Read Yupik 1 Kings 8 Bible Online

1 Kings 8 - Yupik bible

1 Kings 8

¹Tua-llu Angayuqam Solomon-aam taisquurai tamalkuita ciuliqagtait ciuliallgutkelriit ilakuralriit-llu Israel-aami ellminun tailuki Jerusalem-aami taicartuusqelluku ATANREM Akqutiin Yaassiiga Zion-aamek, David-aam Nunarpiinek, Agayuvigpagmun.

²Tamarmeng quyurtut Festival of the Shelter-aami iralut malrunelgatni, iraluani Ethanim-aam.

³Ciuliqagtet tamarmeng quyurcimariata, agayulirtet kevgaat Akqutem Yaassiiga

⁴ayaulluku-llu Agayuvigpagmun. Levite-at agayulirtet-llu ayausmiat Pelatekaa ATANREM tuanlucian tamalkuita-llu aklui Agayuvigpagmun.

⁵Angayuqaq Solomon-aaq tamarmeng-llu Israel-aam yui quyurtut ciuqerranun Akqutem Yaassiigan ekuagiluteng-llu amllernek qusnginek, kuluvagnek-llu — amllessiyaagluteng naaqumallerkaat.

⁶Tua-i-llu agayulirtet itrulluku Akqutem Yaassiiga Agayuvigpagmun elliluku-llu Tanqikapiaralriamun, aciagnun yaqungqellriik ungungssiruak.

⁷Nengingalriiq yaqukenka patumaluku yaassiik naparyak-llu ayagatsuutek.

⁸Iqukek naparyak tangerrsugngaak kia ciuqakacagiini nangerngalriim Tanqikapiaralriim, tau͡gaam allami nangerngalriim tangerciiganakek. (Naparyak cali tuantuk unuamek.)

⁹Cataituq iluak Akqutem Yaassiigan malruk tau͡gaam igarviik teggalquk Moses-aam ellillrek Ingrimi Mount Sinai-ami, ATANEQ akqut'lillrani yuinun Israel-aam tainginanratni Egypt-aamek.

¹⁰Agayulirtet annginanratni Agayuvigpagmek, alqunaq muiqe'rtuq amirlumek

¹¹ciqinqerluni qitngirnarqellriamek tanqianek ATANREM tuanlucian, ataam-llu uterrluteng iterciiganateng caliarkateng caliaqsarturluki.

¹²Tua-llu Solomon-aaq piicagtuq: “Elpet, ATANEQ, akerta ellillruan qilagmun, tau͡gken cucukan uitanaluten amirluni tan'germi-llu.

¹³Wani-wa pilillruunga ucurnarqellriamek agayuvigmek elpenun, uitavigkarpenek akwarpak.”

¹⁴Yuut nangengqallratni tuani, Angayuqam Solomon-aaq tuiggluni caugai, kaigatkaa-llu Agayutem atawaqaasqutii ellaitnun.

¹⁵Qanertuq, “Nanraumali ATANEQ Agayutiit Israel-aat! Piciurtaa akqutkellni atamnun David-aamun, tuani qanrutlermini,

¹⁶‘Anuterraanemnek yuunka Egypt-aamek, cucukliqsaitua nunarpiit iliitnek tamalkuan nuniitni Israel-aat natmun agayuvigpak nautellerkaanek piicagvikumalallerkaqa. Tau͡gaam cucukellruamken elpet, David, yuunka ciuliqagcesqelluki.’”

¹⁷Solomon-aaq cali qanertu'rtuq, “Ataka David-aaq uptellruuq caliaqnaluku agayuvigpak piicalarvigkaq ATANERMUN Agayutiitnun Israel-aat,

¹⁸tau͡gaam ATANREM qanrutellrua, ‘Elpet alartenrituten agayuviliyugluten wangnun,

¹⁹tau͡gaam elpet nausngaitan. Qetunrarpet, elpet nakmiin qetunrarpet, taum nauciiqaa wii agayuvigpaka.’

²⁰“Tua-i-llu wani-wa ATANREM piciurtaa elliin akqutni. Wii enairaqa ataka angayuqaurrlua Israel-aanun, nautaqa-llu Agayuvigpak agayularvigkaq ATANERMUN Agayutiitnun Israel-aat.

²¹Cali-llu uitavigkiullruluku Agayuvigpagmi Akqutem Yaassiiga imalek teggalqugnek igarviignek ATANREM taqellran ciuliamten̄un anutellermini Egypt-aamek.”

²²Tua-llu takuatni yuut Solomon-aaq itrartuq nangerrluni-llu ciuqerranun ekuaviim, tuani yagtak qulmun talligni.

²³Piicagluni-llu, “ATANEQ Agayutiit Israel-aat, allamek agayutetaituq elpetun ayuqellriamek qilagmi pakmani maani-llu nunami! Elpet piciurtelaraten akquteten yugpenun nallunrirtelluki-llu kenkevnek tamalkirrluteng niisngaaqatgen elpet ircaqumegteggun tamalkirrluteng.

