Read Yupik 1 Kings 20 Bible Online

1 Kings 20 - Yupik bible

1 Kings 20

¹Angayuqam Benhadad-aam Syria-mek quyurtai tamalkuita anguyagten̄i; yuinaq-llu qula malrugnek cipluku (32) angayuqat pillgutkaat, horse-at, ekumassuutet-llu akalrialget, mayurluni-llu kassugutaa Samaria-q, curugluku-llu.

²Qanerten̄ek-llu ayagceciuq nunarpagmun Angayuqamun Ahab-amun, Israel-aarmiumun qanrutesqelluku, “Angayuqaq Benhadad-aaq piteklirtuq,

³pegcesqelluki ellminun qerrirliuteten suulutaaruteten-llu, arnauteten pininqurrait-llu mikelnguvet.”

⁴“Qanrusgu ataneqa, Angayuqaq Benhadad-aaq, wiinga maligutua; piksugnganga piutenka-llu tamalkuita,” Ahab-aq kiuguq.

⁵Wanikuan kevgat ataam taigut Ahab-amun allamek piyuuterluteng Benhadad-aamek: “Ayagcecillruunga qanermek elpenun taicesqelluki qerrirliuteten suulutaaruteten-llu, arnauteten mikelnguuteten-llu.

⁶Tuaten pingraan ayagceciciqua pisten̄ek elpenun unuaqu mat'um nalliini, ellaita-llu yuarciqaat elpet enen enait-llu pistevvet, teguciqait-llu cat ellmeggni qelegnarqelriit. Unuaqu tamaanciiqut waten erenrem pitarillran nalliini.”

⁷Angayuqam-llu Ahab-am taisqai tamalkuita ciulirneri nunam, qanerluni-llu, “Tangerciu una angun wangkutnek navguriyulria. Qanermek taicetaanga teguiyuglua nuliamnek irniamnek-llu, qerrirliutenka suulutaarutenka-llu, wiinga-llu maligtaquaqa.”

⁸Ciuliqagtet yuut-llu kiugut, “Niicugninrilgu; maligarcaqunaku.”

⁹Tua-i Ahab-aq qanertuq kevgainun Benhadad-aam, “Qanruciu ataneqa angayuqaq ‘Tamalkuan ciuqliq kaigatellren pistevgun piciqaqa; kinguqlia tau͡gaam maligcesciigataqa.’” Kevgat-llu ayagtut ataam-llu utertut allamek qanerkarluteng

¹⁰Benhadad-aamek: “Taiciciqua navgurtekaanek uum nunarpagpet ayauciiqait-llu teggalqut navguumalriit. Agayutet nirlua tuquskilitnga pinrilkuma!”

¹¹Angayuqaq Ahab-aq kiuguq, “Qanrusgu Angayuqaq Benhadad-aaq anguyagtepiaq-gguq tang tau͡gaam ucuryagtaalalria anguyanriraqata, ciungani pivkenani.”

¹²Benhadad-aam niitaa Ahab-am kiutii ilini-llu, allat-llu ataniurtet, merainanermeggni pelatekameggni. Anguyagten̄i ellimerrai upcesqelluki curullerkaatnun nunarpak, taumek uitallerkameggnun uptut.

¹³Taum nalliini, prophet-aam ullagluku Angayuqaq Ahab-aq qanrutaa, “ATANEQ qanertuq, ‘Alingenrilu anguyagterugarnek! Cirlakivkarciqamken ernerpak, nallunrirciqan-llu Wiinga ATANRUCIQA.’”

¹⁴“Kia ciuliqagciiqaki curulriit?” Ahab-aq aptuq. Prophet-aaq kiuguq, “ATANEQ qanertuq ayagyuanun anguyagten̄un piciqniluki atanerruarluteng nunat avgumalriit atanritnek.” “Kia ayagnirciqau callullrat?” angayuqaq aptuq. “Elpet,” prophet-aaq kiuguq.

