Read Yupik 1 Kings 15 Bible Online

1 Kings 15 - Yupik bible

1 Kings 15

¹Wani-wa akimiaq pingayunek cipluku (18) allrakut pitarillratni ataniurillra atanrem Jeroboam-aam Israel-aami, qetunraan Nebat-aam, Abijah ayagnirtuq atanruluni Judah-mi.

²Atanrullruuq Jerusalem-aami allrakuni pingayuni. Aanii atengqertuq Maacah-mek pania Abishalom-aam.

³Piyuallruuq-llu assiilngurkun atami pillruciatun ciumini; ircaqrua-llu tamalkiringavkenani ATANERMUN Agayutminun, ircaqruatun atami David-aam.

⁴Tuaten pingraan David-aaq pitekluku ATANREM Agayutiin cikillrua Abijah qetunrarkaanek ataniurisqelluku kinguakun Jerusalem-aami cayailkuciisqelluku-llu Jerusalem-aaq.

⁵ATANREM waten pivkaraa David-aaq pillruan elluarrluni tangvallrani, tuigteksaunani-llu alerquutainek yuullmi taktaciatun, tau͡gaam ataucirqumek Uriah-mun Hittite-amun pillermikun.

⁶Wani-wa anguyauqurallruuk ellmegnun Rehoboam-aaq Jeroboam-aaq-llu yuullmek taktaciatun.

⁷Allat pilallri Abijah-m, tamarmeng-llu pillri igausnganritut-qaa kalikarni igausngaviatni Atanrin Judah-m? Anguyauqurallruuk-llu ellmegnun Abijah-nkuk Jeroboam-aaq-llu.

⁸Abijah-m-llu tungmagcimallgutkai ciuliani; tungmagtaat Nunarpiinun David-aam, qetunraa-llu Asa enairluku angayuqrurtuq.

⁹Yuinaurutiitni allrakut Jeroboam-aam atanirturillran Israel-aanek, Asa ayagnirtuq atanirturiluni Judah-mi,

¹⁰Atanrullruuq-llu Jerusalem-aami yuinaak malruk ataucimek ciplukek (41). Aanii atengqertuq Maacah-mek pania Abishalom-aam.

¹¹Asa-llu caliuq elluarrluni tangvallrani ATANREM, David-aam atami pillratun.

¹²Piunrirtellrui angutet akissut, au͡g'arluki-llu agayutnguat atami piliallri.

¹³Au͡g'armia-llu aanani Maacah queen-auluni aanaullranek, tua-i-wa uuminarqeqapigtellriamek pingqerran piliaqumalriamek Asherah-mun; Asa-m-llu kepaa agayutnguani ekualuku-llu Kuicuarmi Kidron-aami.

¹⁴Tau͡gaam agayularviit agayutnguanun au͡gaumanritut. Tuaten pingraan Asa piciuguq ATANERMUN yuullermi taktaciatun.

¹⁵Elkartai-llu Agayuvigpagmun cat tamalkuita atami cikiutekellri Agayutmun, ilakluku suulutaaq, cat-llu qerrirlimek pilimalriit elliin cikiutni.

¹⁶Kesianek-llu Asa Judah-m Angayuqra, Baasha-llu Israel-aam Angayuqra anguyauqurallruuk angayuqaullermek taktaciatun.

¹⁷Baasha-m-llu atanran Israel-aam itraa Judah, cayailkuciraa-llu Ramah, arulairrnaluku yuut it'lallrat anlallrat-llu Asa-mun atanranun Judah-m.

¹⁸Tua-llu Angayuqam Asa-m tegui tamalkuita suulutaat qerrirlit-llu uitaqallret Agayuvigpagmi angayuqam-llu eniini, tuyuqluki-llu atanerruamikun Damascus-aamun, Syria-m Angayuqranun Benhadad-aamun, Tabrimmon-aam qetunraanun tutgariinun Hezion-aam, waten qanercirluki:

¹⁹“Ataki pillguteksagulluk wiinga elpet-llu, atapuk pillruciagtun; tuyuramken cikiutnek qerrirlimek suulutaamek-llu; ullagluku piunrircarturru ilakuyutsek Baasha-q-llu atanra Israel-aam, ayagnaurtuq anguyagten̄i malikluki nunamnek.”

