Read Yupik 1 Kings 22 Bible Online

1 Kings 22 - Yupik bible

1 Kings 22

¹Uitanqegcitangqellruuq Israel-aam Syria-m-llu akuliik malrugni allrakugni,

²tau͡gaam allrakut pingayuatni Angayuqam Jehoshaphat-am Judah-rmium ullagaa tangerrsarturluku Angayuqaq Ahab-aq Israel-aarmiu.

³Ahab-am aptai atanerruani, “Ciin tua-i wangkuta tegunqigtellerkaa qaillukuaqsaiceta Ramoth-aaq Gilead-aami angayuqaanek Syria-m? Wangkuta pikarput!”

⁴Ahab-am tua-i Jehoshaphat-aq aptaa, “Maligcugngaarpenga-qaa curugyarturluku Ramoth-aaq?” “Upingaunga piyugngarikuvet,” Jehoshaphat-aq kiuguq, “tamarmeng-llu anguyagtenka kuunitgun-llu callutulit.

⁵Tau͡gaam ciumek ATANEQ apelcirraaqerlaut.”

⁶Tua-i Ahab-am qayagaurluki itercetai prophet-aat, nuniini yuinaq yuinaq (400) amllertalriit, apluki-llu, “Ayaglua-qaa curuglaku Ramoth-aaq, wall'u-qaa pinrillaku?” “Curuggu,” taukut kiugut. “ATANREM cirlakivkarciqaaten.”

⁷Tau͡gaam Jehoshaphat-aaq aptuq, “Allamek-qaa prophet-aartangqertuq elliikun apelciryugngastiinek ATANEQ?”

⁸Ahab-aq kiuguq, “Ataucimek pitangqertuq, Micaiah-mek qetunraanek Imla-m. Tau͡gaam wii cakneq eq'ukaqa assilriamek ciunerkamnek ap'ricuilanga; assiitellriarrlainautuuq.” “Tuaten qanernarqenritaaten!” Jehoshaphat-aq qanlertuq.

⁹Ahab-aq tua-i itresqiuq qanercetaarviim atanerruaranek qanrulluku-llu ayagluku Micaiah-q wanirpak aqvasqelluku.

¹⁰Malruk angayuqak, aturiumalutek ucurnarqellrianek ulikutamegnek, aqumgauk atanruvigni aqumllemegni kepliarivigmi elakariini ikirtuqaan Samaria-m, prophet-aat-wa tamarmeng ciuqerragni nallunairiqulriik.

¹¹Iliit, Zedekiah-m qetunraa Chenaanah, piliuq caviignek cirunregnek qanerluni-llu Ahab-amun, “Waten ATANEQ qanertuq: ‘Ukugnek aturluten Syria-rmiut callugciqaten tamalkuita-llu nangqapiarluki cirlakluki.’”

¹²Allat-llu tamarmeng-llu prophet-aat qanertut tuaten. “Ayagci pairrluku Ramoth-aaq anagciquci,” ellait qanertut. “ATANREM cirlakivkarciqaaci.”

¹³Taum nalliini, atanerruam Micaiah-m aqvastiin qanrutaa, “Allat tamarmeng prophet-aat ap'ritaat elluamek angayuqaq, elpet-llu tuaten pimikina.”

¹⁴Tau͡gaam Micaiah-q kiuguq, “Unguvalriakun ATANERKUN akqiunga qanrarkaulua elliin qanresqellranek!”

¹⁵Igvaan Angayuqam Ahab-am ciuqerranun, angayuqam aptaa, “Micaiah, wangkuk-qaa Angayuqaq-llu Jehoshaphat-aaq ayaglunuk curuglauk Ramoth-aaq, wall'u-qaa pinrilluk?” “Curugtek!” Micaiah kiuguq. “Anagkengciqutek. ATANREM cirlakivkarciqaatek.”

¹⁶Tau͡gaam Ahab-aq qanertuq, “Qanrutaqavnga ATANREM atrakun, piciulriamek qanlaa! Qavcirqunek mat'umek qanrutqatarcia?”

