Read Yupik 1 Kings 11 Bible Online

1 Kings 11 - Yupik bible

1 Kings 11

¹Solomon-aaq kenkilartuq amllernek yaaqvarmiunek arnanek. Avatiikun panian atanrem Egypt-aamek nuliqsagutellmi Hittite-amek arnanek cali nulirturtuq, arnanek-llu Moab-armiunek, Ammon-aamek, Edom-aamek, Sidon-aamek-llu.

²Nuliqsagutellrui alerqullrungraaki ATANREM Israel-aat nulirtuqsailengraata tamakunek pilaasqelluki, tua-i-wa tamakut agayutmeggnun tuigtengevkarciqngatki, allanun agayutnun.

³Solomon-aaq nulirtullruuq tiissitsaam avga, yuinarnek qulnek cipluku (700) uilingiatanek cali-llu yuinarnek akimiarnek (300) nuliaruangqerrluni. Tamakut tuigtevkaraat Agayutmek.

⁴Ak'allaurtengluku-llu ciktaaryaurcetaat agayutnguanun. Piciunrirluni elliin ATANERMINUN Agayutminun, atamitun David-aatun pivkenani.

⁵Ciktaarvik'langaa Astarte, agayutnguara Sidon-aam, Milcom-aam-llu, uuminarqellria-llu agayutii Ammon-aam.

⁶Assiilngirtuq ATANERMUN piciuvkenani-llu atamitun David-aatun.

⁷Ingrimi calaralirnerani Jerusalem-aam piliuq agayularvigkamek Chemosh-aamun, uuminarqellriamun agayutiinun Moab-am, piicalarvigkaminek-llu Milcom-aamun, uuminarqellriamun agayutiinun Ammon-aam.

⁸Allanek-llu agayularvigkiurtuq tamarmeng nuliami ilakumanrilnguut ekuagiluteng aruviarluteng, elliivigkaitnek ellaita nakmiin agayutmeggnun.

⁹ATANREM qenrutaa Solomon-aaq, tua-i-wa ircaqrua tuigcan ATANERMEK Agayutiitnek Israel-aat, tauna alailleq elliinun malrurqugnek.

¹⁰Elliin inerqullrungraani Solomon-aaq maligtaqusqevkenaki allat agayutet, Solomon-aam atunritaa ATANREM alerquutii.

¹¹Elliinun-llu qanerluni, “Tua-i-wa elpet pitsaqutmek akquten wangnun navgavgu narurrluki-llu alerquutenka, akqiunga teguciqniluku angayuqauviin elpenek tunluku-llu iliitnun atanerruarpet.

¹²Tau͡gaam aatan David-aaq pitekluku man'a pingaitaqa unguvallerpeni. Tau͡gaam qetunrarpet atanirturillran nalliini.

¹³Tamalkuan angayuqauvik elliinek tegungaitaqa; tau͡gaam atauciinek kinguveqellgutkellrianek uitaciiciqua, pitekluku pisteka David-aaq Jerusalem-aaq-llu nunarpak wii nakmiin pika.”

¹⁴Taumek ATANREM Hadad-aaq tuigcetaa, takarnarqellrianek ilakuralriartainek Edom-aam, inglulirluku-llu Solomon-aaq.

¹⁵Ciuqviini mat'um David-aam Edom-aaq cirlakellrani Joab-aq atanerruarat anguyagtain tuavet ayallruuq tungmagcarturluki tuqumalriit, tuani-llu tuqurqellrui tamalkuita angutet Edom-aami.

¹⁶Joab-aq tamarmeng-llu Israel-aat tuantellruut arvinlegni iraluni, nangluki angutet piunrirnatkameggnun Edom-aami.

¹⁷Hadad-aaq tau͡gaam tuqutenritaat ilait-llu atiin pistai Edomite-at, qimallruata Egypt-aamun. (Taum nalliini Hadad-aaq mikelnguullruuq.)

¹⁸Midian-aamek ayagtut Paran-aamun, tuaken-llu angutnek malilirluteng Paran-aamek ayagtut Egypt-aamun, Pharaoh-mun atanranun Egypt-aam, taum cikiraa Hadad-aq enemek, nunamek, neqkanek-llu.

¹⁹Pharaoh ilukegciami Hadad-aamek cikiraa nuliami nakmiin nayagaanek. Queen-aanek Tahpenes-aam nulirturtelluku.

²⁰Tahpenes-aami qetunranguq aterluni Genubath-aamek, tauna Tahpenes-aam anglicaraa atanruvigmi. Tuani Genubath-aam uitallgutkai Pharaoh-m irniari.

²¹Tuani Egypt-aamenani Hadad-aaq niituq David-aaq tuquniluku, Joab-aq-llu atanerruarat anguyagtet cali tuquniluku. Hadad-aaq qanertuq Pharaoh-mun, “Ataki ayagcessnga uterrnaurtua nakmiin nunamnun.”

²²“Camek nuuqitellrusit maantellerpeni utercungluten-llu nakmiin nunavnun?” Pharaoh-q aptuq. Hadad-aaq kiuguq. “Tua-i ataki ayagcessnga!” Utertuq-llu nunaminun.

