Read Yupik 1 Kings 2 Bible Online

1 Kings 2 - Yupik bible

1 Kings 2

¹David-aam tuqullerkani mallgian, taisqaa qetunrani Solomon-aaq qanrulluku-llu nangnernek ayuqucirtuutminek:

²“Tuqullerkaqa tekituq. Ukveqkiu elpenek piyugngacin taqsuarinqeggluten-llu,

³aturluki-llu cat ATANREM Agayutvet alerquutai elpenun pisqellri. Niisngaluki tamalkuita alerquuteliari ellimerrutai-llu, igausngaciicetun Alerquutaini Moses-aam, natmun tamalkuan ayallren piluaqerniartuten callerpeni tamalkuan.

⁴Niisngakuvgu, piciurciiqaa ATANREM akqutni qanrutkellni wangnun kinguvemnun ataniularciqniluku Israel-aaq mulngakluteng niisngakatki alerquutai pektayiinateng ircaqumegteggun yuucimegteggun-llu tamalkirrluteng.

⁵“Cali allamek pitangqertuq. Neq'akan Joab-am pillra wangnun tuqullukek atanerruak Israel-aat anguyagtaitni, Abner-aaq qetunraa Ner-am, Amasa-llu qetunraa Jether-aam. Umyuaqan qaillun tuqutellrak nepaitellrem nalliini akinaurluku tuqurqillrak anguyautellrata nalliini. Elliin tuqutellruak pinarqutailnguuk angutek, tua-i-llu wani-wa wiinga cakviurutekluku tusngaluni wangnun tamana pillra, nangtequtekluki-llu wiinga kingunra.

⁶Qaillun pillerkan nallunritan; tuquvkararkaunritan tuqulaucikun.

⁷“Tau͡gaam nakleklukek qetunraak Barzillai-am Gilead-aamek auluklukek-llu, tua-i-wa naklekellruagnga qimagaullemni anelgutevnek Absalom-aamek.

⁸“Au͡gna-llu cali Shimei-aq qetunraa Gera-m, nunamek Bahurim-aamek Benjamin-aami. Aniqlaallruanga cakneq ernermi ayautemni Mahanaim-un, tau͡gaam pairtellranga Jordan-aami Kuigmi, wiinga piciulua akqellruaqa atrakun ATANREM tuqutauvkarngaitniluku.

⁹Tau͡gaam elpet ayagcecaqunaku anucimirqecetaarpek'naku. Nallunritan qaillun pillerkan, elpet-llu pinritevkaryaqunaku tuqutauvkallerkaa.”

¹⁰David-aaq tuquuq tungmagcimaluni-llu David-aam Nunarpiini.

¹¹Angayuqaullruuq Israel-aani allrakuni yuinaagni malrugni (40), atanirturiluni malrunlegni allrakuni Hebron-aami, yuinaq-llu qulmek cipluku pingayunek (33) allrakuni Jerusalem-aami.

¹²Solomon-aam enairaa atani David-aaq atanrurrluni, atanirturillra-llu caqtaarpek'nani elkarcimaluni takarnarqellria-llu pinia ayagniluaqaumaluni.

¹³Tua-llu Adonijah, aanangqellria Haggith-aamek, ayagtuq Bathsheba-mun, tauna Solomon-aam aanakaa. “Man'a-qaa yugnikutnguuq nunatellren?” Bathsheba aptuq. “Tuaten piuguq,” Adonijah-m kiugaa,

¹⁴kingunertaa-llu, “Qanerkangqertuq elpenun.” “Cauga?” arnaq aptuq.

¹⁵Adonijah-m-llu kiugaa, “Nallunritan atanrurtarkaurtellruyaaquciqa yuut-llu tamarmeng Israel-aami neryuniurutkellruluku. Tau͡gaam tuaten pillruvkenani, anelgutka angayuqrurtellruuq tua-i-wa ATANREM pisqutekngaku.

¹⁶Waniwa-llu ataucimek piyuumiutengqertua; niitenricaqunii.” “Cauga?” Bathsheba aptuq.

¹⁷Kiuguq, “Ataki Angayuqaq Solomon-aaq kaigavikeqerru—nallunritaqa niitenrilngaitaaten—cikiisqellua Abishag-amek Shunammite-amek nuliqsagutniarqa.”

¹⁸Bethsheba qanertuq, “Ilumun-wa; angayuqaqa qanellgutkeciqaqa pitekluten.”

¹⁹Tua-i Bathsheba-m ullagaa angayuqaq qalarucarturluku Adonijah pitekluku. Angayuqaq nangertuq ciuniurluku aanani cikvikluku-llu. Aqumluni-llu atanruviminun allamek-llu aqumllermek itrutelluki aqumevkaraa tallirpilirneminun.

²⁰Aanii qanertuq, “Angenrilngurmek kaigaviksugamken; niitenricaqunii.” “Ca piyullren qanrutkiu, aanaa; tua-i-wa niitenrilngailamken.”

²¹Kiugaa, “Anelgutevnun Adonijah-mun Abishag-aq nulirqevkarru.”

²²“Ciin pisia Abishag-aq tunesqelluku Adonijah-mun?” angayuqam aptaa. “Apesnga-llu atak atanruvik aqumlleqa tunesqelluku elliinun. Tua-i-wa amaqliungan wangnun, Joab-ankuk-llu Abiathar-aq-llu agayulirta ililirturluku!”

²³Tua-i-llu Solomon-aaq piciulriamek akqiuq ATANREM atrakun, “Ataki Agayutem tuquskilia akilircetenrilkumku Adonijah unguviinek mat'umek aptellra pitekluku!

