Read Yupik 1 Kings 7 Bible Online

1 Kings 7 - Yupik bible

1 Kings 7

¹Solomon-aaq cali eneliuq pikaminek, allrakuni qula pingayunek cipluku piliaqaa.

²Ena Napainek Lebanon-aam[3] taktaluni yuinaat malrunelgen qulmek cipluku (150) it'ganernek taktaluni, yuinaat-llu pingayun akimiarmek cipluku (75) it'ganernek iqtutaluni, yuinaak-llu malruk tallimanek cipluku (45) it'ganernek qertutaluni. Pingasuinek nalleqliqellrianek naparyarluni unailngurnek napanek, cedar-aanek, akimiaruqa'aqluteng naparyat akiqliqellriit, qallirluteng napanek unailngurnek, cedar-aanek. Qilii napat unailnguut, cedar-aat patumaluku, cipneran elagyat ilakluki, nayumiqasterluteng napanek unailngurnek, cedar-aanek naparyanek.

⁴Avategkeni qacarneregni egalertangqerrluni pingayunek nalleqliqellrianek.

⁵Amiiget egalret-llu takernilrianek menglengqerrluteng pingasuin-llu nalleqliqellriit egalret tamarkegni qacarneregni caumaluki akiqliteng nalleqliqellriit.

⁶Pekcaraq naparyatgun taktallruuq yuinaat pingayun akimiarmek cipluku (75) it'ganernek, iqtutaluni-llu yuinaak malruk tallimanek cipluku (45) it'ganernek. Qilalegmek elaturrarluni, naparyanek ayagterluni.

⁷Atanruvik, Apqaurvigmek cali aterpagcimalria, Solomon-aam arenqiirturvia pinarqellrianek, qacarniumallruluni unailngurnek napanek cedar-aanek tumarnernek natrem engeliinek qilai tekilluki.

⁸Solomon-aam elliin nakmiin uitavii, allam apqaurviim tunuani, piliaqumaut allacetun ela'avkaacetun taqumalriacetun. Elliin cali ayuqiinek nuliani enelia, Egypt-aarmiut atanrata pania.

⁹Tamarmeng makut eneliat ilakluku angelria apqaurvik taqumaut teggalquqegtaarnek tusnganritnek ayagluki qilaita engeliitnun. Teggalqut upcimaluteng tegumavimeggni kepumaluteng engelqiulluki uitallerkaatnun, ilulirnerkait elatekait-llu manigcaumaluteng kegglarluki.

¹⁰Tusnganret piliaqumaluteng upcimaluteng-llu teguviatni taqumaluteng angelrianek teggalqunek ilait taktaluteng qula malrugnek cipluku it'ganernek (12) allat-llu akimiarnek it'ganernek (15).

¹¹Qaingitni allanek teggalqurtarluni, kepumaluteng engelqiulluteng, napat-wa unailnguut cedar-aat naparyat.

¹²Atanruviim quyurrvia, iluqliq quyurrvia Agayuvigpiim, itraryarai-llu Agayuvigpiim qacarnengqertut muragnek unailngurnek cedar-aanek naparyanek atauciinek qalliqluteng pingasuingit teggalqunek kepumalrianek pingqerraqluteng.

¹³Angayuqaq Solomon-aaq taisqiuq angutmek aterluni Huram-aamek, pilinguarta uitaluni nunarpiini Tyre-am, punerneliuryaramek elisngalria.

¹⁴Elliin atii, unguvanrilleq, Tyre-armiungullruluni, elisngamillruluni-llu punernernek pilinguaryaramek; aanii kingunerluni Naphtali-m ilakellriarinek. Huram-aaq umyuartulriaruluni elisngalriaruluni-llu calinguaryaramek. Elliin ciuniuraa Solomon-aamek kelgumallni caliaqesqelluku tamalkuan punerneliuryaraq.

¹⁵Huram-aam qallilirak malruk naparyak punernermek, tamarmek yuinaq malrunlegnek cipluku (27) it'ganernek sugtutalutek akimiaq-llu pingayunek cipluku (18) it'ganernek uivetmun angtalutek, ellilukek-llu iteryaraanun Agayuvigpiim.

