Read Yupik 2 Samuel 6 Bible Online

2 Samuel 6 - Yupik bible

2 Samuel 6

¹Pulenglluni David-aam quyurcetai assinqurrait anguyagtet Israel-aami, quyurrluteng tiissitsaat yuinaat qulmek cipluku (30,000) anguyagtet,

²ciuliqaggluki-llu Baalah-mun Judah-melngurmun, tuaken iluvautnaluku Agayutem Akqutiin Yaassiiga, ATANREM Artuqailnguum atranek igalek, elliin aqumllera atanruvik uitauq quliitni yaqungqellriit ungungssit.[2]

³Teguat Abinadab-am eniinek qemim qainganelngurmek ekluku-llu nutaramun ikamracuarmun. Uzzah-nkuk Ahio-llu, Abinadab-am qetunraagken, nayumiqaluku ikamracuar,

⁴Ahio-q ciunrakun piyualuni.

⁵David-aaq pinrilqurrunateng-llu Israel-aam yui yurarluteng aturluteng-llu pitacirmegcetun qigcignarisqelluku ATANEQ. Aturcetaarluteng-llu qelutelegteggun harp-atgun, lyre-atgun, cauyatgun, kallagcetaatgun, cymbal-aatgun-llu.

⁶Tekiteqerluteng mukaarkanek quyurcivianun Nacon-aam, kuluvak paallacalkartuq, Uzzah-m-llu yagqualuni Akqutem Yaassiiga teguleraa.

⁷Egmian-llu ATANREM Agayutem eq'uqrutaa Uzzah tuqulluku-llu qigcikinritellra pitekluku. Uzzah tuani tuquuq Yaassiigem Akqutem caniani,

⁸taumek tauna nuna aterpagtelaraat Perez Uzzah-mek[3] David-aaq-llu cakneq qenertuq ATANREM eq'uqerrluni anucimirqecetaarillra Uzzah-mek pitekluku.

⁹Tua-llu David-aaq alinguq ATANERMEK qanerluni-llu, “Qaillun-mi wani-wa ayauteqatarcia Akqutem Yaassiiga malikluku?”

¹⁰Tua-i umyuartequq malikenritnaluku Jerusalem-aamun; tau͡gaam, tumyaramek caqirrluni ullautaa Obed Edom-aam eniinun, nutem yuuguralriamun nunarpiini Gath-am.

¹¹Tuantuq-llu iraluni pingayuni, ATANREM-llu atawaqercetaa Obed Edom-aaq nakmiin-llu ilai.

¹²Angayuqaq David-aaq niituq Akqutem Yaassiiga pitekluku ATANERMUN atawaqercetniluki Obed Edom-aam nakmiin ilai cautai-llu tamalkuita; taumek tegua Akqutem Yaassiiga Obed-aam eniinek ayaulluku-llu Jerusalem-aamun angnirpagluni.

¹³Angutet taukut ayaucestai arvinlegnek amlliqanratgun, David-aam arulaircetai elliiviklermini ATANEQ ekuagarkamek angucalumek kuluvagmek uqungcaumalriamek-llu kuluvayagarmek.

¹⁴David-aaq, aturarluni kiingan ungungssit melqurritnek pilimalriamek 'lumarrarmek qukamikun, yurartuq pitacirmitun qigcignarivkarnaluku ATANEQ.

¹⁵Elliin-llu tamarmeng-llu Israel-aam yuin ayautaat Akqutem Yaassiiga mayuulluku Jerusalem-aamun angnirluteng qayagpagaluteng cupu'uryarat-llu qalrialuteng.

¹⁶Yaassiik itrusnginanratgu nunarpagmun, Michal-aaq, Saul-aam pania, egalerkun qinerrluni tangrraa Angayuqaq David-aaq yurarluni qecgaurluni tuaten ATANREM ciuqerrani, elliin-llu umyualngukaa.

¹⁷Taitaat Yaassiik nekaanun-llu elliluku Pelatekamun David-aam nekiullranun. Nutaan-llu elliiluni ekuagarkanek ilakuyutem-llu elliitiinek ATANERMUN.

¹⁸Taqngami elliinermek ekuagarkanek, yuut atawaqercetai atrakun ATANREM Artuqailnguum

¹⁹aruqluki-llu tamalkuita neqnek. Cikirai tamalkuita angutet arnat-llu Israel-aami kelipamek tamalkumek, kemegmek kelipimalriamek, issuumayagarnek-llu. Tua-i-llu tamarmeng kingunermeggnun uterrluteng.

²⁰Wanikuan, David-aaq utertellrani ilani aryuqsarturluki, Michal-aam anluni paiqeraa. Qanertuq, “Angayuqrata Israel-aat at'mi angucia nallunriqanircetaa ernerpak! Maniluku ellminek umyuarkilucini tangvallratni arnat kevgiurtet anguyagtaini!”

²¹David-aaq kiuguq, “Yurallruunga qigcikluku ATANEQ, cucukestelqa aatan, nakmiin-llu ilai pivkenaki, ciuliqagten͞gurcesqellua yum'inun Israel-aanun. Yurarturciqua-llu qigcikluku ATANEQ,

²²takarnairutevsiarlua wangnek. Elpet umyuartequteng'e'rpenga cauvkenii elpeni, tau͡gaam taukut arnat carpaulua umyuartequciiqaatnga!”

²³Michal-aaq, Saul-aam pania, irniangeqaqsaituq.