²⁴ATANREM elkartellruanga asvaunii atama David-aam aqumllerranun atanruvigmun; akqutni piciurtellrua tailluku-llu angayuqauvik wangnun kinguvemnun-llu. Piciulua qanertua unguvalriakun ATANERKUN Adonijah tuqucimaarkauniluku mat'umi ernermi!”

²⁵Tua-i Angayuqam Solomon-aam ellimerraa Benaiah-q, tauna an'uq tuqulluku-llu Adonijah.

²⁶Tua-i-llu Angayuqaq Solomon-aaq qanertuq Abiathar-amun agayulirtem̄un, “Ayii nunavnun Anathoth-aami. Elpet tuqucimanarquten, tau͡gaam wiinga tuqucessngaitamken watua, tua-i-wa qaunqesten͞gullruavet ATANREM Akqutiin Yaassiiganun nayullerpeni ataka David-aaq, pillgucillruluku-llu arenqiallugutaini.”

²⁷Tua-i-llu Solomon-aam ayagtelluku Abiathar-aq kevgiullranek agayulirten͞guluni ATANERMUN, piciurrluku ATANREM qanellra Shiloh-mi agayulirta Eli-aq kinguvri-llu piluki.

²⁸Joab-aq niituq qaillun pillratnek. (Elliin piyuumiutellruamiu Adonijah Absalom-aaq pivkenaku.) Tua-i qimagtuq ATANREM pelatekaanun teguluki-llu ekuaviim kangirai.[2]

²⁹Qanemcimek niicami Angayuqam Solomon-aam Joab-aq qimagniluku pelatekamun canianetniluku-llu ekuaviim, Solomon-aaq ayagceciuq kevgamek apcarturtelluku Joab-aq ciin qimaucianek ekuavigmun. Joab-aq kiuguq qimallruniluni ATANERMUN alingami Solomon-aamek. Tua-i Angayuqam Solomon-aam ayagcetaa Beniah tuqucesqelluku Joab-aq.

³⁰Ayagtuq-llu pelatekamun ATANREM tuanelvianun qanerluni-llu Joab-amun, “Angayuqam anesqaaten.” “Qang'a.” Joab-aq kiuguq. “Tuquciqua wani.” Beniah-llu utertuq angayuqamun qanrulluku-llu Joab-am qanellranek.

³¹“Pii Joab-am qanellratun.” Solomon-aaq kiuguq. “Tuqulluku tungmaggluku-llu. Nutaan wii wall'u David-aam kinguvri pinarqutairutniartukut Joab-am pillranun tuqutellermini pinarqenrilnguut angutet.

³²ATANREM anucimirqecetaarciqaa Joab-aq tamakut tuqucimallret pitekluki, elliin pillri nalluvkarluku ataka David-aaq. Joab-aq tuqucillruuq malrugnek angutegnek pinarqutailnguugnek ellmini assinrulriignek: Abner-aamek atanirturtiit anguyagtain Israel-aam, Amasa-llu, atanirturtiit anguyagtain Judah-m.

³³Anucimirqecetaarutiit tuqucimallrata tuciiquq Joab-amun kinguvrinun-llu akwarpak. Tau͡gaam ATANREM cikiumaarkaugai David-aam kinguvri aqumgalriit elliin aqumllerani piluaqautmek.”

³⁴Tua-i Beniah ayagtuq pelatekaanun ATANREM tuanlucian tuqulluku-llu Joab-aq, tungmagcimauq-llu nunamini yuilqumi.

³⁵Angayuqam-llu Beniah atanrurtaa anguyagten̄un enairluku Joab-aq, Zadok-aq-llu agayulirta elliluku Abiathar-am eniinun.

³⁶Tua-llu angayuqam taisqaa Shimei-aq qanrulluku-llu, “Eneli pikavnek maani Jerusalem-aami. Tuanetniartuten ayagyaqunak-llu nunarpagnek.

³⁷Ayakaquvet kiturluku kuicuar Kidron Brook-aq, ilumun tuquarkauguten—elpet-llu tau͡gaam avalitnguarkauguten.”

³⁸“Ilumun-wa, Elpet Takarnarqellriami,” Shimei-aq kiuguq. “Wiinga qanllerpetun piciqua.” Taumek Jerusalem-aami uitamauq ak'anun.

³⁹Tau͡gaam allrakut pingayun kinguatni, malruk Shimei-am teguak ayakallruuk Gath-armiut angayuqratnun, Achish-aq qetunraa Maacah-m. Shimei-am niitellermini Gath-amluciak,

⁴⁰aqumgavilirraarluku ciulvani ayagtuq Angayuqamun Achish-aamun Gath-ami, kiarrnalukek teguagni. Nataqak-llu ut'rullukek-llu.

⁴¹Solomon-aam niicamiu Shimei-am pillra,

⁴²aqvavkarluku qanrutaa, “Akqivkallruamken atrakun ATANREM ayaasqevkenak Jerusalem-aamek. Aarcirtullruamken-llu tuaten pikuvet, ilumun tuquarkauniluten. Maligutellrunrituten-qaa qanerluten-llu niiciiqnilua?

⁴³Ciin-mi tua-i navegciu akquten narurrluku-llu alerquuteka?

⁴⁴Elpet nallunritqapiararan tamalkuan narurcillren atamnek David-aamek. ATANREM anucimirqecetaarciqaaten tamana pitekluku.

⁴⁵Tau͡gaam atawaqerceciiqaanga wiinga, elliin-llu David-aam angayuqauvia asvairiciqaa akwarpak.”

⁴⁶Tua-llu angayuqam ellimerrutminek cikiraa Beniah, anluni-llu tuqutaa Shimei-aq. Solomon-aam tua-i waniwa piyullni atuqapiarangaa.