Read Yupik 1 Kings 16 Bible Online

1 Kings 16 - Yupik bible

1 Kings 16

¹ATANREM-llu qaneryaraa taiguq Jehu-mun qetunraanun Hanani-am waten qanrutesqelluku Baasha,

²“Nalullruamken caunritlerpenek ciuliqagten͞gurrluten-llu yumnun Israel-aanun, piyuaguten-llu picillratun Jeroboam-aam, yuunka-llu Israel-aat assiilngirtelluki, eq'uqertellua assiilnguit pitekluki.

³Taumek au͡g'arciqaqa Baasha ilai-llu, Jeroboam-aaq pillrucimtun qetunraa Nebat-aam.

⁴Baasha-m ilakellriarin iliit nunarpagmi tuqukan qimugtet nerciqaat kina-llu imna ilii tuqukan yuilqumi yaqulgin ellam nerciqaat.”

⁵Wani-wa caurallrin Baasha-m ilait, pillri-llu alingurarpek'nani-llu callri igausnganritut-qaa kalikaitni Igausngaviita Atanrin Israel-aam?

⁶Baasha-m-llu tungmagcimallgutkai ciuliani tungmagcimaluni-llu Tirzah-mi; Elah-llu qetunraa atanrurtuq enairluku.

⁷Tamana ilaluku ATANREM qaneryaraa taillruuq prophet-aakun Jehu-kun qetunraakun Hanani-am, inglulirluku Baasha ilai-llu tamalkuita, tua-i-wa assiitellriamek pillruan tangvallrani ATANREM, qenngevkaraqluku ATANEQ assiitellriakun caliamikun Jeroboam-aam pillruciatun, cali-llu tuqutellruaki tamalkuita Jeroboam-aam ilai.

⁸Yuinaq arvinlegnek cipluku (26) allrakungluku ataniullran Asa-m Judah-mi. Elah qetunraa Baasha-m ayagnirluni ataniungellruuq Tirzah-mi, atanruluni-llu allrakugni malrugni.

⁹Tau͡gaam pistii Zimri-q, alerquastiit avgita ikamrartain, picirkiurtuq inglukluku Elah. Tirzah-metlermini merluni taangiqluni eniini Arza-m, angayuqam eniin tarikestiin Tirzah-mi.

¹⁰Zimri iterluni iqutaa tuqulluku-llu, yuinaq malrunlegnek (27) cipnengqerluku ataniullra Asa-m atanran Judah-m, ataniurluni-llu enairluku.

¹¹Ayagniami ataniurluni, ellminek aqumngami aqumllermun, tuqurqai ilai Baasha-m; uitaciinrituq atauciungraan angutmek tungelqurranek wall'u yugnikekiinek.

¹²Tua-i Zimri-m piunrirai ilai Baasha-m, qanellra ATANREM aturluku, Jehu-kun prophet-aakun.

¹³Agayutngualiulallermegnegun, Israel-aaq-llu maryarrluku assiilngurmun, Baasha-nkuk qetunrani-llu Elah eq'uqercetellruak ATANEQ, Agayutii Israel-aam.

¹⁴Wani-wa caurallrin ilait Elah-m, pillri-llu tamarmeng, igausnganritut-qaa kalikarni igausngaviitni atanrin Israel-aam?

¹⁵Yuinaq malrunelgatni (27) allrakut Asa-m ataniullran Judah-mi Zimri-q atanrullruuq ernerni malrunlegni, Tirzah-mi. Wani-wa Israel-aat anguyagtet avatairumaat Gibbethon-aaq Philistine-at nuniit.

¹⁶Anguyagtet-llu niicameng Zimri-m pillerkiullranek tuqulluku-llu angayuqaq, egmian Omri-q atanerruateng atanrurtaat Israel-aamun tuani ernermi.

¹⁷Tua-i Omri-q mayurtuq Gibbethon-amek, Israel-aat-llu tamarmeng maligtaat, avatairluku-llu Tirzah-q.

