Read Yupik 2 Kings 11 Bible Online

2 Kings 11 - Yupik bible

2 Kings 11

¹Angayuqam Ahaziah-m aaniin, Athaliah-m, nallunriamiu qetunrami tuqutaullra, alerquutai tamalkuita angayuqam ilakuralriartai tuqucesqelluki.

²Tau͡gaam Jehosheba-m, Angayuqam Joram-aam panian, Ahaziah-m anelgutiin, tegua Joash-aq Ahaziah-m qetunraa, qimaulluku-llu akuliitnek angayuqam yuin tuqucimaqatalriit. Agutak-llu aulukestii-llu qavarvigmun Agayuvigpagmi iirluku Athaliah-mek, tua-i tuqucimallruvkenani.

³Allrakuni-llu arvinlegni Jehosheba-m aulukaa tan'gaurluq iirumaluku Agayuvigpagmi, Athaliah atanirturillrani queen-auluni.

⁴Tau͡gaam allrakut malrunelgatni Jehoiada-m, agayulirtem, taisqai atanerruarit angayuqam ilain nayurtaita, eniin-llu nayurtain, qanrulluki-llu Agayuvigpagmun taisqelluki, tuani-llu umyuallguciutevkarai akqivkarluki picirkiuraminun. Nasvitai-llu Angayuqam Ahaziah-m qetunraanek Joash-amek

⁵alerqurluki-llu makunek: “Sabbath-aami caliarci ayagniquvciu, pingasuivci murilkarkaugaat angayuqam enii;

⁶allat-llu pingasuici nayurarkaugut Iteryaraani Sur-am, cali pingasuici nayurarkauluteng iteryarami allat nayurtet tunuatni.

⁷Malruin-llu caliameggnek taqellriit Sabbath-aami nayurarkaugut Agayuvigpagmi angayuqaq nayurluku.

⁸Nayurarkaugarci Angayuqaq Joash-aq nuussirpaci tegumiaqluki natmun-llu ayallra tamalkuan maligtelararkaugaci. Kina-llu mallegceci tuqutarkaugaci.”

⁹Atanerruat-llu, maliggluki Jehoiada-m agayulirten͞gunrem alerquutai, taitaqluki elliinun angutet ataniuqengateng Sabbath-aami caliameggnek taqellriit, cali caliateng ayagniqataqait.

¹⁰Cikirluki-llu atanerruat pananek capkutanek-llu Angayuqam David-aam pillrinek Agayuvigpagmi uitalrianek,

¹¹nayurtet-llu elkartai caskuit tegumiaqluki ungalalirneranek Agayuvigpiim negeqvalirneranun, ekuaviim-llu, enem-llu avatiignun.

¹²Tua-llu Jehoiada-m Joash-aq anutaa, nasqerrun-llu elliiluku qamiquanun, cikirluku-llu ayuqaitnek alerquutain angayuqauyaram. Tua-llu Joash-aq uqumek minguumauq, qanrutkumaluni-llu nallunairumaluni angayuqauluku. Yuut-llu qacguuruciluteng qayagpagtut, “Angayuqaq unguvamali!”

¹³Queen Athaliah-m niicamiki nepiit tarikestet yuut-llu, cukangnaqluni Agayuvigpagmun ag'uq, yuut tuavet quyurtellruata.

¹⁴Tuani tangrraa nutaraq angayuqaq nangengqalria napalriim caniani iteryaraani Agayuvigpiim, piciryaraq aturluku. Quyurusngaluku atanerruat cupu'uryaralget-llu, tamarmeng-llu yuut angnirluteng qayagpagaut cupu'uryarateng-llu qalriavkarluki. Athaliah-m-llu allgurai aturani nuniirluni qayagpagluni-llu, “Inglukiuci, inglukiuci!”

¹⁵Jehoiada-m agayulirtem alerqurai anguyagtet atanerruarit, “Anuciu nayurten̄un qukaqmigtelluku, kia-llu ikayungnaqkaku tuquskiciu.” Tua-i agayulirta qanellruan, “Tuqucimanrilli ATANREM Agayuvigpiini.”

¹⁶Teguluku-llu ayautaat angayuqam eniinun, tuani-llu Horse Gate-ami tuqutaat.

¹⁷Agayulirtem Jehoiada-m Angayuqaq Joash-aq yuut-llu akqut'livkarai ATANEQ pillgutekluku-llu ATANERMUN yuugarkauluteng; cali akqut'liluni angayuqam yuut-llu akunliignun.

¹⁸Tua-llu yuut ayagtut Baal-am agayuvianun imlluku-llu; navgurluki-llu ekuavii, agayutnguat-llu, tuqulluku-llu Mattan-aaq, agayulirtii Baal-am, ciuqerratni ekuaviit. Jehoiada-llu nunalgarciuq nayurten̄ek Agayuvigpagmi,

¹⁹tua-llu elliin, atanerruat, angayuqam nayurtain, eniin-llu nayurtain, maligtaat angayuqaq Agayuvigpagmek eniinun, yuut-llu kingunratgun maligtait. Joash-aq itertuq Guard Gate-akun aqumluni-llu atanruvigmun aqumllermun.

²⁰Yuut-llu tamarmeng angniqapigtut; nunarpak-llu qinuituq, Athaliah tuqucimallruan angayuqam eniini.

²¹Jehoash-aaq allrakungqellruuq malrunlegnek ayagnillermini ataniurluni.