²³Agayun cali nangerciuq allamek Solomon-aamun ingluliutarkamek, Rezon-aamek qetunraanek Eliada-m, tauna qimallrulria atanerminek Hadadezer-aamek atanranek Zobah-m.

²⁴Quyurciuq-llu ilikaminek angutnek ciuliqagten͞gurrluni-llu uayaaritulinun, tuqurqirraartelluku David-aaq; ayagluteng-llu Damascus-aamun, tamakumiungurtut-llu, atanrurrluku-llu Damascus-aamun.

²⁵Ellii ingluliurutellruuq Israel-aanun Solomon-aam unguvallran taktaciatun, inerciiganani Hadad-aam pillratun; inglukluku Israel-aaq, ataniurluku-llu Syria-q.

²⁶Alla cali angun Angayuqamun Solomon-aamun inglucitenglleq atanerruarin ilakellruat, Jeroboam-aaq qetunraa Nebat-aam, Zeredah-rmiu Ephraim-aami. Aanii aipainruluni atengqerrluni Zeruiah-mek.

²⁷Mat'umek-llu pitengqerrluni inglulitellruuq atanermun. Solomon-aaq nuniriuq calaralirnerani Jerusalem-aam navguumalria-llu nunarpiim qacarnera kituggluku.

²⁸Jeroboam-aaq piumanaqluni ayagyuarluni tan'gaurluuguq, Solomon-aam-llu tangrramiu calirpagturalallra qaunqesten͞gurtaa calivkaumalrianun nunautiitni kinguveqellgutkellriarin Manasseh-m Ephraim-aam-llu.

²⁹Taum-llu nalliini, Jeroboam-aaq anngan Jerusalem-aamek, prophet-aam Ahijah-m Shiloh-rmium nall'artaa tumyarami. Wani-wa Ahijah aturangqertuq nutaramek; elkek-llu kiimenatek yuilqumi.

³⁰Tua-llu Ahijah-m yaggluku tegua aturaakun nutarakun atuqiikun, allgurluku-llu qula malrugnek cipluku (12) eliqneri amllertariluki.

³¹Qanerluni-llu Jeroboam-aamun, “Teguten qulnek pikarpenek, waten qanran ATANEQ Agayutiit Israel-aat, Wiinga teguiqata'arqa Solomon-aaq angayuqauvianek, elpet-llu cikirciqamken qulnek kinguveqellgutkellrianek.

³²Solomon-aam atauciin kinguveqellgutkellriit pikciqai, David-aaq pisteka Jerusalem-aaq-llu piteklukek, nunarpak cucukelqa wiinga piknaluku Israel-aam nunautiinek.

³³Tua-i-wa elliin pegcanga, ciktaarvikluku-llu Chemosh-aaq agayutiit Moab-armiut, Milcom-aaq-llu agayutiit Ammonite-at, pektenrirluni-llu piciryaramkun aturluki piciulriit pisqutenka alerquutenka-llu tangvallemni, atami David-aam pillracetun.

³⁴Tuaten pingraan tamalkuan angayuqauvik tegungaitaqa unatainek; tau͡gaam atanruvkarciqaqa erenrin taktaciicetun, pitekluku David-aaq, pisteka cucukelqa, aturtekellrat alerquutma picirkiutma-llu.

³⁵Tau͡gaam teguciqaqa angayuqauvik qetunraan unatainek, cikirciqamken-llu elpet qulnek kinguveqellgutkellrianek.

³⁶Tau͡gaam cali qetunraa cikirciqaqa atauciinek kinguveqellgutkellrianek, tauna David-aaq wii pisteka kesianek kenurrangqerrlainarniartuq ciuqamni Jerusalem-aami, nunarpagmi cucukellemni atqa ellinaluku.

³⁷Teguciqamken-llu elpet, ataniurciqaten-llu tamalkuita yuucirpet piyuumiutai, atanruarkauguten tamalkuitnun Israel-aami.

³⁸Niisngakuvki-llu tamalkuita alerquutenka elpenun, piyuakuvet-llu piciryaramtun, aturluku-llu elluaq iigemni, atullerpegun picirkiutenka alerquutenka-llu David-aam pistem̄a pillruciatun, nayurrlainarciqamken, David-aaq pillrucimtun, Israel-aaq-llu elpenun tunciqaqa.

³⁹Man'a pitekluku anucimirqecetaarciqanka kinguvri David-aam tau͡gaam qangvarpak pivkenaki.”

⁴⁰Solomon-aam taumek tuqungnaqsaaqaa Jeroboam-aaq; tau͡gaam Jeroboam-aaq makluni unuakumi qimagtuq Egypt-aamun, Shishak-aamun atanranun Egypt-aam, Egypt-aamenani-llu tuqunatkaanun Solomon-aaq.

⁴¹Tua-llu tamarmeng caurallri Solomon-aam, tamarmeng-llu pillri elliin, elliin-llu elisngii igausnganritut-qaa kalikarni Solomon-aam caurallrini?

⁴²Tamarmeng-llu Solomon-aam ataniullri Jerusalem-aamek tamalkuitnun Israel-aanun yuinaak malruuguk (40) allrakut.

⁴³Solomon-aam qavallgucirai atani, tungmagcimaluni-llu nunarpiinun atami David-aam; Rehoboam-aaq-llu atanrurtuq eniini.