Read Yupik 1 Kings 12 Bible Online

1 Kings 12 - Yupik bible

1 Kings 12

¹Rehoboam-aaq ayagtuq Shechem-aamun, tamarmeng yui neglirneranek Israel-aam quyurcata atanrurcarturluku.

²Tua-llu Jeroboam-aam qetunraan Nebat-aam, ayallrem Egypt-aamun qimagluni Angayuqamek Solomon-aamek, niicamiu man'a, utertuq Egypt-aamek.

³Yuin neglirnermi kinguveqellgutkellriit aqvavkaraat, tamarmeng-llu quyurmeng ullagaat Rehoboam-aaq elliinun-llu qanerluteng,

⁴“Atavet Solomon-aam anagulluni assiinata pilallruakut cakviurtelluta-llu. Makut cakviurnarqellriit uqeglicaquvki yuullerput-llu qacignarikaniquvgu, piciuluta elpenun yuuciqukut.”

⁵Ellii qanertuq, “Ataam taikici erenret pingayun kinguatni, tuani kiuciqamci.” Tua-i yuut ayagtut.

⁶Tua-llu ATANREM Rehoboam-aam qanellgutkai ciulirneret, nangengqalallret ciuqerrani Solomon-aam atami cali unguvallrani, qanerluni, “Qaillun kiusqumaceciki ukut yuut?”

⁷Ellaita-llu qanrutaat, “Kevgaugarkaukuvet ukunun yugnun unuamek kevgiurluki, qalarutaqluki assilrianek aperyarirluten kiugaqavki, kevgiurciqaatgen qangvarpak.”

⁸Tau͡gaam elliin ciuniunritai qanruyutiit angukara'urluut ellminun, qallatellgutekluki-llu ayagyuat anglillgutellni nangengqalriit ciuqermini.

⁹Aptai-llu elliin, “Qaillun kiusqumaceciki ukut yuut qanellret wangnun, ‘Uqiglicarki atmagkaput atavet ellillri wangkutnun?’”

¹⁰Tua-llu ayagyuat anglillgutellri qanertut elliinun, “Waten qanrarkauguten ukunun yugnun qanelrianun elpenun, ‘Elpet atavet uqamairillrui atmaput, tau͡gaam ataki, elpet uqiglicaqerki wangkutnun; elpet qanrutniaten, Wiinga iqelquqa ellenruuq atama qukaani.’

¹¹Watua, nauwa atama uqamairiluki atmagcet'lallruaci. Wii ilaciqanka atmagarkaci. Atama piqertualallruaci qenutatgun, tau͡gaam wii piqertualarciqamci uqamaillritgun.”

¹²Tua-i Jeroboam-aaq tamarmeng-llu yuut taigut Rehoboam-aamun erenret pingayuatni.

¹³Cali atanrem yuut kiucurlagaluki pii, niicugnivkenaki-llu qalaruyutait angukara'urluut ellminun.

¹⁴Elliin qalarutai ayuqucirtuuciicetun ayagyuat qanerluni, “Atama atmaci uqamairilallrui, tau͡gaam wii ilaciqanka atmaci; atama piqertualallruaci qenutatgun, tau͡gaam wii piqertuarciqamci uqamaillritgun.”

¹⁵Tua-i ATANREM niicugninritai yuut; man'a cat tamarmeng tuigtellrat pivkaumauq ATANERMEK qanellni piciurrnaluku, qallatellruami ATANEQ Ahijah-kun Shilonite-akun Jeroboam-aamun qetunraanun Nebat-aam.

¹⁶Tua-llu tamarmi Israel-aam tangrramegteggu niicugninrilucirteng ellait, yuut kiugaat angayuqaq, “Camek pikangqerceta David-aamek? Wangkuta paitarkaitukut qetunraani Jesse-m. Uterci pelatekarpecen̄un Israel-aani! Rehoboam-aaq ellminek anagyaaqulli!” Tua-i Israel-aat ayagtut nakmiin pelatekameggnun.

¹⁷Tau͡gaam Rehoboam-aam ataniurai yui Israel-aam uitalriit nunarpaini Judah-m.

