Read Yupik 2 Kings 1 Bible Online

2 Kings 1 - Yupik bible

2 Kings 1

¹Israel-aat Angayuqrat Ahab-aq tuqurraartelluku Moab-armiut inglulitut Israel-aamun.

²Israel-aat Angayuqrat Ahaziah igtuq akervigmek qiliinelngurmek atanruvimi Samaria-mi cakneq-llu akngirrluni. Tua-i kevganek ayagceciuq ellatessurvikesqelluku Baalzebub-aaq, Philistine-at nunarpiita Ekron-aam agayutii, nallunrirnaluku assiriarkaucini wall'u assiringailucini.

³Tau͡gaam an'gilaa ATANREM qanertuq Elijah-mun prophet-aamun Tishbite-armiumun, “Nangerrluten, ayii pairrsaagluki Samaria-m angayuqran kevgai, qanerniartuten ellaitnun, ‘Tua-i-qaa Agayucetailan Israel-aaq pitekliqatartuci Baalzebub-aamek, agayutiinek Ekron-aam?’

⁴Qanrusgu angayuqaq ATANEQ qanerniluku, ‘Makngaituten uitavigpenek inglernek; tuquciquten.’” Tua-i Elijah ATANREM pisqellratun piuq,

⁵kevgat-llu utertut angayuqamun, aptai-llu, “Ciin uterceci?”

⁶Taukut-llu kiugut, “Angutem pairrsaallruakut qanrulluta-llu, Uterci angayuqamun ayagcecestevcen̄un qanrulluku-llu, waten qanertuq ATANEQ, ‘Ciin kevganek ayagcecisit ellatessurvikesqelluku Baalzebub-aaq, Ekron-aam agayutii? Tuaten-qaa piuten umyuarteqngavet agayucetaicukluku Israel-aaq? Uitavigpenek inglernek atrarngaituten, tuquciquten.’”

⁷Angayuqam-llu aptai, “Qaillun tauna angun pairrsaagcesteci makunek-llu qanrulluci ayuqa?”

⁸Taukut-llu kiugaat, “Ulikutangqertuq ungungssit amiitnek pilimalriamek, qecigmek naquguterluni.” Angayuqaq-llu qanlertuq, “Elijah-uguq Tishbite-aq!”

⁹Tua-i ayagceciuq atanerruamek yuinaak malruk qulmek ciplukek (50) malilirluku angutnek aqvaluku Elijah. Taum atanerruam ullagaa Elijah, aqumgallrani qemim qaingani qanrulluku-llu, “Agayutem yuani, angayuqam picirkiraaten atraasqelluten.”

¹⁰Tau͡gaam Elijah-m kiugaa, “Wiinga Agayutem yuk'ekanga, keneq atrarli qilagmek ekualuten-llu maliten-llu angucet.” Egmian-llu keneq atrartuq qilagmek piunrirluku tauna atanerruaq malii-llu.

¹¹Ataam angayuqaq allamek atanerruamek ayagceciuq angutnek yuinaak malruk qulmek ciplukek (50) malilirluku, tauna ayagtuq qanerluni-llu Elijah-mun, “Agayutem yuani, angayuqam picirkiraaten egmian waniwa atraasqelluten!”

¹²Elijah kiuguq, “Agayutem yuk'ekanga, keneq atrarli qilagmek ekualuten-llu maliten-llu angucet.” Egmian-llu kenra Agayutem atrartuq qilagmek piunrirluku-llu tauna atanerruaq malii-llu.

¹³Cali ataam angayuqaq ayagceciuq atanerruamek yuinaak malruk qulmek ciplukek (50) angutnek malilirluku. Tauna mayurtuq qemimun, ciisqumiggluni-llu ciuqerranun Elijah-m aguagulluku, “Agayutem yuani, kaigavikamken takumcukesqellua ukut-llu maliinka. Unguvavkarkut!

¹⁴Allak malruk atanerruak malikek-llu angucet kenrem qilagmek tuqutellrui; wiinga tau͡gaam takumcukekia.”

¹⁵Tua-i-llu an'gilaa ATANREM qanertuq Elijah-mun, “Maliggluku atraa, aliksaqunaku-llu.” Tua-i Elijah nangerrluni atrartuq atanerruaq maliggluku angayuqamun

¹⁶qanerluni-llu elliinun, “Waten qanertuq ATANEQ: ‘Ayagcecillruavet kevganek ellatessurvikluku Baalzebub-aaq, Ekron-aam agayutii, tuarpiaq agayucetaunaku Israel-aaq ellatessurvigkarpenek, taumek inglernek uitavigpenek atrarngaituten, tuquciquten!’”

¹⁷Tua-i Ahaziah yuunrirtuq, ATANREM Elijah tumekluku qanellruciatun. Ahaziah qetunraitellruuq, taumek Joram-aaq anelgutii angayuqrurtuq kinguakun tuani allrakuk malruugtellruuk Jehoram-aaq Jehoshaphat-aam qetunraa ataniungerraanranek Judah-mi.

¹⁸Allat pillri Angayuqam Ahaziah-m igausngallruut Kalikarni Igausngaviitni Atanrita Israel-aat.