Read Yupik 1 Kings 6 Bible Online

1 Kings 6 - Yupik bible

1 Kings 6

¹Yuinaat yuinaq yuinaat-wa cetaman (480) allrakut kinguatni Israel-aam yui ayaggaanratnek Egypt-aamek, allrakut-llu cetamiitni Solomon-aam atanirturillran Israel-aanek, iralum aipaani, iraluani Zif-am, Solomon-aam ayagniraa caliaqluku Agayuvigpak.

²Ilua taktaluni yuinaat cetaman qulmek cipluku (90) it'ganernek, yuinaq qulmek cipluku (30) it'ganernek iqtutaluni, yuinaak-llu malruk tallimanek cipluku (45) it'ganernek quyigtaluni.

³Iteryaraq-llu enecuar ilututaluni akimiarnek it'ganernek yuinaq-llu qulmek cipluku (30) iqtutaluni, iqtutaciluku agayuvik.

⁴Qacarneri Agayuvigpiim ukineliumaluteng, nequkillruaqluteng elalirnerit ilulirnemeggni.

⁵Elalirnerni qacarnerni, avategkeni tunuani-llu Agayuvigpiim, pingayunek qullilegmek ilaluku piliaqumalriartarluni, qulliq atauciq malrunlegen avegmek cipluki (7 1/2) qertutaluteng.

⁶Tamarmeng aciqlikacaarmi enecuaraat malrunelgen it'ganret avegmek cipluki (7 1/2) iqtutaluteng, akunleqlirmi qullirmi qulngunrita'arnek (9) it'ganernek iqtutaluteng, qullik'acagaq-llu qulliq qula avegmek cipluku (10 1/2) it'ganernek iqtutaluteng. Qacarneri Agayuvigpiim tamalkuitni qullirni mamkillruluteng natermi, tua-i enecuaraat uitayugngaluteng qacarnermi ayagtaileng'e'rmeng.

⁷Teggalqut-llu atuqengait Agayuvigpak nautellermeggni upcimaluteng tuani uitaviatni, taumek mulut'uulrianek niitnaituq, piqertualrianek, wall'u allanek cavignek calissuutnek Agayuvigpak naucimallrani.

⁸Iteryaraq atlikackacagarmun enemun ungalalirnera'antuq Agayuvigpiim, mayuryarartarluni tunglianun qullirmun pingayuatnun-llu qullirmun egmirluni.

⁹Tua-i Angayuqam Solomon-aam qaqitaa piliaqellerminek Agayuvigpak. Qiliraa-llu teggucirluku muragpagnek tuskanek-llu unailngurnek cedar-aanek.

¹⁰Pingayunek qullilek ilatii, qulliit tamarmeng enet pingayunelgat it'ganret avguaqluku qertutaluteng, taqumaut elalirnernun qacarnerinun Agayuvigpiim, itusngaluteng-llu muragpagnun unailngurnun cedar-aanun ayagten̄un.

¹¹ATANEQ qanertuq Solomon-aamun,

¹²“Maligtaqukuvki tamalkuita picirkiutenka alerquutenka-llu, elpenun piciurciiqanka akqutellrenka atavnun David-aamun.

¹³Wiinga uitaciqua yum'a Israel-aat akunliitni wani Agayuvigpagmi piliaqek'ngavni, watqapik-llu unisngaitanka.”

¹⁴Tua-i Solomon-aam naulluku qaqivsiaraa Agayuvigpak.

¹⁵Ilulirnermi qacarneret pategciumaut unailngurnek muragnek tumarngalrianek natermek qilii tekilluku, nateq-llu piliaqumaluni muragnek pine-anek.

¹⁶Iluqlikacaaq encuar aprumalria Tanqinruqapiar, naucimauq tunulirnerani Agayuvigpiim. Taktaluni yuinaq qulmek cipluku (30) it'ganernek capkuciumaluni-llu unailngurnek tuskanek cedar-aanek natermek qilii tekilluku.

¹⁷Enecuar ualirnerani Tanqinruqapiaralriim taktauq yuinarnek pingayunek (60) it'ganernek.