¹⁵Tua-i angayuqam qayagaurai ayagyuat anguyagtet nunat avgumalriit atanerruaritnek ataniumalriit, yuinaat qulen yuinaq qulmek cipluku malruk-wa (232). Tua-i-llu cali kinguatgun quyurtai tamalkuita Israel-aam anguyagtai, quyurmeng tiissitsaaruluteng malrunlegen (7,000).

¹⁶Curullrat ayagnirtuq erenrem qukallrani, Benhadad-aankut iliini-llu yuinaq qulmek cipluku malruk-wa (32) taangiq'ngellratni pelatekameggni.

¹⁷Ayagyuat anguyagtet ciumek ayagtut. Ciunrirturtait ayagcetellri Benhadad-aam qaneryarturtut quyurmeng anguyagten̄ek anelrianek Samaria-mek.

¹⁸Ellimerrutai, “Unguvaita tegukiciki, callugyarturluteng taingraata wall'u nepaitmek iliirangraata.”

¹⁹Ayagyuat anguyagtet ciuliqagtaat curullrat, kinguqlirluteng Israel-aat anguyagtaitnek,

²⁰tamarmeng callukengateng tuqurqait. Syrian-aat qimagtut, Israel-aat kingunrirtuqait, tau͡gaam Benhadad-aaq qimagtuq horse-akun, maligluni anguyagtet ilaitnek.

²¹Angayuqaq Ahab-aq ayakartuq naucirivigmun, tegui-llu horse-at anguyagcuutet-llu akalrialget, anucimirqecetaarluki-llu tuknilriamek cirlakai Syrian-aat.

²²Tua-llu prophet-aam ullagluku Angayuqaq Ahab-aq qanrutaa, “Uterrluten pinircarki anguyaten picirkiunqegcaarluten-llu, up'nerkanqigeskan atanra Syria-m curunqigciiqngan.”

²³Angayuqam Benhadad-aam atanerruarin qanrutaat ellii, “Agayutait Israel-aam ingrit agayutkait, taumek Israelite-at cirlakekaitkut. Tau͡gaam cirlakenrilngaitaput callukumteki manigcetellriami.

²⁴Wanirpak kitak, au͡g'arciki yuinaq qulmek cipluku malruk-wa (32) ataniurtet elkaringallratnek cimirluki-llu yuilqumi ataniurten̄ek.

²⁵Quyurciluci-llu anguyagten̄ek amllertataitnek cagmallerpeci, amllertataitnek-llu horse-at ekumassuutet-llu akalrialget. Callugciqaput Israelite-at manigcetellriami, nutaan-llu tuani cirlakciqaput.” Angayuqaq Benhadad-aaq umyuallguciutuq maliggluku-llu picirkiuraat.

²⁶Up'nerkanqigcan quyurtai anguyagten̄i arulaiqsaunateng-llu ayallratni maligtai nunarpiinun Aphek-aam curugyarturluki Israelite-at.

²⁷Israelite-at qayagaurumaut anguyagcuutait upingaluteng; quyurmeng ayagtut arulaiqsaunateng, quyurmeng-llu malruirrluteng elkartut caumaluki Syrian-aat. Israelite-at tangellrat ayuqluni malruuluteng quyungqakuinalriatun qusngirngalngurcetun mumiggluku Syrian-aat tangellrat, ellait tamalkuan manigcetellriami sagingaluteng.

²⁸Prophet-aam ullagaa Angayuqaq Ahab-aq qanerluni-llu, “Waten qanertuq ATANEQ: ‘Tua-i-wa Syrian-aat qanrata wii qeminun agayuteknilua manigcetellriamun pivkenii, cirlakutmek cikirciqamken anguyagterugaitnun, elpet-llu yut'en-llu nallunrirciqerci wiinga ATANRUCIQA.’”

²⁹Ernerni malrunlegni Syrian-aat Israelite-at-llu uitaurtut elkarrvillermeggni, caumauraulluteng. Erenret malrunelgatni callulteng ayagniraat, Israelite-at-llu tuquciut yuinarnek tallimanek tiissitsaanek (100,000) Syrian-aanek.