¹⁶Malrugnek-llu cali piliuq punerneregnek kangerkiurluni atauciq pingayunelgat it'ganret avguluku (7 1/2) sugtutaluni, ellimaarkaulutek kangkegnun naparyak.

¹⁷Kangkek tamarmek naparyak tangnircaumalutek piirrimalrianek kalivnernek

¹⁸nalleqliqellrianek-llu punernernek qeltairyararngalngurnek atsanek.

¹⁹Kangrek taukuk eluciliumalutek naucetaatun lily-tun, arvinlegnek it'ganernek sugtutalutek,

²⁰ellimalutek-llu uivenqellriamun quliitni uitalriamun piirrimalriit kalivneret. Pitangqertuq yuinarnek qulnek (200) qeltairyararngalngurnek atsanek nalleqliqellrianek kassutmun kangregni tamarkenka.

²¹Huram-aam elliak ukuk punernerek naparyak ciuqerranun iteryaraan Agayuvigpiim: ungalalirnermelnguq atengqertuq Jachin-aamek[4] neglirnermelnguq-llu aciraat Boaz-aamek.

²²Naucetaatun lily-tun elucilgek kangerkak punernerek uitalutek naparyak kangkegni. Tua-i caliaqumallrat naparyat qaqituq.

²³Huram-aaq piliuq punernermek mervigmek, pingayunelgat it'ganret avguluku (7 1/2) et'utaluni, akimiarnek-llu it'ganernek uivenqegtaluni, yuinaak-llu malruk tallimanek cipluku (45) it'ganernek uivetmun angtaluni.

²⁴Mengliini elalirnermi kassutmun merviim malruinek nalleqliqellrianek punernernek nuts-aarngalngurtarluni, kaugtuarumalrianek ilakliiyulluki mervigmun.

²⁵Mervik tusngaluni tunuitnun qula malrugnek cipluku (12) punernernun kuluviit angucaluitnun elatmun caumalrianun, pingayuluteng caumallgutkaqluteng.

²⁶Avatai merviim pingayunek cuqnernek mamtutaut. Qerrlua-llu qerrluatun saskam ayuqluni, cillangqaluni naucetaam lily-m naugillran cillarneratun. Mervik imangqerrsugngaluni tiissitsaanek qulnek (10,000) gallon-aanek.

²⁷Huram-aaq cali piliuq qulnek ikamracuanek punernernek; atauciq arvinlegnek it'ganernek taktaaqluni, arvinlegnek-llu it'ganernek iqtutaaqluni, tallimiit-llu avegluku (4 1/2) qertutaaqluni.

²⁸Taqumaaqluteng yaassiigenqellrianek tumarnernek ellimaluteng tarenrarvignun avatellegnun,

²⁹pilinguartarluteng yugtutulinek, angucalunek kuluvagnek, yaqungqellrianek-llu qaingatni tumarneret; qaingatni-llu tarenrarviit avatellget, quliitni aciatni-llu yugtutulit, angucalut-llu kuluviit, qilunguarngalngurnek cimiqaumasterluteng.

³⁰Tamarmeng ikamracuaraat cetamanek punernernek akalriarluteng punernernek-llu nuvuterluteng akalriarit. Kangiraitni cetamani punernernek tegg'ucetarluni ermigcuutet nekaitnek; tegg'utet tangnircaumaluteng qilunguanek enairtaagulluteng.

³¹Uivenqellriartarluni kangritni tusngavigkanek ermigcuutnun. Caumaluni qulmun quyigtaluni akimiaq pingayunek cipluku cuqnek quliignek ikamrak malrunlegnek-llu cuqnek iluagnun acitmun pimaluni. Nuussitgun pilinguartarluni avatii.

³²Akalriat yuinaq tallimanek cipluku (25) cuqnernek qertutaluteng; aciitnelluteng tumarneret, nuvutait akalriat ilakliiyusngaluteng ikamranun.

