Read Yupik 2 Samuel 7 Bible Online

2 Samuel 7 - Yupik bible

2 Samuel 7

¹Angayuqaq David-aaq elkartuq atanruvimini, ATANREM-llu arenqiallugutmun pivkanritaa tamalkuitnek inglukestainek.

²Tua-llu angayuqaq qanertuq prophet-aamun Nathan-aamun, “Tang wiinga uitalrianga enemi piliaqumalriami cedar-aanek napanek, tau͡gken Agayutem Akqutiin Yaassiiga pelatekami uitaaqluni!”

³Nathan-aaq-llu kiuguq, “Ca imna umyuarteqellren aturru, tua-i-wa ATANREM nayuaten.”

⁴Tau͡gaam taumi unugmi ATANEQ qanertuq Nathan-aamun,

⁵“Ayagluten qanrucarturru kevgaqa David-aaq waten qanernilua elliinun, ‘Elpengunrituq piliaqestekaa agayuvigpiim uitavigkama.

⁶Aviuqaanemnek ayaglua Israel-aam yui Egypt-aamek man'a tekilluku, agayuvigpagmi uitaqaqsaitua; ayagaurallruunga pelatekami uitaurlua.

⁷Tamiin ayagaurallemni yui Israel-aam malikluki iliit ciuliqagtet cucukellma apteqaqsaitaqa ciin piliksailucimnek agayuvigpagmek cedar-aanek pilimalriamek.’

⁸“Taumek qanrusgu kevgaqa David-aaq Wiinga-gguq, ATANERMI Artuqailngurmi, qanertua elliinun, ‘Wiinga tegullruamken qaunqillerpenek qusnginek marami atanirturten͞gurrluten-llu yumnun Israel-aanun.

⁹Pillgucillruamken natmun ayallren tamiin, cirlakluki-llu inglukesteten tamalkuita curullerpeni. Ucurnariciqamken angelriatun ciuliqagtaitun ellarpiim.

¹⁰Cucuklillruunga uitavigkaatnek yum'a Israel-aat tuavet-llu elkartellruluki, yuusqelluki nangteqenrirluki. Maavet nunamun itraanermeggnek, curuumalartut aarilngurnek yugnek, tau͡gaam man'a atuumanqiggngaituq. Akqamken qaillun pivkarngaunak tamalkuitnun inglukestevnun kinguverkavnek-llu cikirarkauluten.

¹²Yuunriquvet tungmagcimaluten-llu ciuliavnun ilaulluten, qetunrarpet iliit angayuqrurciiqaqa angayuqauvia-llu pinircetarkauluku.

¹³Ellii taunguciquq naucestekaa agayuvigpagkama, pengegnairciqaqa-llu elliinun kinguvalria atanirturten͞guurallerkaat ilakellriit piugurararkauluku akwarpak.

¹⁴Wiinga atakeciqaanga ellii-llu qetunraqciqaqa. Picurlakan, anucimirqecetaarciqaqa ataulriim anucimirqecetaarilaucianek qetunraminek.

¹⁵Tau͡gaam taqngaitaqa nayumiqanermek Saul-aaq taqellrucimtun, au͡g'alqa elpet atanrurcesqelluten.

¹⁶Kinguvengqerrlainarciquten, angayuqauviin-llu akwarpak piuvkarciqaqa. Atanirturten͞guurallerkarci-llu ilakellriani iquklisngaituq.’”

¹⁷Nathan-aam-llu qanrutaa David-aaq tamalkuitnek Agayutem nasvallrinek ellminun.

¹⁸Tua-llu Angayuqaq David-aaq itertuq Pelatekaanun ATANREM uitallran, aqumluni-llu piicagtuq, “Nutem Piulriami ATANERMI, wiinga tunriukutnarqua canek ak'a pillerpenek wangnun, nakmiin-llu ilamnun.

¹⁹Tau͡gken-am cali wani-wa tamakut ilaaten, Nutem Piulriami ATANERMI, akqutnek taqulluten kinguverkamnun allrakuni tekitarkani. Yugmun-llu man'a tangercetan, Nutem Piulriami ATANERMI!

²⁰Camek cali elpenun qanerciqsia! Wiinga elpet nallunritarpenga, kevgavni.

²¹Elpet pisqutkellruan caliarkaqluku-llu waten piarkaullren; makunek angtuanek taqutellruuten wiinga alerquanalua.

²²Elpet angtatailnguuvagcit, Nutem Piulriami ATANERMI! Elpetun ayuqelriartaituq; ak'a nallunrillruaput elpet kiivet Agayutngucin.

²³Allamek waten angayuqauvillgutkelriartaituq nunami Israel-aatun, anirtullerpenek teguarullratnek elpet nakmiin yuksagutnaluki. Ucurnarqellriit nanrarnarqellriit-llu caliaqellerpet ellaitnun sagtaat ucurnarqucin ella iluarrluku. Antaten allat angayuqauvillgutkelriit agayutait-llu yut'en tekicartullratni, yuut petuilten Egypt-aamek nakmiin piknaluki.

²⁴Israel-aaq nakmiin yuksagutan akwarpak, elpet-llu, ATANEQ, Agayuteksagutaatgen.

²⁵“Tua-llu wani-wa, ATANEQ Agayun, piciuresgu tekitarkami akqutellren wangnun kinguverkamnun-llu, caliaqluku-llu piciqliallren.

²⁶Ucurnarqucin angtuaruciquq, akwarpak-llu yuut qanerciqut, ‘ATANEQ Artuqailnguq Agayutnguuq Israel-aami.’ Cangarivkarngaitan-llu atanirturten͞guurallerkarput ilakellriani imumirpak.

²⁷ATANEQ Artuqailnguq, Agayutiini Israel-aam! Nalirrugutaunii piicagyugngaunga uumek piicautmek elpenun, manillruavgu man'a tamalkuan wangnun, kevgavnun, qanrullua-llu kinguvrenka angayuqaurciiqniluki.

²⁸“Tua-llu wani-wa, Nutem Piulriami ATANERMI, Agayutnguuten; akquteten aturturalaraten, mat'umek-llu angnirnarqellriamek akqavnga.

²⁹Apelciramken atawaqaasqelluki kinguvrenka taqeksaunateng quyakurniaraat naklekuten. Elpet, Nutem Piulriami ATANERMI, akqutkellruan man'a, atawaqauten-llu tusngaurciquq kinguvemnun akwarpak.”