³⁰Tuqutenritqallrit qimagaugut nunarpiinun Aphek-aam, tuani-llu qacarnerem ayaluqerrvikai yuinaq malrunlegnek tiissitsaat (27,000) angutet uitaqallret. Benhadad-aaq-llu qimagtuq nunarpagnun iirluni-llu iluqlikacagiinun enem.

³¹Atanerruarin ullagluku qanrutaat, “Niitellruukut atanrit Israel-aat takumcutarniluki. Piunarqucimek cikirkut ayagniartukut atanratnun Israel-aat missuullernek all'uta qukamteggun uyaquput-llu ilavkugnek nemerluki, aipaagni unguvavkaryuaraten.”

³²Tua-i missuullernek nemertut qukamegteggun, uyaquteng-llu ilavkugnek nemerluki, ayagluteng-llu Ahab-amun qanertut, “Elpet pistevvet Benhadad-aam takumcuca'arvikaaten unguvaminek.”

³³Benhadad-aam atanerruari murilku'rtut assilriamek piunarqucimek, Ahab-aq-llu waten qanellrani “anelguun,” egmian quyaqertut, qanerluteng-llu, “Ilumun qanrucirpetun, Benhadad-aaq anelgutkan!” “Taiciu wangnun,” Ahab-aq ellimerriuq. Tua-i-llu Benhadad-aaq tekican, Ahab-am unayaqaa ekumassuutmi akalrialegmi pillguciisqelluni.

³⁴Benhadad-aam-llu qanrutaa, “Nunarpiit atama tegullri atavnek wii kitugciiqanka ayuqucillricetun, elpet-llu tuneniarvignek piurciniartuten Damascus-aami, pillruciatun atama Samaria-mi.” Ahab-aq-llu qanertuq, “Tuaten piarkaurcavet, kitaki, wiinga pegciiqamken.” Akqut'lirraarluni tua-i elliinun ayagcetaa.

³⁵ATANREM pisqutii maliggluku prophet-aat iliita prophet-aarullgutni pia tengluusqelluni. Tau͡gaam taum piyuumiitaa,

³⁶taumek qanrutaa, “Waniwa elpet narurcavgu ATANREM pisqutii, yugtutulim tuquciiqaaten egmian uniskuvnga.” Ayauciatun-llu tua-i yugtutulim pairrluku tuqutaa.

³⁷Tua-i-llu taum im'um prophet-aam alla angun ullagluku pia, “Tenglugnga!” Angutem-llu tuaten pia; tengelpagluku akngirrluku-llu.

³⁸Prophet-aam kegginani nemraa 'lumarrarmek, nallunarcarluni ellminek, ayagluni-llu nangerngaurtuq tumyaram mengliini, kitullerkaa Israel-aam atanran utaqaluku.

³⁹Tua-llu ataneq kituan, prophet-aam qayagauraa qanerluni-llu, “Elpet Ucurnarqellriami, calluinanemni anguyautellriani anguyagtem taitaanga angutmek teguaminek inglumten̄ek qanerluni-llu, ‘Murilkiu una angun; ayakaqan akilirciqan unguvavnek wall'u akiliciluten pingayunek tiissitsaanek (3,000) qerrirlinek.’

⁴⁰Tau͡gaam allanek-llu yagarcelama tauna angun ayakalliniuq.” Angayuqaq kiuguq, “Elpenek tua-i picirkirtuten, akiliutii-llu aturarkaurtan.”

⁴¹Prophet-aam au͡g'artaa 'lumarraq kegginaminek, egmian-llu atanrem elitaqaa prophet-aanun ilakucia.

⁴²Prophet-aaq-llu nutaan qanertuq atanermun, “Man'a qanelqaa ATANREM: ‘Tua-i-wa yuk tauna anagcecavgu ellimertuutelqa tuqutesqelluku, unguvavnek akiliciiqan, anguyagteten-llu piunriumaciqut anguyagtai ayakarluki anagcecavki.’”

⁴³Angayuqaq-llu utertuq nunaminun Samaria-mun, umyuarrlugcarluni angniinani-llu.