¹⁷Micaiah kiuguq, “Tangerrsugngaanka anguyagtai Israel-aam sagingaluteng qemit qaingatni qusngitun qusngiliurtailngurtun. ATANEQ-llu qanertuq, ‘Ukut anguyagtet ciuliqagtaitut; utertevkarki nepaitnakun.’”

¹⁸Ahab-am qanrutaa Jehoshaphat-aq, “Qanrutellrunritamken-qaa ciunerkamek ap'ricuitnilua assilriamek? Assiiterrlainatuut!”

¹⁹Micaiah-llu cali qanertuq, “Kitaki niicugniu ATANREM qanellra! Tangrraqa ATANEQ aqumgaluni atanruvimini qilagmi, tamarmeng an'gilai nangerngaluteng caniani.

²⁰ATANEQ aptuq, ‘Kia iqluuryartau Ahab-aq ayagluni tuqutaullerkaanun Ramoth-aami?’ Ilait an'gilat camek qanertut, ilait-llu cali camek allamek qanerluteng,

²¹piqerluni anerneq ciuqerratnun amllirtuq, ullakanirluku ATANEQ, qanerluni-llu, ‘Wiinga iqluurciqaqa.’

²²‘Qaillun?’ ATANEQ aptuq. Anerneq qanertuq, ‘Ayaglua Ahab-am prophet-aari tamalkuita iqluquvkaqataranka.’ ATANEQ qanertuq, ‘Ayagluten iqluuryarturru. Unakeciqan.’”

²³Micaiah-llu nangnermek qanertuq: “Waten pillruuq. ATANREM ukut prophet-aaten iqluvkarai elpenun. Tau͡gaam elliin tungaunani pillerkiraaten narurcunailngurmek elpet arenqiallugutmun tekiciiqniluten!”

²⁴Tua-i-llu prophet-aam Zedekiah-m ullagaa Micaiah, qacarrluku-llu kegginaakun, apluni-llu, “Qangvanirnek ATANREM anerneran unillua qalarucaurtaten?”

²⁵“Nallunrirciqan nani enem kiaqlianun iiryartuquvet,” Micaiah qanertuq.

²⁶Tua-i-llu Angayuqam Ahab-am ellimerraa narurcunailngurmek atanerruami iliit, “Teguu Micaiah ayaulluku-llu Amon-aamun, nunarpiim angayuqauvianun, Angayuqam-llu qetunraanun Joash-amun.

²⁷Qanrulluki itercesqelluku itercivigmun kiingan kelipamek mermek-llu neqirluku cavkenii uterrnatkamnun.”

²⁸“Cavkenak-wa ut'reskuvet,” Micaiah-llu qanlertuq, “ATANEQ wangkun qaneqsaituq!” Ilaluku-llu, “Niiciu, tamarpeci, wiinga qanelqa!”

²⁹Tua-i-llu Angayuqaq Ahab-aq Israel-aanek, Angayuqaq-llu Jehoshaphat-aq Judah-mek ayagtuk curugyarturluku nunarpii Ramoth-aam Gilead-aami.

³⁰Ahab-aq qanertuq Jehoshaphat-aamun, “Anguyagmun ullautellmegni, nallunarcarciqua, tau͡gaam elpet aturaten angayuqaussuutet aturciqaten.” Tua-i angayuqrat Israel-aat anguyagmun ullautuq nallunarcaumaluni.

³¹Angayuqran Syria-m alerqullrui yuinaq qulmek cipluku malruk-wa (32) akalrialget anguyagcuutet atanerruarit alla curuusqevkenaki angayuqra tau͡gaam Israel-aam.

³²Tua-i tangllermeggni Angayuqaq Jehoshaphat-aq, tamarmeng umyuartequt angayuqaqsukluku Israel-aamun, caqirtut-llu curugnaluku. Tau͡gaam qayagpallrani,

³³taringaat angayuqaqenrilucia Israel-aamun, curulteng-llu arulairaat.

³⁴Naspaaluni Syria-rmiu anguyagta pitgartuq pitegcautmek nall'arrluku Angayuqaq Ahab-aq akngircailkutiin arivnerakun. “Akngirtua!” qayagpagtuq anguyagcuutmi akalrialgek alulartiignun. “Uterrluten anguyagmek ani!”