¹⁸Tuani-llu Zimri-m tangrramiu nunarpak tegumacia, itertuq iluqlikacagiinun atanruviim, ekuavkarluku-llu angayuqam enii, tuquluni-llu.

¹⁹Man'a waten pivkaraat assiilnguin elliin, caarrluuluni pilallran tangerqiini ATANREM, piyualallran tumaikun Jeroboam-aam, assiilngillermikun-llu Israel-aat assiilngircetaqluki.

²⁰Wani-wa allat caurallri Zimri-m, aassaqluni-llu pillra igausnganritut-qaa Kalikarni igausngaviitni atanrin Israel-aam?

²¹Tua-llu yui Israel-aam avegtut malruirrluteng; avgita maligtaat Tibni-q qetunraa Ginath-aam, ataneqnaluku, avgita-llu maliggluku Omri-q.

²²Tau͡gaam Omri-m maligcestain cirlakait maligcestai Tibni-m qetunraan Ginath-aam; tua-i Tibni-q tuquuq, Omri-llu atanrurtuq.

²³Yuinaq qula ataucimek (31) cipnengellrani atanrullran Asa atanran Judah-m, Omri-q ayagnirtuq ataniurluki Israel-aat, atanruuq-llu qula malrugnek (12) cipluku; arvinlegni-llu atanruluni Tirzah-mi.

²⁴Kiputaa-llu ingria Samaria-m Shemer-aamek tiissitsaanek arvinlegnek (6,000) akinek; pengegnairturluku-llu ingriq, acirluku-llu nunarpak piliallni, Samaria-mek, umyuaqluku Shemer-aam atra pikestellra ingrim.

²⁵Omri-llu piuq assiitellriamek tangvallrani ATANREM, arcaqanruluni-llu allat ciuqlirmi pilallritni.

²⁶Piyuaguq tamalkuitgun pillrikun Jeroboam-aam qetunraan Nebat-aam, assiilngurteggun-llu pillermikun assiilngircetai Israel-aat, qenngevkaraqluku ATANEQ, Agayutiit Israel-aat agayutnguamegteggun.

²⁷Wani-wa allat caurallri Omri-m, piniq-llu elliin nasvallra, igausnganritut-qaa kalikarni igausngaviitni pillrita angayuqrin Israel-aam.

²⁸Omri-m-llu tungmagcimallgutkai ciuliani, tungmagcimaluni-llu Samaria-mun; Ahab-aq atanrurtuq enairluku.

²⁹Yuinaq akimiaq pingayunek cipluku (38) allrakut Asa-m ataniullran Judah-mi, Ahab-aq qetunraa Omri-m ayagnirtuq ataniurluki Israel-aat, Samaria-mi yuinaq malrugnek cipluku (22) allrakuni.

³⁰Ahab-aq-llu qetunraa Omri-m assiitellriamek pillruuq tangvallrani ATANREM arcaqanruluni tamalkuitni ciuqlimini.

³¹Arcaqalriarunrilan ellmini piyualleq assiilnguikun Jeroboam-aam qetunraan Nebat-aam, nulirtullruuq Jezebel-aamek panianek Ethbaal-am atanrata Sidon-aarmiut, kevgiurluku-llu Baal-aq agayutnguaq ciktaarvikluku tuaten.

³²Pilillruuq-llu ekuavigmek Baal-amun eniini, Samaria-mi piliallmini.

³³Ahab-am arcaqanruluni qenngevkalallrua ATANEQ, Agayutiit Israel-aat. Agayutngualillruuq-llu Asherah-mek. Arcaqanrullruuq tamalkuitni Israel-aani atanrullerni ciumini.

³⁴Hiel-aam ataniullmi nalliini ataam nautellrua Jericho. Ciunguluku-llu ATANREM qanrutkellruciatun Joshua-kun, Nun-am qetunraakun, cagmarillrua ciuqliq qetunrani Abiram-aaq tusnganlillermini Jericho-q, nangnerat-llu qetunrani Segub-aaq piliaqellmini ikirtuqai.