Read Yupik 1 Kings 19 Bible Online

1 Kings 19 - Yupik bible

1 Kings 19

¹Angayuqam Ahab-am qanrutaa nuliani Jezebel-aaq tamalkuitnek Elijah-m pillrinek elliin-llu qaillun tuqutellrinek tamalkuita prophet-aat nuussirpagkun.

²Tua-llu Jezebel-aaq ayagceciuq kevgamek Elijah-mun qanerluni, “Agayutet agturlua tuquskilitnga unuaqu uum nalliini prophet-aat pillerpetun pinrilkumken.”

³Elijah alinguq unguvani-llu qimautaa; malikluku pisten̄i ayagtuq Beersheba-mun Judah-mi. Pista tuavet unilluku,

⁴Elijah ernerpak piyuaguq yuilqumun. Arulairami aqumuq kagitngalnguum napam talinranun tuquyugyaaqluni-llu. “Amllerriuq; watua, ATANEQ, teguu unguvaka; wiinga cangallrunrilama atamni.”

⁵Inarrluni-llu qavartuq, aciani kagitngalnguum napam, tangerrluku-llu an'gilam agturaa qanrulluku-llu, “Makluten neri.”

⁶Kiartuq-llu tangerrluku-llu kelipaq qamiqumi caniani assigtaq-llu mermek imalek. Ner'uq merluni-llu, ataam-llu inarrluni.

⁷An'gilaa-llu ATANREM taiguq aipiriluni, agturluku-llu qanerluni, “Makluten neri, pektellerkan arturyagucuaran.”

⁸Elijah-llu makluni ner'uq merluni-llu, neqem-llu piniria yuinaagni malrugni (40) ernerni unugni-llu Sinai-am ingrianun piyuayugngariluku tanqilriamun ingrimun.

⁹Tuani qerranermun itertuq inarrnaluni tuavet. Alqunaq ATANREM qanrutaa, “Calisit maani, Elijah?”

¹⁰Ellii kiuguq, “ATANEQ Agayun Artuqailnguq, kevgiullruamken—elpet kiivet. Tau͡gaam Israel-aam yuin navellruat akqutelteng elpenun, itumlluki-llu ekuaviten, tuquqluki-llu prophet-aaten. Wiinga kiima ellirtua, tuqutengnaqaatnga-llu!”

¹¹“Ani ciuqamnun-llu nangerrluten ingrim kangranun,” ATANREM qanrutaa. Tua-llu ATANEQ kiturtuq tuknilriamek-llu anuqmek taivkariuq qemit qupevkarluki itumlluki-llu teggalqut, tau͡gaam ATANEQ anuqemtenrituq. Anuqairutuq, tua-llu nuna pekluni, tau͡gaam ATANEQ nunami pektaalriami uitanrituq.

¹²Nunam-llu pektellran kinguakun ekuaguq, tau͡gaam ATANEQ kenermetenrituq. Tua-llu kenrem kinguakun qaskitpiamek erinatanguq.

¹³Elijah-m niicamiu, nemraa kegginani ulikutaminek anluni-llu nangertuq iteryaraanun qerranrem. Tangerrluku-llu, erina elliinun qanertuq, “Calisit maani, Elijah?”

¹⁴Ellii kiuguq, “ATANEQ Agayun Artuqailnguq, kevgiurturalaramken—elpet kiivet. Israel-aam tau͡gaam yuin navgaat akqelteng elpenun, navgurluki-llu ekuaviten, tuquqluki-llu prophet-aaten. Wiinga kiima ellirtua, tuquituraatnga.”

¹⁵ATANEQ-llu qanertuq elliinun, “Uterten yuilqurtaanun Damascus-aam, tua-llu iterluku nunarpak uqumek mingukiu Hazael-aaq atanrurrluku Syria-mun;

¹⁶Jehu-llu qetunraa Nimshi-m uqumek mingugniaran atanrurrluku Israel-aanun, Elisha-llu, qetunraa Shaphat-aam Abelmeholah-rmiu, mingugniaran prophet-aarurrluku elpet enairtekaqluku.

¹⁷Kina-llu analria nuussirpiinek Hazael-aam, Jehu-m tuquciiqaa; kina-llu analria Jehu-m nuussirpiinek Elisha-m tuquciiqaa.

¹⁸Tau͡gaam cali uitaciiciqua unguvalrianek tiissitsaanek malrunlegnek (7,000) Israel-aami—kinkut imkut piciulriit wangnun, ciktaaqsailnguut-llu Baal-amun wall'u cingartekeksailkai agayutnguaran.”

¹⁹Elijah ayagtuq nataqluku-llu Elisha nunamek itumcilria angucalunek kuluvagnek qamurterluni, kinguqlikaca'ar aturluku itumciluni. Elijah-m ulikutani yuuluku ac'etaa taumun.

²⁰Taum-llu angucaluq kuluvani unilluku malirqeraa Elijah, qanerluni-llu, “Ataki tua-i-ngunrituuryarturraaqerlakek ataka, aanaka-llu, nutaan maliggniamken.” Elijah kiuguq, “Aa-ang, uterten. Qunukngaitamken!”

²¹Tua-llu Elijah utertuq qamurtem̄inun kuluvagnun angucalunun, tuqutai, kenirluki-llu kemgit, atmagcuutiit murakluku. Cikiutekai kemgit yugnun, ellaita-llu nerait. Nangerrluni-llu maligtaa Elijah, kevgiurturnaluku.