³⁵Anguyak tamalkisngallrani, Angayuqaq Ahab-aq nangerngaurtuq anguyagcuutegmi iluagni, Syria-rmiut caumaluki. Auga-llu ekianek qurrlurtu'rluni natra patua anguyagcuutek akalrialgek, atakuyartullrani-llu tuquuq.

³⁶Akertem teviryartullrani ellimerrun ayagtuq Israel-aat anguyagtaitgun: “Tamarpeci nakmiin nunavcen̄un nunarpavcen̄un-llu uterci!”

³⁷Tua-i Angayuqaq Ahab-aq tuquuq. Temii-llu ayaucimauq Samaria-mun tungmagcimaluni-llu.

³⁸Anguyagcuutek-llu akalrialgek eruragket nanvarrariini Samaria-m, tuani qimugtet auga pairaat akissut-llu tuavet erurluteng, ATANREM qanrutkellruciatun tuaten piciqniluku.

³⁹Cat tamalkuita allat Angayuqam Ahab-am callri, ilakluku-llu igausngaluni elliin atanruvia tangnircaumallra tulunek, tamalkuita-llu nunarpiit nautellri, igauquraumaut Ayuqucillrat Angayuqrin Israel-aam.

⁴⁰Tuqullran nalliini qetunraan Ahaziah-m cimillrua angayuqrurrluni.

⁴¹Allrakut cetamaurtellratni ataniurillran Angayuqam Ahab-am Israel-aami, Jehoshaphat-aq qetunraa Asa-m angayuqrurtuq Judah-mi

⁴²allrakungluni yuinaq akimiarmek cipluku (35), atanirturiluni-llu allrakuni yuinaq tallimanek cipluku (25). Aanii Azubah-uluni, pania Shilhu-m.

⁴³Atami pillratun Asa-m ciumini, piciuluni calillruuq ATANREM tangvallrani, tau͡gaam agayuvikelallrit navguumallrunritut, yuut-llu cimirpek'nateng cali elliigaqluteng ekuagarkanek, puyiararaqluteng-llu narnirqellriamek tuani.

⁴⁴Jehoshaphat-aaq uitanqegcinarqellruuq angayuqranun Israel-aam.

⁴⁵Cat tamalkurmeng Jehoshaphat-am callri, cacetullra anguyallri-llu, igauquraumaut Ayuquciitni Angayuqrin Judah-m.

⁴⁶Au͡g'allrui-llu tamalkuita angutet arnat-llu akissut agayumanrilnguut ekuaviatni kevgiulalriit atani Asa angayuqaullrani cali tamaantelallret.

⁴⁷Nunii Edom-aam angayuqritellruuq; angayuqran Judah-m ellimellranek atanirturisqelluku ataniurterluni.

⁴⁸Angayuqaq Jehoshaphat-aaq imarpigtaatulinek sun'anek pingqellruuq piliaqumaluteng tengalralararkauluteng nuniinun Ophir-aam suulutaassaagluteng; tau͡gaam picurlagluni navgullruluni Eziongeber-aami tua-i-llu tengalranqigtevkenani.

⁴⁹Tua-llu Angayuqam Ahaziah-m Israel-aani tunyaaqai anguyagten̄i tengalrallguciisqelluki Jehoshaphat-m anguyagtai, tau͡gaam ciuniunritaa piyullra.

⁵⁰Jehoshaphat-aq tuquuq qunguucimaluni-llu atanruviim qungurviinun David-aam Nunarpiini, qetunraan-llu cimiraa angayuqrurrluni.

⁵¹Allrakut akimiaq malrugnek (17) cipluku nalliitni atanirturillran Angayuqam Jehoshaphat-am Judah-mi, Ahaziah Ahab-am qetunraa angayuqrurtuq Israel-aami, atanirturiluni-llu Samaria-mi allrakugni malrugni.

⁵²Assiilngirtuq ATANREM takuani, maliggluku umyuarrliqluni alerquallra atami Ahab-am, aanami Jezebel-aam, Angayuqam-llu Jeroboam-aam, ciuliqagcilleq Israel-aamek assiilngurmun.

⁵³Agayuvikaqluku kevgiullrua Baal-aq, atami-llu pillratun ciumini, eq'uqercetaa ATANEQ, Agayutii Israel-aam.