Read Yupik 1 Kings 9 Bible Online

1 Kings 9 - Yupik bible

1 Kings 9

¹Kinguani Angayuqam Solomon-aam qaqiutellran nautellranek Agayuvigpak, atanruvik-llu, allat-llu tamalkuita caliaqsullni,

²ATANEQ alainqigtuq elliinun, Gibeon-aami pillrucimitun.

³ATANEQ qanertuq elliinun, “Niitellruanka piicauteten. Kenciknarivka'rqa una Agayuvigpak caliaqellren piicagvigkauluku wangnun qangvarpak. Murilkeciqaqa cayailkuciumaluku-llu kesianek.

⁴Kevgiurarkaukuvnga takaqlua arenqiallugutaunak-llu, atavet David-aam pillruciatun, niisngakuvki picirkiutenka aturluki-llu tamalkuita elpenun alerquutekellrenka

⁵navegngaitaqa akqutelqa atavnun David-aamun qanrutlemku Israel-aat atanirturtengqerrlainarciqniluki elliin kinguvrinek.

⁶Tau͡gaam elpet wall'u kinguverpet maligtenriqatnga, narurrluki picirkiutenka alerquutenka-llu cikiutekellrenka elpenun, ciktaangluteng-llu allanun agayutnun,

⁷nutaan au͡g'arciqanka yuunka Israel-aat nunamek cikiuteklemnek ellaitnun. Cali-llu cakaarciqaqa una Agayuvigpak kenciknarivkalqa piicalarvigkauluku wangnun. Yuut tamiinek temciarautekciqaat Israel-aaq cautekenrirciqaat-llu.

⁸Una Agayuvigpak ayuqeciquq qalliryagusngalriatun enellertun, tamarmeng-llu kitulriit alangaalarciqut irr'iluteng-llu. ‘Ciin ATANREM waten piagu man'a nuna una-llu Agayuvigpak?’ apciiqut.

⁹Yuut kiuciqut, ‘Tua-i-wa ellaita cakaaratgu ATANEQ Agayutseng, anucestellrat ciuliameng Egypt-aamek. Ellait akqiut piciunaluteng allanun agayutnun ciktaarvikluki-llu. Taumek ATANREM man'a picurlaun tuceskii ellaitnun.’”

¹⁰Solomon-aam allrakut yuinaat aturluki nautaa Agayuvigpak atanruvini-llu.

¹¹Angayuqam Hiram-aam Tyre-armium pikiumallrua napanek unailngurnek cedar-aanek, nekevraartunek-llu pine-anek, suulutaamek-llu piyugtaciatun caliamini. Qaqicimarian Angayuqam Solomon-aam cikiraa Hiram-aaq yuinarnek (20) nunacuarnek avatiini Galilee-am.

¹²Hiram-aam tangerrsartullrui, assikenritai-llu.

¹³Tua-i qanertuq Solomon-aamun, “Tua-i makut, anelgutmaa, maa-i nunacuaraat wangnun cikiutekelten!” Una pitekluku cali maa-i aterpagcimauq Cabul-amek.

¹⁴Hiram-aam tuyullrua Solomon-aaq malleggluki, talliman cuqet (5 tons) suulutaamek.

¹⁵Solomon-aaq calillruuq calivkaumalrianek piscirluni Agayuvigpagmek atanruviminek-llu, imillerminiu-llu nuna calaralirnerani nunarpiim, qacarneq-llu nunarpiim avatiini. Atullruluki-llu cali napartenqigtellermini nunarpai Hazar-aam, Megiddo-m, Gezer-aam-llu.

¹⁶Angayuqran Egypt-aam anguyallrua Gezer-aaq teguluku-llu, tuqutellruluki yui nayurtai ekuavkallruluku-llu nunarpak. Tua-i-llu cikiutekellruluku kassuutellrani, panimi Solomon-aamek.

¹⁷Solomon-aam-llu piliaqenqiggluku. Aturluki calivkaumalriit pisten̄i, Solomon-aam-llu cali piliaqenqigtellrua atliq Beth Horon-aaq,

¹⁸Baalath-aaq, Tamar-aq yuilqurtaani Judah-m

¹⁹calissuutai atu'urkai-llu tuani uitaaqluteng, horse-aari pekcessuutai-llu allat-llu cat tamarmeng aturyulallri caliyugaqami, tuani Jerusalem-aami, Lebanon-aami, allani-llu angayuqauvimi iluanelngurni uitaluteng.

²⁰Tamarmeng yuut uitaqallret Amorite-at, Hittite-at, Jebusite-at-llu, yuut Israel-aat ilakenrilkait —

²¹kinguvrit unegtellret nunamun kinguatni Israel-aam yuin piunriqapigtellrunrilkait, makut, Solomon-aam pistepaayuurtellrui, tuaten-llu ayuqluteng cali unuamek.

²²Solomon-aaq tau͡gaam pistepayuurtellrunritai Israel-aat, kevgaugut tau͡gaam elliinun, anguyagten͞guluteng, atanerruaruluteng, alerkuagisten͞guluteng, pekcessuutnek aulukiluteng, horse-aarten͞guluteng-llu.

²³Tamaani pitangqertuq tiissitsaam avga yuinaak malruk qulmek cipluku (550) atanerruanek qaunqesten͞guluteng calivkaumalrianun Solomon-aam caliarkainun alairturalrianun.

²⁴Solomon-aam imiraa nuna calaralirneratni nunarpiit, kinguakun nuliami, panian atanran Egypt-aam, nugtartellran David-aam Nunarpiinek atanruvigmun Solomon-aam piliaqellranun elliinun.

²⁵Pingayurqunek allrakumi Solomon-aaq elliilallruuq ekuagiluni, uitanqegcitem-llu elliitiinun, ekuavigmi ATANERMUN piliallmi qaingani. Tua-i Agayuvigpiim piliaqellra qaqitaa.

²⁶ATANEQ Solomon-aaq cali piliuq sun'anek Eziongeber-aami, mallgeskiini Eloth-aam cen̄iini Kangiqutaan Aqaba-m, Edom-aamelnguum.

²⁷ATANEQ Hiram-aaq ayagceciuq imarpiliutulinek, piminek ikayuucartuusqelluki Solomon-aam pistainun.

²⁸Tengalrarluteng-llu nuniinun Ophir-aam, ut'rulluteng-llu Solomon-aamun akimiaq ataucimek usperteggun cuqnek suulutaanek.