Read Yupik 1 Kings 4 Bible Online

1 Kings 4 - Yupik bible

1 Kings 4

¹Solomon-aaq angayuqaqellrua tamarmi Israel-aam,

²ukut-llu quyilriaruluteng elliin atanerruaqellrui: Agayulirta: Azeriah qetunraa Zadok-am

³Qanercetaarviim igartai: Elihoreph-aankuk Ahijah-llu, qetunraak Shisha-m Kalikaat igausngalriit qaunqestiit: Jehoshaphat-aaq qetunraa Ahilud-aam

⁴Atanerruarat anguyagtet: Benaiah qetunraa Jehoiada-m Agayulirtet: Zadok-ankuk Abiathar-aq-llu

⁵Ciuliqagtiit nunat allakaqtaarluteng atanerruarita: Azariah qetunraa Nathan-aam Angayuqamun Alerquagista; agayulirta Zabud-aaq qetunraa Nathan-aam

⁶Ataniurtiit atanruviim kevgain: Ahishar-aq Ataniurtiit calivkaumalriit: Adoniram-aaq qetunraa Abda-m

⁷Solomon-aaq cucuklirtuq qula malrugnek cipluku (12) angutnek nunat allakaqtaarluteng atanerruarkaitnek. Nunameggnek neqkangqercetarkauluku angayuqaq enelgutai-llu, iralumi ataucimi allrakum iluani angun atauciq cikiqengaqluni.

⁸Ukut wani-wa atrit taukut qula malrugnek cipluku (12) atanerruat nunat-llu allakaqtaarluteng ataniuqengait: Benhur-aq: qemililria nunii Ephraim-aam

⁹Bendeker-aaq: nunarpai Makaz-am, Shaalbim-aam Beth Shemesh-aam, Elon-aam, Beth Hanan-aaq-wa

¹⁰Benhesed-aaq: nunarpai Arubboth-aam Socoh-llu tamalkuan-llu nunautii Hepher-aam

¹¹Benabinadab-aaq, kassuusngalria Solomon-aam panianun Taphath-amun: Tamalkuan nunautii Dor-am

¹²Baana-q qetunraa Ahilud-aam: nunarpai Taanach-aam, Megiddo-m, tamalkuan-llu nuna mallgeskiini Beth Shan-am, mallgeskiini nunarraam Zarethan-am, ungalalirnerani nunarraam Jezreel-am, yaaqsingraan tekilluku nunarpii Abel Meholah-m nunarpii-llu Jokmeam-aam

¹³Bengeber-aaq: nunarpii Ramoth-aam Gilead-aami, nunacuaraat-llu Gilead-aami pikestelget ilakellriartainek Jair-am, Manasseh-m kinguvran, nunautii-llu Argob-am Bashan-aami, yuinaat pingayun (60) nunarpacuaraat quyurmeng, cayailkuciumaluteng qacarnernek punernernek-llu naparyiumalrianek ikirtuqarluteng

¹⁴Ahinadab-aq qetunraa Iddo-m, nuniini Mahanaim-am

¹⁵Ahimaaz-aq, kassuutelleq Basemath-aamun, Solomon-aam paniin iliit: nunautii Naphtali-m

¹⁶Baana qetunraa Hushai-am: nunautii Asher-aam nunarrii-llu Bealoth-aam

¹⁷Jehoshaphat-aaq qetunraa Paruah-m: nunautii Issachar-am

¹⁸Shimei-aq qetunraa Ela-m: nunautii Benjamin-aam

¹⁹Geber-aaq qetunraa Uri-m: nunautiini Gilead-aam, atanirtuumalleq Angayuqakun Sihon-akun Amorite-anek Angayuqakun-llu Og-akun Bashan-aarmiukun Ukut-llu qula malrugnek cipluku avatiitgun, ataucimek nunam atanerruaranek pitangqertuq.

²⁰Judah-nkuk Israel-aaq-llu yuk'ek amlleriqapiartut kavyaitun qau͡gyam imarpiim cen̄iinelngurtun; ner'ut merluteng-llu, angnirluteng-llu.

²¹Solomon-aam atanruvian ilakai tamalkuita angayuqauvillgutkelriit Euphrates-aam Kuiganek tekilluku Philistia-q Egypt-aam-llu engeliinun. Taukut akiliqurautnek akilicivik'laraat niisngaluku-llu unguvallran taktaciatun.

²²Aturyulallri Solomon-aam erenret tamalkuita piut: yuinaat malrunlegen qulmek cipluku cuqet (150 bushels) miilimalriamek mukaamek yuinarnek-llu akimiarnek (300 bushels) mukaarkanek.

²³Qulnek nerqevvigteggun nerqumalrianek kuluvagnek, yuinarnek tallimanek (100) qusnginek, avatiitgun tuntut, tuntuyagaat, angucaluyagaat, yaqulget-llu.

²⁴Solomon-aaq ataniurillruuq tamalkuan nunami kanavalirnerani Kuigem Euphrates-aam, Tiphsah-mek ayagluni Euphrates-aami uitalriamek tekilluku kanavalirnermi Euphrates-aam nunarpii Gaza-q. Tamarmeng angayuqat kanavalirnerani Euphrates-aam elliinun yuliusngaut, ellii-llu uitanqegcitengqerrluni avaqliminun nunanun.

²⁵Unguvallran taktaciatun, yuut tamalkuan Judah-nkugni Israel-aami-llu uitaut alingniurutaunateng, yuungnaqellriit tamarmeng nakmiin pimeggnek wine-arkanek atsangtulinek-llu naucetaarvigluteng figs-aanek-llu naugitulinek napauterluteng.

²⁶Solomon-aaq yuinaagnek malrugnek tiissitsaanek (40,000) nerqivingqertuq ikamrarcuutminun horse-aanun qula-llu malrugnek tiissitsaanek (12,000) horse-aatgun anguyatulit kuuniitnun.

²⁷Elliin qula malrugnek (12) cipluku atanirturtai nunani, tamarmeng iralumi pillerkiumallermeggni, neqkiumalaraa Angayuqaq Solomon-aaq tamalkuita-llu nerlalriit atanruvigmi; pikiumarrlainarluki canek tamalkuitnek aturyukaitnek.

²⁸Tamarmeng-llu atanerruat mukaarkameng can'gutmeng-llu, ilaitnek avgut'larait nani piitaqata, ikamrat horse-aarit calissuutet-llu ungungssit pikaitnek.

²⁹Agayutem Solomon-aaq cikillrua ciungani tangrrumaksailngurmek elisngamek taringyuyaramek-llu, nallutaicaramek-llu cuqcimasciigalngurmek.

³⁰Solomon-aaq umyuartunruluni umyuartulriani calaramek wall'u umyuartulriarini Egypt-aam.

³¹Umyuartunqurrauluni tamalkuitni angutni: umyuartunruluni Ethan-aami Ezrahite-ami, Heman-aami-llu, Calcol-aami, Darda-mi-llu qetunraagkeni Mahol-aam, ucurnarqucia-llu cekavtuq tamiini angayuqauvignun.

³²Ellii piurcillruuq qanruyutnek tiissitsaanek pingayunek (3,000), tiitsitsaaq-llu (1,000) cipluku yuarutnek.

³³Qalarutkellrui napat naunraat-llu, Lebanon-aam napainek naunraat-llu qacarnermi nautulriit; qalarutkellrui ungungssit, yaqulget, ciissillraat, neqet-llu.

³⁴Angayuqat tamiini ellam iluani niitaat umyuartucia ayagceciaqluteng-llu yugnek niicugnisqelluku ellii.