²⁴Piciurtan akquten atamnun David-aamun; unuamek tamarmeng qanrutkumalriit piciurcimaut.

²⁵Tua-llu watua, ATANEQ Agayutiita Israel-aat, kaigavikamken piciurcesqelluki allat akquteten atamnun qanerluten elliinun kesianek elliin kinguvrin iliit atanirtuutelarciqniluku Israel-aanun, ilumuuluteng mulngakluteng niisngakata elliitun.

²⁶Taumek watua, Agayutiita Israel-aat, cat tamalkuita piciurceski akqutkelten atamnun David-aamun, kevgarpenun.

²⁷“Tau͡gaam-qaa elpet, Agayun, ilumun nunamecugngauten? Tamarmi-llu qiliim tegumiaqsugnganrilkaten, qaillun tua-llu piluni uum Agayuvigpiim nautellma tegumiaqsugngaciqaten?

²⁸ATANEQ Agayutmaa, pistekarpenga. Niisgu piicauteka, piciurrluki-llu piyullrenka unuamek elpenun.

²⁹Tarikesqaqa una Agayuvigpak ernerni unugni-llu, una cucukellren elpenun agayularvikesqelluku. Niiskia cauluku una Agayuvigpak piicakuma.

³⁰Niiski piicautenka piicautait-llu yuv'et cauluku una piicakata. Uitavigpenek qilagmi niiskut au͡g'arilluta-llu.

³¹“Yuk pinarqut'liumakan picurlallra allamun pitekluku taicimaluni-llu ekuavigpenun wani Agayuvigpagmi qaneryarturluni piciulriamek pinarqenriluciminek,

³²ATANEQ, niicugni qilagmi cuqluki-llu pisteten. Anucimirqecetaarru pinarqelria pinarquciatun, avalitairulluku-llu pinarqutailnguq.

³³“Yut'en Israel-aat cirlakumakata inglumeggnek assiilngillrat elpenun pitekluku, tua-i-llu cauluteng elpenun tailuteng-llu uumun Agayuvigpagmun, ellmikutuurrluteng piicagvikluten au͡g'aritmek,

³⁴niicugniki qilagmi. Au͡g'ariski assiilnguit yuv'et ut'rulluki-llu nunamun cikiuteklerpenun ciuliaritnun.

³⁵“Ellalliqsaicetaqavgu-llu yugpet assiilngillrat elpenun pitekluku, umyualinqiggluteng-llu caukatgu una Agayuvigpiin, ellmikutuurrluteng piicagvikluten,

³⁶niiski qilagmek. Au͡g'arisgu assiilnguinek angayuqaq yui-llu Israel-aam, elitnaurluki-llu atullerkaanek elluam. Tua-llu ATANEQ, ellalluk taivkarru maavet nunavnun, yugpenun cikiuteklerpenun piksagucesqelluku taqluku.

³⁷“Piitnaqan-llu nunami wall'u cangerlagluteng wall'u naucetaat piunriumakata uuqnarqelriakun anuqekun wall'u ciissitgun, wall'u calluumakata yut'en inglumeggnek wall'u cangerlak, naulluun pikan ellaitni,

³⁸niisgu piicautiit. Iliit yugpet Israel-aat, ircaqumikun angniinani yageskan, piicagluni tungiinun uum Agayuvigpiim,

³⁹niisgu piicautiit. Niicugniki uitavigpenek qilagmi, au͡g'arilluki, ikayurluki-llu. Elpet kiivet nallunritaten umyuarteqellri yuum ircaqruan. Caliaqiki yuut ataucitaarluki pinarqutengqerruciicetun,

⁴⁰elpet yugpet niisnganiaraatgen kesianek yuullermeggni nunami elpet cikiuteklerpenun ciuliaritnun.

⁴¹“Ilakumanrilnguum-llu yaaqvani nunalgem, niiskuniu ucurnarqucin, angtuat-llu caliaten elpet yugpenun, tailuni-llu agayuyartuqan elpenun piicagyarturluni-llu uumi Agayuvigpagmi,

⁴²

⁴³niicugniu elliin piicautii. Qilagmi uitavigpeni niisgu kaigallratun-llu piluten, tua-i tamarmeng yuut ellarpagmi nallunritniaraatgen niisngaluten-llu yugpetun Israel-aacetun. Nutaan nallunrirniaraat una Agayuvigpak wii piliaqelqa agayularvigkaucia elpenun.

⁴⁴“Tua-llu alerququvki yut'en callugyartuusqelluki ingluitnun piicakata-llu elpenun, nanleng'e'rmeng, caumaluku una nunarpak elpet nakmikellren una-llu Agayuvigpak nautelqa elpenun,

⁴⁵niicugniki piicautait. Niiski qilagmi qakvautmek-llu cikirluki.