³³Akalriat ayuqluteng pekcessuutet akalriaricetun; nuvutet, menglait, akalriat-llu teggutait, akalriat-llu patuit tamarmeng punerneruluteng.

³⁴Cetamanek teggucetarluni atlirnerni cetamani kangiraitni ikamrat, ilakliiyusngaluteng ikamranun.

³⁵Pitangqerrluni-llu qulngunrita'arnek cuqnek iqtutalrianek nemrutnek avataitni kangrita ikamrat; teggutait tumarneret-llu ilakliiyusngaluteng ikamranun.

³⁶Tegg'utat tumarneret-llu tangnircaumaluteng elucilegnek yaqulegtun, yugtutulitun, napatun-llu palm-at nengqerrutaciicetun, qilunguarngalngurnek tamarmi avaterluni.

³⁷Wani-wa, una, qaillun ikamrat taqumallruciat; ayuqurluteng, angtatekluteng, elucillgutekluteng-llu.

³⁸Huram-aaq cali piliuq qulnek ermigcuutnek, ataucimek ikamraq piaqluku. Atauciq ermigcuun arvinlegnek it'ganernek uivenqegtaaqluni imangqerrsugngaaqluni-llu yuinarnek qulnek (200) gallon-aanek.

³⁹Elliiguq tallimanek ikamracuarnek ungalalirneranun Agayuvigpiim, cali-llu tallimanek neglirneranun; mervik-llu ellia ungalam calaralirneranun kangiramun.

⁴⁰Huram-aaq cali pilillruuq egatnek, qanikciurutnek, miiskaanek-llu. Qaqitai tamalkuita caliani Angayuqamun Solomon-aamun ATANREM Agayuvigpiin pikai. Waniwa piliallri: Malruk naparyak Malruk qantatun elucilgek naparyak kangregkeni Qaralit kuvyangalnguut kalivneret kangregken qaingatni Yuinaat-llu yuinaat (400) punerneret qeltairyararngalnguut atsat, malruin nalketatekuurluteng yuinaat tallimauqaqluteng (100) avataitni kangrita Qulen ikamracuat Qulen ermigcuutet Mervik Qula malrugnek cipluku (12) angucalut kuluviit nayumiqastiit merviim Egatet, qanikciurutet, miiskaat-llu Tamarmeng makut aklukai Agayuvigpiim, Huram-aam piliallri Angayuqamun Solomon-aamun, pilimaut qevlercaumalriamek punernermek.

⁴¹

⁴²

⁴³

⁴⁴

⁴⁵

⁴⁶Angayuqam piliaqevkallrui tegglinek urugcivigmi akuliigni Sukkoth-ankuk Zarethan-aaq-llu, kuignayugmi Jordan Valley-mi.

⁴⁷Solomon-aam makut punernernek piliaqumalriit uqamaltassiillrunritai, amllessiyaagata, taumek qaillun uqamiita pitacia nallunriumanrilnguq.

⁴⁸Solomon-aam cali pilivkarai suulutaat taqevsiarutai Agayuvigpiim: ekuavik, estuuluat kelipat elliitekumalriit Agayutmun,

⁴⁹qulen kenurrarviit napalriit ciuqerrani Tanqikapiaralriim, talliman ungalalirnermenateng talliman-llu neglirnermi; naucetaat, kenurrat, pupsuut-llu uuqnarqellrianek;

⁵⁰saskat, nipcissuutet, miiskaat, qantat aruviarcuutet, kenercissuutet-llu egatet, suulutaat; arivneri-llu amiigin Tanqikapiaralriim elaqliit-llu amiigin Agayuvigpiim. Tamarmeng makut taqumaut suulutaarrlainarnek.

⁵¹Tuani Angayuqam Solomon-aam qaqicamiki caliaqumaarkat Agayuvigpagmi, nek'egtai tamalkuita Agayuvigpiim elagyaanun tamalkuita cat atami David-aam umyuaqusngallri ATANERMUN —qerrirlit, suulutaat, allat-llu taqumalriit.