Read Yupik 1 Kings 13 Bible Online

1 Kings 13 - Yupik bible

1 Kings 13

¹ATANREM pisquciatun prophet-aaq Judah-mek ayagtuq Bethel-aamun tekilluni-llu tuavet Jeroboam-aaq nangerngainanrani ekuavigmi ekuagiqatarluni.

²Maligtaquluku ATANREM alerquutii, prophet-aam ikiaraa niitelluni ekuavik: “Ekuaviik, ekuaviik, waten qanertuq ATANEQ: Mikelnguq, atengqerrarkaq Josiah-mek, yuurciiquq nakmiin ilainun David-aam. Tuqurqiciquq agayulirten̄ek kevgiulrianek agayumanrilnguut ekuaviitni elliitnek ekuavkarilrianek elpenun, ekuavkariciquq-llu yuinarnek enernek.”

³Nallunailkutaliuq-llu taumi ernermi, qanerluni, Una nallunailkutnguuq ATANREM qanellranek, “Tangerrluku, ekuavik imcimaarkauguq, qamlleq-llu qainganelnguq kuvumaarkauluni.”

⁴Angayuqam-llu niicamiu man'a, eniraa ellimerrulluku-llu, “Teguu tauna angun!” Egmian-llu angayuqam tallia nalauq, ataam ellminun cayugciigali'irrluki.

⁵Ekuavik alqunaq navgurtuq qamlleq-llu kuvluni nunamun, prophet-aam piciqnillratun ATANREM atrakun.

⁶Angayuqaq-llu Jeroboam-aaq qanertuq prophet-aamun, “Piicauteqernga ATANERMUN Agayutevnun, kaigavikluku unatenka ataam assirivkaasqelluki.” Prophet-aaq-llu piicagtuq ATANERMUN, angayuqam-llu tallia canrircecimauq.

⁷Angayuqaq-llu qanertuq prophet-aamun, “Maligglua enemnun neryartua. Nunulirciqamken caliallerpenek.”

⁸Prophet-aaq kiuguq, “Cikingerpenga avganek tukuutvet, wiinga maligcanritamken wall'u nerngaunii merngauni-llu aipirluten.

⁹Alerqullruanga ATANREM camek neresqevkenii mer'esqevkenii-llu, utercesqevkenii-llu tumelqa aturluku.”

¹⁰Taumek utertenrituq tumllermikun taillermini, tau͡gaam allakun tumyarakun.

¹¹Taum nalliini uitauq ak'allaq prophet-aaq Bethel-aami. Qetunraagken-llu ullagluku qanrutaak tamalkuitnek prophet-aam pillrinek taumi ernermi Bethel-aami; qanellrinek-llu angayuqamun.

¹²Atiignek-llu qanrutak, “Natetmun ayagta?” Qetunraagken-llu apertuataak natetmun prophet-aam ayallrucianek, tekitelleq Judah-mek.

¹³Ellii-llu qanertuq qetunraagminun, “Aqumgavilirtegu ciulvak.” Tua-i aqumgaviliraak ciulvak ellii-llu ekluni.

¹⁴Kingunrirturaa-llu prophet-aaq, nalaqaa-llu aqumgallrani aciani napam; elliin-llu qanrutaa, “Elpet-qaa prophet-aaruuten tailleq Judah-mek?” Qanertuq-llu, “Taunguunga.”

¹⁵Tua-llu qanrutaa, “Maligesnga enemnun neryarturluten kelipamek.”

¹⁶Ellii-llu qanertuq, “Maliggluten uterrngaitua, ciuniurngaunaku-llu allaniuruten. Nerellgutekngaitamken wall'u mellgutekluten maani,

¹⁷tua-i-wa ATANREM alerqullruanga camek nerqaasqevkenii wall'u meqaasqevkenii, utercesqevkenii-llu tumelqa aturluku.”

¹⁸Tua-llu angukaraurtellria prophet-aaq Bethel-aamek qanertuq elliinun, “Wiinga-llu, prophet-aaruunga elpetun, an'gilam-llu qalarutellruanga alerquuciatun ATANREM, qanrullua ut'rucesqelluten wangnun allaneqluten.” Tau͡gaam tauna angukara'urluq iqluuq.

¹⁹Tua-i taum maligtaa eniinun, nerluni-llu kelipamek eniini, merluni-llu mermek.

²⁰Aqumgauk-llu estuulumi, qaneryaraa-llu ATANREM taiguq prophet-aamun taum ut'rutestiinun.

²¹Ellii-llu qanpagtuq prophet-aamun Judah-mek taillermun, “Waten qanertuq ATANEQ, ‘Tua-i-wa elpet narurcavgu qaneryaraa ATANREM, atunrilavgu-llu alerquutekellra elpenun ATANREM Agayutvet,

²²tau͡gaam uterrluten, nerluten-llu kelipamek merluten-llu mermek nunami elpenun qanrutkellrani neresqevkenak kelipamek, mer'esqevkenak-llu mermek; elpet temen qungasngangaituq qunguitnun nakmiin ilavet.’”

²³Nerumariami-llu kelipamek, merluni-llu, aqumgaviliraa ciulvak prophet-aamun taitellerminun.

²⁴Ayainanrani-llu yugtutulim pairtaa tumyarami tuqulluku-llu. Temii-llu egingaluni tumyaramun, ciulvak-llu caniani nangengqaluni; yugtutuli-llu nangengqaluni caniani temiin.

²⁵Angutet-llu kiturtut tamaaggun tangerrluku-llu temii egcimaluni tumyaramun. Yugtutuli-llu nangengqaluni caniani temiin. Tekilluteng-llu nunarpagmun qanrutkaat angukara'urluum prophet-aam uitaviani.

²⁶Tua-llu prophet-aam ut'rutestellran tamaaken niicamiu qanertuq, “Taunguuq prophet-aaq narurcilleq qaneryaranek ATANREM! Taumek ATANREM tunellrukii yugtutulimun, taum-llu allgurluku tuqutaa, ATANREM qanellruciatun elliinun.”

²⁷Ellii-llu qanertuq qetunraagminun, “Aqumlliritegnga ciulvagmek.” Aqumlliriuk-llu.

²⁸Ayagluni-llu, nataqluku-llu temii egcimaluni tumyaramun, ciulvak yugtutuli-llu nangengqalutek caniani temiin. Yugtutulim nereksaunaku tema uitalluku-llu ciulvak.

²⁹Prophet-aam-llu tema tegua ut'rulluku-llu nunarpagmun angniilutekluku tungmaggnaluku-llu.

³⁰Ellia-llu tema nakmiin qunguminun; nangtequtekaat-llu qanerluteng, “Tangerrluku anelgutka!”

³¹Tungmagcimariamiu-llu qetunraagminun qanertuq, “Tuqukuma tungmageskitegnga qungumun prophet-aam tungmagingavianun; elliluki enrenka enrin caniatnun.

³²Qallatellra qastuluni qanrutkesqellranek ATANREM inglukluku ekuavik Bethel-aami, tamalkuita-llu agayularviit Samaria-m nunarpaini, ilumun piciurtenrilngaitut.”

³³Mat'um kinguani Jeroboam-aaq tuigtenrituq assiiluciminek, tau͡gaam cali agayulirciluni agayularvignun tamaaken yuut ilaitnek; kina tua-i piugngalria naaqitaqluku agayulirten͞gurrluku tamakunun.

³⁴Mat'um assiilnguum elliin caliallran taitaa iquklitlerkaa piunrirteqapiggluku elliin kinguvrin-llu angayuqaulallrat.