Read Yupik 1 Kings 18 Bible Online

1 Kings 18 - Yupik bible

1 Kings 18

¹Kinguqvaurrnerakun, allrakut pingayuatni ellalliyuitellran, ATANEQ qanertuq Elijah-mun, “Ayagluten nasvagyartua Angayuqamun Ahab-amun; ellallirceciiqaqa-llu.”

²Tua-i Elijah ayagtuq. Wani-wa piitnaq arcaqangluni Samaria-mi,

³taumek Ahab-am-llu qayagauraa Obadiah, enemelnguut angayuqam eniin ciuqliqngatgu. (Wani-wa Obadiah-m qigcikaa cakneq ATANEQ,

⁴Jezebel-aam-llu tuqurqellraki prophet-aari ATANREM, Obadiah-q tegutuq yuinarnek tallimanek (100) prophet-aanek iirluki-llu yuinaak malruk qulmek ciptaqluki (50) quyungqalriit qerranernun, nerevkaraqluki-llu kelipanek mermek-llu.)

⁵Ahab-aq-llu qanertuq Obadiah-mun, “Ayaglunuk yuvrirlauk tamalkuita ulevlat kuiggaaraat-llu nunami can'get-llu amllertassiarluki horse-at ciulviit-llu unguvatkait. Tuqucimayunaqngaiciiqelliut ungungssimta ilait.”

⁶Tua-llu nuna avgaak ellmegnun pektellerkartek; Ahab-aq-llu kiirrarmi ayagluni tuatmun, Obadiah-llu ayagluni allatmun kiirrarmi.

⁷Obadiah-llu ayainanrani tangerrluku Elijah-m pairtaa; Obadiah-m-llu elitaqaa, cikluni-llu ciuqerranun, qanerluni-llu, “Elpenguuten-qaa, atanemaa, Elijah?”

⁸Elliin-llu kiugaa, “Wanguunga. Ayagluten qanrucarturru atanren, ‘Tangerrluku, Elijah maantuq.’”

⁹Tauna-llu qanertuq, “Camek assiilngircia, tun'arkauluku pisten unatainun Ahab-am tuqucesqellua?

¹⁰ATANEQ Agayuten unguvaluku, angayuqauvillgutkellriartaituq wall'u atanruvigtaituq atanema ayagcecivikeksailkiinek yuarluten; qanraqata-llu waten, ‘Cataituq maani,’ angayuqat akqivkalarai piciulriamek qanerniluki nataqeksaitaatniluten.

¹¹Wani-wa-llu qanerluten, ‘Atanren qanrucarturru, “Tangerrluku, Elijah maantuq.”’

¹²Tamaa-llu uniskumken, Anerneran ATANREM ayauciiqaaten natmun nallukemnun; tua-llu uterrlua qanrucartuqumku ataneqa, elliin-llu nataqevkenak, elliin tuquciiqaanga. Wiinga, elpet pistevni, qigcikellrungramku ATANEQ ayagyuarraanemnek.

¹³Niiteksaituten-qaa Jezebel-aam tuqurqellrani prophet-aari ATANREM iirillruciqa yuinarnek tallimanek (100) prophet-aanek qerranernun, malruinguluki yuinaak malruk qulmek ciptaqluki (50), neqkirluki-llu kelipanek mermek-llu?

¹⁴Ciin taumek ellimercia qanrucartuusqelluku ataneq maanetniluten? Elliin tuquciiqanga!”

¹⁵Elijah-llu kiuguq, “ATANERKUN Artuqailngurkun, kevgiuqengamkun, akqiunga ullauciiqua atanermun ernerpak.”

¹⁶Tua-i Obadiah ullautuq Angayuqamun Ahab-amun qanrulluku-llu, Ahab-am-llu pairrsaagaa Elijah.

¹⁷Tuani-llu Ahab-am tangrramiu Elijah, qanertuq elliinun, “Elpenguuten-qaa, elpet uitacurlagcecestiit Israel-aat?”

¹⁸Elliin-llu kiugaa, “Uitacurlagcetenritanka Israel-aat; tau͡gaam elpet piaten, atavet-llu, tua-i-wa elpet cakaaravki alerquutai ATANREM maliggluki-llu agayutnguat.

¹⁹Wani-wa ayagceciluten quyurceski tamalkuita Israel-aat wangnun Ingrimi Carmel-aami, yuinaat-llu yuinaat, yuinaak-llu malruk qulmek cipluku (450) prophet-aari Baal-am agayutnguam, yuinaat-llu yuinaat (400) prophet-aari Agayutnguam Asherah-m, nerlalriit estuuluani Jezebel-aam.”

²⁰Tua-i Ahab-am ayagcetai yui Israel-aam, quyurtelluki-llu prophet-aat Ingrimi Carmel-aami.

²¹Elijah-llu malkaniutuq yugnun, qanerluni-llu, “Qakurpak nalirugteqatarceci malrugnek piyarangqerrluci? ATANEQ Agayutngukan maligciu; wall'u Baal-aq piukan, tua-i maligciu.” Yuut-llu kiunritaat aperyararraungraan.

²²Tua-llu Elijah qanertuq yugnun, “Wiinga, kiima wiinga, unicimaunga prophet-aarulua ATANERMUN, tau͡gaam Baal-am prophet-aari amllertaut yuinaat yuinaat, yuinaak-llu malruk qulmek cipluku (450) angutet.

²³Ataki malruk angucaluk cikiutnguqerlik wangkutnun; cucuklirlit taukut ataucimek angucalumek ellmeggnun, itumlluku-llu mikliriluku, elliluku-llu muriit qaingatnun.