²⁰Benhadad-aam-llu niitaa Angayuqaq Asa, ayagtelluki-llu alerquastait anguyagtem̄i anguyagtait-llu anguyagluki nunarpait Israel-aat, cirlakluki-llu Ijon-aaq, Dan-aq, Abel Beth Maacah-q, tamalkuan-llu Chinneroth-aaq, nunii-llu tamalkuan Naphtali-m.

²¹Baasaha-m-llu niicamiu tuaten pillrat taqaa caliani Ramah-mi, ayagluni-llu Tirzah-mun.

²²Angayuqaq-llu Asa alerquiguq tamalkuan Judah-mun kina pinritevkenaku ikayuulluki ayaucesqelluki teggalqut Ramah-mi muragpiit-llu, Baasha-m atullri asvairqellermini Ramah. Aturluki-llu Baasha-m asvairqucirak Mizpah Geba-llu, nunarpak Benjamin-aam nunautiinelnguq.

²³Wani-wa tamarmeng caurallrin Asa-m, pinirtacimitun, tamarmeng-llu elliin pillri, nunarpiit-llu piliallri, igausnganritut-qaa tamarmeng kalikaitni igausngaviita caurallrit atanrin Judah-m? Tau͡gaam ak'allaurrluni naulluutengellruuq it'gamikun.

²⁴Asa-m-llu tungmagcimallgutkai atani Nunarpiini David-aam atami; Jehoshaphat-aq-llu atanrurtuq enairluku.

²⁵Nadab-aq qetunraa Jeroboam-aam ataniunguq Israel-aami aipaani allrakum ataniullran atanrem Asa-m Judah-mi; ellii-llu ataniullruuq Israel-aani allrakugni malrugni.

²⁶Ellii pillruuq assiinani tangvallrani ATANREM, piyualuni-llu atami pillratun, assiilngillermikun-llu Israel-aat assiilngircetai.

²⁷Baasha-q qetunraa Ahijah-m ilakellriarinek Issachar-am, uptuq nalluvkarluni inglukluku Nadab-aq; Baasha-m-llu tuqutaa Gibbethon-aami, Philistine-at nunautiitni; tuani Nadab-am tamarmeng-llu Israel-aat kassugusngallratni Gibbethon-aaq.

²⁸Tua-i Baasha-m tuqutaa pingayuatni allrakut ataniullran atanran Asa Judah-m, atanrurrluni-llu enairluku.

²⁹Tamaa atanrurcami tuqutai tamalkuita ilai Jeroboam-aam; uitaciinrituq iliinek Jeroboam-aam anernelegmek, maliggluku qanellra ATANREM pistem̄ikun Ahijah-kun Shilonite-akun.

³⁰Tamana piuq pitekluku assiilngua Jeroboam-aam, Israel-aat-llu elliin assiilngirtelluki, qenngevkallruaku ATANEQ Agayutiit Israel-aat.

³¹Wani-wa allat caurallri pillri-llu Nadab-am, igausnganritut-qaa igausngaviitni kalikarni atanrin Israel-aat?

³²Kesianek-llu Asa Judah-m Angayuqra, Baasha-llu Israel-aam Angayuqra anguyauqurallruuk angayuqaullermek taktaciatun.

³³Pingayuatni allrakut Asa-m atanirturillran Judah-mi, Baasha qetunraa Ahijah-m atanirturinguq Israel-aani tamalkuita Tirzah-mek, atanrullruluni-llu allrakuni yuinaq cetamanek cipluku (24).

³⁴Ellii-llu piluni assiitellriamek tangvallrani ATANREM, piyualuni-llu Jeroboam-aam pillratun assiilngillermikun-llu Israel-aat assiilngirtelluki.