Read Yupik 1 Kings 5 Bible Online

1 Kings 5 - Yupik bible

1 Kings 5

¹Angayuqam Hiram-aam Tyre-armium yugnikuratullrullinia David-aaq, niicami-llu Solomon-aamun atii David-aaq enaiqerniluku angayuqrurrluni, ayagceciuq cingilgulrianek elliinun.

²Solomon-aam kiugaa Hiram-aaq:

³“Elpet nallunritan anguyagturalallruata ataka David-aaq callugturalallruuq ingluminek avatmini, agayuvigpak naucesciiganaku agayularvigkani ATANERMUN Agayutminun ATANREM tau͡gaam cirlakevkaumarikaki inglui tamalkuita.

⁴Tau͡gaam watua ATANREM Agayutma cikiraanga uitanqegcitmek tamiinek avatemni. Inglukestaituq, aarnarqellriartaituq curukartekamten̄ek.

⁵ATANREM akqellrua ataka David-aaq, ‘Elpet qetunrarpet angayuqrurtarkama kinguvkun, caliaqeciqaa agayuvigpagkaqa.’ Waniwa-llu wii umyuamkun taqutua caliaqnaluku agayuvigpak agayularvigkaq ATANERMUN Agayutemnun.

⁶Taumek ayagceski pisteten Lebanon-aamun kep'iyartuutellua unailngurnek napanek cedar-aanek. Pistem̄a calillgucirciqait, akilirciqanka-llu pisteten qaillun elpet ap'rillerpetun. Nallunrilucirpetun, pistem̄a nalluat kepurineq napanek assirtaluteng pistevtun.”

⁷Hiram-aaq cakneq ilukegciuq Solomon-aam qanellranek niicami, qanerluni-llu, “Nanraumali ATANEQ unuamek umyuartulriamek David-aaq qetunrangevkallrucianek enairtekaanek atanrurrluni angtuamun angayuqauvillgutkelriamun.”

⁸Tua-i Hiram-aaq qanermek ayagceciuq Solomon-aamun: “Ciuniuraqa qanellren, wiinga-llu upingaunga pisqellerpetun. Cikiutekciqanka unailnguut napat cedar-aat nekevraartut-llu.

⁹Pistem̄a atrauciiqait napat Lebanon-aamek imarpigmun qillrulluki-llu quyurrluki angyarrlugkun atercetarkauluki sen̄akun natmun pisqumallerpenun. Tuani pistem̄a angiciiqait, pistevvet-llu qaunqeciqait tamaani. Elpenun tau͡gaam neqkaitnek pikiumasqumayaaqanka elpenun pistenka.”

¹⁰Tua-i Hiram-aam pikiraa Solomon-aaq unailngurnek napanek cedar-aanek nekevraartunek-llu piyullrinek,

¹¹Solomon-aam-llu pikirluku Hiram-aaq yuinarnek tallimanek tiissitsaanek (100,000) cuqnek mukaarkamek yuinaat-llu talliman tiissitsaat qulmek cipluki (100,000) gallon-aanek ecuilngurmek olive-aat uquitnek allamiaquaqan neqkaitnek pistain.

¹²ATANREM akqutni aturaa Solomon-aaq-llu cikirluku elisngamek. Nepaituq-llu Solomon-aankuk Hiram-aaq-llu akuliik, picirkamek-llu taqullutek atunem ellmegnun.

¹³Angayuqaq Solomon-aaq quyurciuq yuinaq qulmek cipluku tiissitsaanek (30,000) angutnek umyuateng aturpek'naku caliarkanek tamalkuan Israel-aamek,

¹⁴ellimerrluku-llu Adoniram-aaq murilkesten͞gusqelluku taukunun. Avegluki-llu pingasuirrluki qulnguluki tiissitsaaruqa'aqluki (10,000) angutet, atauciin uitaaqluteng ataucimi iralumi Lebanon-aami malrugni-llu iralugni kingunermeggni.

¹⁵Solomon-aaq cali pingqertuq yuinarnek cetamanek tiissitsaanek (80,000) angutnek qemililriami nunami qupuritulinek teggalqunek, yuinaat-llu pingayun qulmek cipluku tiissitsaanek (70,000) angutnek ayauqurtekaitnek,

¹⁶elkarciluni-llu tiissitsaanek pingayunek yuinarnek akimiarnek cipluki (3,300) qaunqestekaitnek alerquastekaitnek calillratni.

¹⁷Angayuqam Solomon-aam alerquuciatun qupuriaqluteng teggalquqegtaarnek angelrianek tusnganerkainek agayuvigpiim.

¹⁸Solomon-aankuk Hiram-aam-llu calistekegnek, angutet-llu nunarpiinek Byblos-aam, uptait teggalqut muriit-llu nautellerkaanun Agayuvigpak.