¹⁸Unailnguut tumarneret cedar-aat tangnircaumaut nuussitgun naucetaanek mamtulrianek qeltelegnek naucetaanek-llu; tamarmi-llu ilua patumaluni unailngurnek muragnek cedar-aanek tumarnernek qaqilluni, teggalqut qacarnermi tangrruungairutelluki.

¹⁹Tunulirnerani Agayuvigpiim iluqliq enecuar piliaqumauq, ATANREM Akqutiin Yaassiigegken uitavigkaagnek.

²⁰Una iluqlikacaar ena taqumauq yuinaak malruk qulmek cipluku (30) it'ganernek taktaluni, yuinaak malruk qulmek cipluku (30) iqtutaluni, quyigtaluni-llu yuinaak cali malruk qulmek cipluku (30), tamarmi qallircimaluni suulutaamek. Ekuavik qallircimauq unailngurnek muragnek cedar-aanek tumarngalrianek.

²¹Ilua Agayuvigpiim qallircimauq suulutaamek, suulutaanek-llu kalivnernek ellivikumaluni qeratmun iteryaraa iluqliim, cali tauna patumaluni suulutaamek.

²²Qaqilluni tamarmi ilua agayuvigpiim qallircimauq suulutaamek, ekuavik-llu tuaten Tanqinruqapiaralriim Uitaviani.

²³Malruk yaqungqellriik piliak taqumalutek allakucinek napanek nalayuilngurnek olive wood-anek ellimalutek-llu Tanqinruqapiarmun, tamarmek akimiarnek it'ganernek sugtutalutek.

²⁴Tamarmek ayuqlutek angtaciak eluciak-llu. Tamarmek malrugnek yaqurlutek, tamarmek yaqukek pingayunelgat it'ganret avguluku (7 1/2) taktalutek, taktaciak yaqum nuuganek ayagluni ikavet ingluan nuuganun akimiarnek (15) it'ganernek taktaluni.

²⁷Ellimalutek-llu caniqliqlutek Tanqinruqapiaralriim Uitaviani, tamarmek yaqukek yagingalriik nuukek agtuusngallutek atunem natrem qukaan nalliini, yaqugkenka-llu inglukek yagingalriik agtumaluku qacarneq.

²⁸Tamarmek yaqulgek piliak caqumalutek suulutaamek.

²⁹Tamarmeng qacarneri enem iluqliim-llu tangnircaumaut nuussitgun pilianek elucilegnek yuguanek yaqulegnek, palm-anek napanek, naucetaanek-llu.

³⁰Natra-llu qallircimaluni suulutaamek.

³¹Pategtelek ikirtuqaq piliaqumalria allakucinek napanek nalayuilngurnek olive wood-anek ellimauq iteryaraanun Tanqinruqapiaralriim; qulirneran amiigem cingikegglutek kangiraak.

³²Amiiget-llu tangnircaumaluteng nuussitgun pilianek elucilegnek yuguanek yaqulegnek, palm-at napaitnek, naucetaanek-llu. Amiiget, yaqulget piliat, palm-at-llu napat qallircimaluteng suulutaamek.

³³Iteryararkaa enemun taksurnilriamek yaassiiguamek unailngurmek muragmek cedar-aamek pikiuraat.

³⁴Tuani amiigtangqertuq imtuliinek taqumaluteng napanek pine-anek

³⁵tangnircaumaluteng nuussitgun yaqulegnek pilinguanek, palm-anek napanek, naucetaanek-llu, pitatekluteng qalliliumalrianek suulutaamek.

³⁶Iluqliq apqaurvik piliaqumauq ciuqerrani Agayuvigpiim, avaciumaluni qacarnernek pingasuin qalliryagusngalriit teggalqut akuliliumaaqluteng muragnek cedar-aanek quaguluryagnek.

³⁷Tusnganra Agayuvigpiim ellimallruuq tungliani iralum, iraluani Zif-am, cetamiitni allrakut ataniurillran Solomon-aam.

³⁸Pingayunelgatni iralut, iraluani Bul-am, qula ataucimek cipneratni (11) allrakut ataniurraanranek Solomon-aaq, Agayuvigpak taqellruuq atuqapiarluku picirkiurumallra. Allrakut malrunelgen aturluki Solomon-aam piliaqellrua tauna.