²⁴Qayagaurniarci-llu atra agayutevci, wiinga-llu qayagaurciqaqa atra ATANREM, Agayun-llu kiulria kenerkun tauna Agayutnguuq.” Tamarmeng-llu yuut kiugut, “Elluarrluni qanertuq.”

²⁵Tua-llu Elijah qanertuq prophet-aarinun Baal-am, “Cucuklirci elpecen̄ek angucalumek upluku-llu ciumek, elpeci amllerravci; qayagaurluku-llu atra agayutevci, tau͡gaam kumarcaqunaciu.”

²⁶Teguat-llu angucaluq ellmeggnun taicimalria, upluku-llu ciumek, qayagaurluku-llu atra Baal-am unuakumek ayagnirluteng erenrem qukallranun, qanerluteng, “Baal-aaq, kiugikut!” Tau͡gaam erinatangeksaunani, kina-llu kiuksaunani. Pektut-llu tussilluteng avatiini ekuaviim piliaqellermeng.

²⁷Erenrem-llu qukallrani Elijah-m picingssautekluki qanertuq, “Qastuluci qayagaciu, qavaralliuq, wall'u nanteqalliuq, wall'u-qaa ayallruuq natmun, wall'u-qaa qavartuq tupaggnaqluni.”

²⁸Qastuluteng-llu qayagaut, kilirturluteng-llu ellmeggnek piciryararteng maliggluku, kapurluteng tuaten auk maqnatkaanun qaimeggnun.

²⁹Erenrem-llu qukallra kitungluku, cali qayagpagaut elliiyaraq ekuagiluni tekilluku, tau͡gaam erinatangeksaunani; kina kiuksaunani, kitumek-llu niitestaunateng.

³⁰Tua-llu Elijah qanertuq tamalkuitnun yugnun, “Taikanirluci wangnun,” yuut-llu tamarmeng elliinun malkaniutut. Elliin-llu kitugtaa ekuavia ATANREM itumcimalleq;

³¹Elijah-llu tegutuq qula malrugnek teggalqunek naataciluki kinguvellgullgutkellriartai qetunrain Jacob-aam, elliinun tekitellrulria qaneryaraa ATANREM qanerluni, “Israel-aaq elpet atqerkaugan.”

³²Taukunek-llu teggalqunek aturluni ekuaviliuq atrakun ATANREM. Elaneliluni-llu avatiikun ekuaviim, angtarrluku cetaman gallon-aat imarkaqsugngakiitnek.

³³Muriit-llu elliluki picirkaicetun, itumlluku-llu angucaluq mikliriluku elliluki-llu muriit qaingatnun. Qanerluni-llu, “Imirciki cetaman caqut mermek, kuvluki-llu ekuagarkat qaingatnun.”

³⁴Qanertuq-llu, “Piciu cali aipiriluku”; aipiriluku-llu piat; ataam qanertuq, “Pingayiriluku piciu”; pingayiriluku-llu piat.

³⁵Meq-llu ellngartuq mengliinun elaneq-llu imangluni mermek.

³⁶Sass'ami erenrem qukallran kinguani Elijah prophet-aaq piicagtuq, malkaniulluni-llu qanertuq, “ATANEQ Agayutiin Abraham-aam, Isaac-aam, Israel-aam-llu, ataki nallunairru Agayutngucin uumi ernermi Israel-aanun, wiinga-llu elpenun kevgauciqa, makut piamki elpet qanllerpegun.

³⁷Kiugia ATANEQ, Agayutnguuten, elpet-llu ircaqruit tuigtaten utetmun.”

³⁸Tua-llu kenra ATANREM igtuq, qamlluki-llu ekuagarkat, muriit-llu, teggalqut, urr'aq-llu, kinerluku-llu meq elanermelnguq.

³⁹Yuut-llu tangrramegteggu tamana, put'ut kegginameggnun; qanerluteng-llu, “ATANEQ, Agayutnguuq; ATANEQ, Agayutnguuq.”

⁴⁰Elijah-llu qanertuq ellaitnun, “Teguciki prophet-aari Baal-am; atauciungraan-llu ayagcetevkenaku.” Ellaita-llu teguit; Elijah-m-llu atrautai Kuicuarmun Kishon-aamun, tuqulluki-llu tuani.

⁴¹Elijah-m-llu qanrutaa Ahab-aq, “Mayurluci nerici merluci-llu; tua-i ellarviim nepii niitnarian.”

⁴²Tua-i Ahab-aq mayurluni ner'uq merluni-llu; Elijah-llu mayurluni kangranun Carmel-aam; put'uq nunamun, kegginani-llu elliluku ciisqugmi akuliignun.

⁴³Ellii-llu qanertuq pistem̄inun, “Mayurluten watua kiarten tungiinun imarpiim.” Mayurluni-llu kiartuq, qanerluni-llu, “Cataituq.” Ellii qanertuq, “Mayunqigtaqluten malrunlerqunek.”

⁴⁴Malrunelgatni-llu qanertuq, “Tangerrluku, amirlucuar, tuar yuum unatii, mayurtuq imarpigmek.” Elliin-llu qanrutaa, “Mayurluten qanrusgu Ahab-aq, ‘Upeski pekcessuuteten atrarluten-llu ellalluum pisciigali'irceciiqaaten.’”

⁴⁵Cukamek-llu qilak tunguriuq amirlungluni anuqengluni-llu, tua-i-llu ellarvangluni. Ahab-aq-llu pekluni ayagtuq Jezreel-amun.

⁴⁶Pinia-llu ATANREM Elijah-mun tut'uq; ellii-llu naquggluni ciunrakun ayagluni Ahab-am iteryaraanun Jezreel-am.