrucestellma Saul-aam yuunrillranek umyuarteqsaaqellruuq qanemcikegtaarmek taicuklua. Wii teguluku tuqutevkallruaqa. Tuaten qanemcikegtaarii nunulillruaqa!

¹¹Taumi arcaqanruqatarpagta yurrluut tuqucilriit pinarqutailngurmek angutmek qavalriamek elliin nakmiin eniini! Wani-wa wiinga akinauqataramtek tuqutellerpetegnek tauna, nunam-llu qainganek perrirlutek au͡g'arlutek!”

¹²David-aam pisqutni qanrutkaa, anguyagtain-llu tuqutagket Rechab-ankuk Baanah-llu, kepluki-llu unatekek it'gakek-llu, agarrluki-llu nuniinun nanvarraraam Hebron-aami. Teguat-llu Ishbosheth-aam qamiqurra elaulluku-llu Abner-aam qunguanun Hebron-aami.