⁴⁶“Nani yut'en assiilngirqata elpenun—atauciungraan assiilngiyuilngurmek pitailan— qenertellren-llu niilluku ingluitnun cirlakevkarluki teguaruvkarluki-llu allamun nunamun, nuna-llu tauna yaaqsingraan,

⁴⁷niicugniki yugpet piicautait. Tamaani nunami umyualinqiggluteng piicagvikekatgen, apervikualuteng qaillun assiilngillermeggnek umyuarrliqlermeggnek-llu, niiski piicautait, ATANEQ.

⁴⁸Tamaani-llu nunami piciuluteng cumiggluteng-llu umyuarnayaguciluteng piicakata elpenun cauluku man'a nuna cikiutekellren ciuliamten̄un, una-llu nunarpak elpet nakmikellren, una-llu Agayuvigpak nautelqa elpenun,

⁴⁹kitaki niicugniki piicautait. Uitavigpenek qilagmi niiski takumcukluki-llu.

⁵⁰Au͡g'ariski tamalkuitnek assiilnguitnek, inglulicullratnek-llu, ingluitnun-llu naklekevkarluki.

⁵¹Yuk'aten nakmiin elpet, anutelten Egypt-aamek, taumek ekualriamek kaminiamek.

⁵²“Quyinrulria ATANEQ, kitaki tangvagglainarki ilukegcitekluki yut'en Israel-aat angayuqrat-llu, niilluki-llu piicautait nani qayagaaqatgen ikayungcarluteng.

⁵³Nakmikellruaten tamalkuitnek yugnek elpet nakmiin yuknaluki, qanrutellrucirpetun kevgarpegun Moses-aakun anutellerpeni ciuliaput Egypt-aamek.”

⁵⁴Tuani Solomon-aaq piicanermek taqngami ATANERMUN, nangertuq manuanun ekuaviim, ciisqumingqallerminek talligni qulmun yagingalukek.

⁵⁵Qastuluni piyuutekaa Agayutem atawaqaasqutii tamalkuitnun yugnun tuani quyungqalrianun. Qanertuq,

⁵⁶“Nanraumali ATANEQ cikillruaki yun'i uitanqegcitmek, akqellrucimitun piciqniluki. Piciurtellrui tamalkuita qunuvkenani akqutkellni tumekluku kevgani Moses-aaq.

⁵⁷Kitaki ATANREM Agayutemta nayurlikut ciuliaput pillrucimitun; kitaki elliin unitenrilkilikut wall'u cakaanrilkilikut;

⁵⁸niisgalriarurrlikut ellminun, yuugurniartukut elliin yuusqumallratun, aturluki tamalkuita alerquutai ellimerrutai-llu cikiutekellri ciuliamten̄un.

⁵⁹Kitaki ATANREM Agayutemta umyuaqerrlainaqiliu man'a piicaun makut-llu pisqumakeput elliinun. Kitaki kesianek naklekutengqerrlainarli yuinun Israel-aam angayuqratnun-llu, unuaquaqan piyuutait tangerrluki.

⁶⁰Kitaki elpeci, elliin yuini, ukverrlainaqici ATANERMUN Agayutemten̄un, niisngaluki tamalkuita alerquutai ellimerrutai-llu ernerpak atuucirpecetun.

⁶¹Kitaki elpeci, elliin yuini, kesianek pektayiinaci ukverrlainarci ATANERMUN Agayutemten̄un, niisngaluki tamalkuita alerquutai pisqutai-llu unuamek pilaucirpecetun.”

⁶²Tua-i-llu Angayuqaq Solomon-aaq tamarmeng-llu yuut tuanelnguut elliigut ekuagiluteng ATANERMUN.

⁶³Ellii ekuagiuq yuinaq malrugnek cipluku tiissitsaanek (22,000) kuluvagnek, yuinarnek-llu arvinlegnek cipluku tiissitsaanek (120,000) qusnginek ilakuyutmun elliitekait. Tua-i Angayuqam yuut-llu tamarmeng naaqitaat Agayuvigpak.

⁶⁴Taumi-llu ernermi cali naaqitaa qukaa carr'ilnguum, tauna ciuqerrani Agayuvigpiim, tuani-llu elliiluni ekuagiuq tamalkuuluku, mukaarkat elliitet, uquit-llu ungungssit ilakuyutmun elliitekai. Waten piuq tua-i-wa punerneq ekuavik miksiyaagan makunun tamalkuitnun elliitnun.

⁶⁵Tuani Agayuvigpagmi, Solomon-aam tamarmeng-llu yuin Israel-aam aturaat Angniuteksaraat Uqisviit malrunlegni ernerni. Tuani yugyapiartut yuut tuaten yaaqsigtalriamek Hamath Pass-amek neglirnermi, Egypt-aam-llu engeliinek, ungalalirnermi.

⁶⁶Erenret-llu pingayunelgatni Solomon-aam utercetai yuut kingunritnun. Ellaita tamarmeng nanraraat ellii uterrluteng-llu kingunermeggnun angnirluteng tua-i-wa pitekluki atawaqautet cikiutekellri ATANREM kevgaminun David-aamun yuinun-llu Israel-aanun.