Read Yupik 2 Kings 12 Bible Online

2 Kings 12 - Yupik bible

2 Kings 12

¹Malrunelgatni allrakuin Angayuqam Jehu-m angayuqrullran Israel-aami, Joash-aq[3] angayuqrurtellruuq Judah-mi, angayuqruluni-llu allrakuni yuinaagni malrugni (40) Jerusalem-aami. Aanii atengqerrluni Zibiah-mek Beersheba-rmiunguluni.

²Unguvallmi taktaciatun calillruuq piciulriamek tangvallrani ATANREM, tua-i-wa Jehoiada-m agayulirtem ayuqucirtuallruani.

³Tau͡gaam agayutnguanun agayularviit piunriumallrunritut, yuut-llu elliilallerteng aruviarnek-llu ekuagilallerteng tamakutgun taqevkenaku ciumurulluku.

⁴Joash-am taisqai agayulirtet alerqurluki-llu qemagtesqelluki akit akiliutellret ekuagilallrata Agayuvigpagmi, tamarkenka akiliutellret ekuagilallrata cikiutellrit-llu yuut piugteqelteng maliggluku.

⁵Agayulirtet qemangqalararkauluki taitellrit kevgiuqengameng,[4] taukut-llu akit atuulararkauluteng Agayuvigpagmun pinarqaqan kitugutekluki.

⁶Tau͡gaam yuinaq pingayunek (23) ciptellrat allrakut tekilluki Joash-aq atanirturillrani agayulirtet cali kitugciksaitellruut Agayuvigpagmi.

⁷Taumek Angayuqam Joash-am taisqaa Jehoiada agayulirta, allat-llu agayulirtet apluki-llu, “Ciin kitugcunriceciu Agayuvigpak? Wak'nirnek ayagluci qemangqangairutaci akit akurtulci; taitnarqaci, kituggnarqelriit kitugcimanaurtut.”

⁸Agayulirtet-llu mat'umun umyuallguciutut akinek tegusngairulluteng yugnek, cali umyuallguciulluteng kitugcingaunateng Agayuvigpagmi.

⁹Tua-llu Jehoiada yaassiigmek tegutuq, ukilluku-llu patua, ekuaviim-llu canianun elliluku, itellriim Agayuvigpagmun tallirpilirnerani uitaarkauluni. Iteryarami-llu calilriit agayulirtet ek'larait yaassiigmun tamalkuita akit agayuyartulriit cikiutait.

¹⁰Amlleriaqata akit angayuqam igartii, Agayulirten͞guneq-llu tailartuk, naaqerraarluki-llu qillrulluki missuucuarnun.

¹¹Igauqaarluki-llu amllertaciit, tunlaragkek atanirturtaitnun Agayuvigpagmi calistet, taukut-llu akit aturluki akililarait muraliurtet, enelistet,

¹²teggalquliurtet, teggalqunek kepuristet, kiputellrit muriit teggalqut-llu tumarutkat, allat-llu pinarqelriit akilitarkat.

¹³Tau͡gaam akit akiliutekeksaitait piliaqumallritnun qerrirlit saskat, qantat, cupu'uryarat, kenurriurcuutet caskut, wall'u allanun qerrirlinek suulutaanek pilimalrianun.

¹⁴Tamalkuan atularait akikaatnun calistet kipuyutkaitnun-llu cat aturyulriit kitugutkat.

¹⁵Caliamek atanirturilriit tamarmirrluteng piciugut, taumek qaillun akit atullrit apqauruteknarqeksailnguut.

¹⁶Akit-llu akiliutngullret anucimirqecetaarutnguluteng, elliitet-llu assiilnguut pitekluki yaassiigmun ekumaksaitut; agayulirtet pikngatki.

¹⁷Tamatum nalliini Syria-m Angayuqran Hazael-aam anguyagaa nunarpak Gath-aq teguluku-llu; tua-llu umyuamikun taqutuq Jerusalem-aaq anguyagnaluku.

¹⁸Judah-m Angayuqran Joash-am tamalkuita tegui elliitellret ciuqlirmi Judah-m angayuqrin Jehoshaphat-aam, Jehoram-aam, Ahaziah-m-llu cikiutekellrit ATANERMUN, ilaluki-llu elliin nakmiin elliitminek, tamalkuitnek-llu suulutaanek Agayuvigpiim akiviani, angayuqam-llu eniini uitalrianek, tuyuqai Angayuqamun Hazael-aamun, taum-llu ayautai anguyagten̄i Jerusalem-aamek.

¹⁹Ilait callrin Angayuqam Joash-am, caliallri-llu tamarmeng igausngaut ukuni: Judah-m Angayuqrin Ayuqucillrit.

²⁰Angayuqam Joash-am atanerruari picirkiurtut elliinun, malruulutek-llu, Jozacar-aq Shimeath-aam qetunraan, Jehozabad-aam-llu Shomer-aam qetunraan, tuqutaak enemi uitalriami nunami calaralirnerani Jerusalem-aam, Silla-mun ayalriami tumyarami. Joash-aq tungmagcimauq angayuqat qungurviatni David-aam Nunarpiini, qetunraa-llu Amaziah angayuqrurtuq enairluku.