Read Yupik 1 Kings 21 Bible Online

1 Kings 21 - Yupik bible

1 Kings 21

¹Jezreel-ami mallgeskiini Angayuqam Ahab-am atanruvian naucetaarvigtangqertuq wine-arkanek pikesterluni angutmek Naboth-aamek at'legmek.

²Erenret iliitni Ahab-am pia Naboth-aaq, “Cikirnga wine-arkanek naucetaarvigpenek, canimetuq atanruvimnek, aturniarqa naunrarnek nauceciivikluku. Cikirniamken assinranek wine-arkanek naucetaarvigmek, wall'u assikenrukuvgu, akilirluten pitalqeggiluku akia.”

³“Paiciutekellruaqa una wine-arkanek naucetaarvik ciuliamnek,” Naboth-aaq kiuga'rtuq. “ATANREM inerquutekliu agurrlugmek elpenun pikevkaasqevkenaku!”

⁴Ahab-aq-llu eneminun utertuq angniinani qenerrluni-llu pitekluku qanellra Naboth-aam ellminun. Inartuq ingleminun, qacarneq cauluku, neryuumiinani-llu.

⁵Tau͡gaam Jezebel-aam nulirran ullagaa, qanrulluku-llu, “Ciin anerneren kanevvlugpakarta? Ciin neryuumiicit?”

⁶Elliin-llu kiugaa, “Tua-i-wa qanellra Naboth-aam wangnun pitekluku. Qanrucaaqaqa kipucugluku wine-arkanek naucetaarvia wall'u, assikenrukaku, allamek naucetaarvigmek cikirluku, tau͡gaam pianga wangnun pikngaitniluku!”

⁷“Atanruuten-qaa wall'u piuvkenak?” Jezebel-aaq piuq. “Makluten inglernek, angniringnaqluten neri. Wiinga unanguciiqamken Naboth-aam naucetaarvianek wine-arkanek!”

⁸Arnaq-llu igartuq iganek Ahab-am atranek sign-araqluki, takarnarqucirluki-llu takarnarcautiinek, ayagtelluki-llu atanerruarinun ciulirnerinun-llu Jezreel-am.

⁹Igai qanerluteng: “Nallunairici ernermek yagyaramek, yuut-llu quyurceqaarluki nasvagici Naboth-aamun takarnarqutmek.

¹⁰Elgarciluci-llu angutegnek malrugnek umyuarrliqellriignek picilirtelluku takuani aniqlaallruniluku Agayun angayuqaq-llu. Tua-i-llu anulluku nunarpagnek teggalqutgun-llu tuqulluku.”

¹¹Atanerruari-llu ciulirneri-llu Jezreel-am qanruciatun Jezebel-aam ellmeggnun piut.

¹²Apertuigut ernermek yagyaramek, yuut-llu quyurtelluki, Naboth-aamun-llu takarnarqutmek nasvagiluteng.

¹³Malruk-llu umyuarrliqellriik yuut takuatni piciliraak aniqlaallruniluku Agayun angayuqaq-llu, tua-i anutaat elatiinun nunarpiim, tuqulluku-llu teggalqutgun.

¹⁴Tua-llu ayagceciut Jezebel-aamun qanerluteng, “Naboth-aaq tuqucimauq.”

¹⁵Tamaa Jezebel-aam niicamiu qanrucesten̄i, qanertuq Ahab-amun, “Naboth-aaq tuquuq. Kitaki ayagluten piksagucarturru wine-arkanek naucetaarvik elpenun tuneniaqsuumiitellra.”

¹⁶Ahab-aq egmian ayagtuq wine-anek naucetaarvigmun piksagucarturluku.

¹⁷Tua-llu ATANEQ qanertuq Elijah-mun Prophet-aamun Tishbe-mek,

¹⁸“Angayuqamun Ahab-amun ayii Samaria-mi. Naboth-aam wine-arkanek naucetaarviani nalaqeciqan, piksaguteqatarluku.

¹⁹Qanrutniaran Wiinga-gguq, ATANERMI, qanrutaqa, ‘Tuquqaarluku-qaa angun, piksaguteqataran-llu piutii?’ Qanruskiu Wii waten qanernilua: ‘Tuani qimugtet pairvillratni Naboth-aam auganek elpet-llu augpenek pairciqut!’”

²⁰Ahab-am tangrramiu Elijah, qanertuq, “Anguavnga-qaa, inglumaa?” “Aa-ang”, kiuguq Elijah, “Elpet cumigtuten assiitellriamek calinaluten ATANREM tangerqiini.

²¹Taumek ATANEQ qanertuq elpenun, ‘Tangerrluku assiitellria elpenun pivkarciqaqa. Catairuceciiqamken tamalkuita-llu angutet nakmiin ilavni perrirciqanka, ayagyuat ak'allaurtellriit-llu ayuqluki.

²²Ilaten ayuqliriciqut ilaitun Angayuqam Jeroboam-aam qetunraan Nebat-aam, ilaitun-llu Angayuqam Baasha-m qetunraan Ahijah-m, ayagnercavgu qenertelqa ciuliqagtellerpegun Israel-aam yui assiilngillerkaatnun.’

²³Jezebel-aamun-llu cali piuq, ATANEQ qanertuq, ‘Qimugtet nerciqaat Jezebel-aam temii nunarpiini Jezreel-am.

²⁴Ilakutarpet iliit tuqulria nunarpagmi qimugtet nerciqaat, iliit-llu tuqulria yuilngurmi nunami yugtutulit yaqulget-llu nerciqaat.’”

²⁵(Kitumek cumigtellriartaituq assiilngurmek aturnaluni tangvallrani ATANREM Ahab-atun, Jezebel-aakun nulirrakun eguaquumallermek.

²⁶Ellii atullruuq kasngunarqeqapigtellriamek assiilngurmek agayulallermikun agayutnguanun, Amorite-at pilallracetun, ATANREM antellrin nunamek Israel-aam yui agiirrnginanratni.)

²⁷Elijah qanenermek taqngan, Ahab-am aturani allgurai, missuullernek-llu all'uni. Neqmek qessakiluni, qavaraqluni-llu aturluni missuullernek, pektaqluni-llu angniinani kanavirrluni.

²⁸ATANEQ qanertuq Elijah-mun,

²⁹“Tangrran-qaa Ahab-aq ellmikutuurtellria ciuqamni? Waten pian, assiitellria tuc'essngaitaqa elliinun unguvaqallrani, tau͡gaam qetunraan unguvallrani tuc'eciiqaqa cangerlak Ahab-am ilainun.”