Read Yupik 2 Samuel 9 Bible Online

2 Samuel 9 - Yupik bible

2 Samuel 9

¹David-aaq erenret iliitni paqnayugluni aptuq, “Kitumek-qaa tua-i Saul-aam nakmiin ilaini uitalriartaituq? Pitangqerqan, nakleksugyaaqaqa Jonathan-aaq pitekluku.”

²Pistetangqellruuq Saul-aam nakmiin ilakluku aterluni Ziba-mek, qanrucimauq-llu David-aaq ullaasqelluku. Angayuqam-llu aptaa, “Ziba-uguten-qaa?” “Wani-wa kevgiuryukaarluten,” ellii kiuguq.

³Angayuqam aptaa, “Pitairutuq-qaa Saul-aam nakmiin ilainek ellaitnun takaqutmek naklekutmek-llu piarkamnun, Agayun akqellrucimtun tuaten piciqnilua?” Ziba kiuguq, “Ataucimek cali pitangqertuq Jonathan-aam qetunraini. Tauna piyuayuunani.”

⁴“Nanta?” Angayuqaq aptuq. “Eniini Machir-aam Ammiel-aam qetunraan Lodebar-ami,” Ziba kiuguq.

⁵Tua-i Angayuqam David-aam aqvavkaraa.

⁶Mephibosheth-aaq-llu, qetunraa Jonathan-aam tutgarii Saul-aam, tekicami, ciktuq ciuqerranun David-aam qigcikutni maniluku. David-aaq qanertuq, “Mephibosheth-aaq,” Kiuguq-llu, “Wani-wa kevgiuryuumaluten.”

⁷“Alingenrilu,” David-aaq qanertuq. “Naklekciqamken aatan Jonathan-aaq pitekluku. Uterceciiqaqa elpenun nuna tamalkuan apa'urlurpet Saul-aam piutellra, estuulumni-llu ciuniurumarrlainarciquten.”

⁸Mephibosheth-aaq ciktenqiggluni qanertuq, “Wiinga cangallrunritua tuqumalriami qimugtem̄i, elpeni takarnarqellriami! Ciin waten assirlua piqatarcia?”

⁹Angayuqam-llu qayagauraa Ziba, Saul-aam kevgaa, qanerluni-llu, “Cikiqataarqa Mephibosheth-aaq, atanerruarpet tutgarii, tamalkuitnek Saul-aam nakmiin-llu ilain piinek.

¹⁰Elpet, qetunravet, pistevet-llu naucirivikciqaat nuna atanerruarpet Saul-aam nakmiin-llu ilai pitekluki quyurciluten-llu, neqkangqercetarkauluki ellait. Tau͡gaam Mephibosheth-aaq ellii ilaurrlainarciquq estuulumni.” (Ziba qetunrarluni akimiarnek yuinarnek-llu (20) pisterluni.)

¹¹Ziba kiuguq, “Ca tamalkuan caliaqeciqaqa Elpet Takarnarqellriami pisqellren.” Tua-i Mephibosheth-aaq nerlartuq angayuqam estuuluani, angayuqam qetunrai ilalirluki.

¹²Mephibosheth-aaq qetunracuarangqertuq Mica-mek aterluni. Tamarmeng uitalriit Ziba-m nakmiin ilaini pisten͞gurtut Mephibosheth-aamun.

¹³Tua-i Mephibosheth-aaq, piyuasciigalnguq inglugtun it'gagmikun, Jerusalem-aarmiungurtuq, ner'aqluni neryarat tamaitni angayuqam estuuluani.