¹⁸Tua-llu angayuqam ayagcetaa Adoram-aaq tarikestiit calivkaumalriit, tamarmeng-llu Israel-aat teggalqutgun tuqutaat. Tua-llu Angayuqaq Rehoboam-aaq cukamek ek'uq pekcessuutminun, qimagluni-llu Jerusalem-aamun.

¹⁹Taumek Israel-aat ingluliurutut David-aam yuinun, man'a erneq engelkarrluku.

²⁰Tua-llu Israel-aat niicameng Jeroboam-aaq uterrniluku ayagceciut taisqelluku-llu quyurrvimeggnun, atanrurrluku-llu tamalkuitnun Israel-aanun. Kitumek maligcestairutut David-aam yui, Judah-m tau͡gaam kinguveqellgutkellriarin kiimeng.

²¹Tuani Jeroboam-aaq tekicami Jerusalem-aamun, quyurcetai tamalkuita Judah-m yui, kinguveqellgutkellriari-llu Benjamin-aam, yuinaat qulngunritaraan tiitsitsaat cucukumalriit anguyagtet, calluusqelluki inglulirluki Israel-aam yui, piurtenqiggnaluku angayuqauvik Rehoboam-aamun, qetunraanun Solomon-aam.

²²Tau͡gaam qaneryaraa Agayutem taiguq Shemaiah-mun yuanun Agayutem.

²³Qanra Rehoboam-aamun, qetunraanun Solomon-aam, atanranun Judah-m, tamalkuitnun-llu yuinun Judah-m, Benjamin-aamun-llu, tamalkuitnun-llu allanun yugnun:

²⁴“Qanertuq ATANEQ, elpet ayagyaqunak callugyarturluki anelguteten, yui Israel-aam. Uterceski tamalkuita yuut tua-i-wa man'a wangnek pian.” Tua-i niitait ATANREM qaneryarai, uterrluteng-llu kingunermeggnun ataam, ATANREM pisquciatun.

²⁵Tua-llu Angayuqam Jeroboam-aam Israel-aamek asvairqaa nunarrii Shechem-aam qemililriarani Ephraim-aam, tuani-llu uitauraqerluni. Tuaken-llu ayiimi cali asvairqaa nunarrii Penuel-aam.

²⁶Jeroboam-aaq-llu qanertuq ircaqumikun, “Waniwa angayuqauvik uterteqatartuq David-aamun.

²⁷Ukut yuut ekuagiyartuquneng eniini ATANREM, Jerusalem-aami, ircaqruit ataam tuigciiqut atanermeggnun, Rehoboam-aamun, atanranun Judah-m.”

²⁸Tua-llu angayuqaq arenqiirturluni, piliuq malrugnek kuluvayagaagnek suulutaagnek. Qanerluni-llu yugnun, “Ayaumamallruuci Jerusalem-aamun mululuci. Tangerrluku agayuceci, Israel-aani, anucesteklerci Egypt-aamek.”

²⁹Aipaa-llu elliluku Bethel-aamun, alla-llu Dan-amun elliluku.

³⁰Man'a-llu assiilnguurtuq yuut ayalameng agayuyarturluteng taukugnun Bethel-aami aipaanun-llu yaaqsingraan Dan-ami.

³¹Ellii cali agayularvilillartuq qemit kangratni, agayulirciaqluni-llu tamaaken yuut ilaitnek, Levite-aunrilngurnek.

³²Jeroboam-aaq pillerkiurtuq nererpallerkamek akimiarunritariitni erenrin pingayunelgata iralut ayuqluku kalukallrat Judah-mi, elliiluni-llu ekuagiluni ekuavigmi; tuaten piuq Bethel-aami, ekuagiluni kuluvayaagaagnun elliin piliallregminun. Nunalgarciuq-llu Bethel-aamun agayulirten̄ek kevgiurarkanek agayularvigni piliallmini elliin.

³³Mayurluni-llu ekuavigmun elliin piliallerminun Bethel-aami akimiaratni erenret, pingayunelgatni iralut, iralumi elliin taqlermini piyaraqnaluku; piurciluni-llu kalukaryaramek yuinun Israel-aam, mayurluni-llu ekuagivigmun aruviarmek ekuaginaluni.