Read Yupik 2 Kings 13 Bible Online

2 Kings 13 - Yupik bible

2 Kings 13

¹Allrakut yuinaq pingayunek (23) cipnengluku Joash-am, Ahaziah-m qetunraan, angayuqrullran Judah-mi, Jehoahaz-aaq, Jehu-m qetunraa, ayagnirtuq angayuqruluni Israel-aamun Samaria-mi, akimiaq-llu malrugnek cipluku (17) allrakuni angayuqrullruluni.

²Ciuqlirmitun Angayuqatun Jeroboam-aatun assiitellriamek calillruuq ATANREM tangvallrani, maryarrluku-llu Israel-aaq assiilngurmun; pegtevkenaki-llu assiitellriit piciryarani.

³Taumek ATANREM eq'uqrutaa Israel-aaq, pulengtaq-llu Syria-m Angayuqranun Hazael-aamun, qetunraanun-llu Benhadad-amun cirlakevkalaraa.

⁴Tua-llu Jehoahaz-aaq piicagtuq ATANERMUN, ATANREM-llu tangrramiu angayuqaanun Syria-m Israel-aat cakneq nangyucii, piicallra kiugaa.

⁵ATANREM-llu cikiraa Israel-aaq anirturtekaanek, taum-llu petuirai Syrian-aanek; Israel-aat-llu qinuilngurmi yuugu'rtut, ciungani pillrucimegcetun.

⁶Cali tau͡gaam pegtenritait Angayuqam Jeroboam-aam assiilnguut maryarutellri Israel-aamun, agayutnguaq-llu Asherah-m ayuqii uitaurluni Samaria-mi.

⁷Jehoahaz-aam anguyagtai nang'ut, yuinaak tau͡gaam malruk qulmek ciplukek (50) horse-aalget uitaqallruluteng, qulen-llu pekcessuutelget, qulen-llu tiissitsaat (10,000) piyualuteng pitulit; angayuqran Syria-m ilait piunrillruaki tutmaulluki urr'atun.

⁸Wani-wa ilait caliallri Jehoahaz-aam tamalkuita-llu alingura'arpek'nani callri, igausngaut ukuni: Kalikaat Igausngaviit Israel-aam Angayuqrin.

⁹Jehoahaz-aaq-llu tuquuq tungmagcimaluni-llu Samaria-mi; Jehoash-aaq-llu qetunraa angayuqrurtuq enairluku.

¹⁰Yuinaq akimiaq malrunlegnek (37) cipnengluku Joash-am angayuqrullra Judah-mi, Jehoash-aaq, Jehoahaz-aam qetunraa, angayuqrurtellruuq Israel-aamun Samaria-mi, angayuqauluni-llu allrakuni akimiaq ataucimek cipluku (16).

¹¹Jehoash-aaq calimillruuq assiitellriamek ATANREM tangvallrani maliggluku ayuqucillra Jeroboam-aam, Nebat-aam qetunraan, taum maryartellrukii Israel-aaq assiilngurmun.

¹²Ilait callri Joash-am, ilakluku alingura'arpek'nani anguyallra Judah-m Angayuqra Amaziah inglukluku, igausngaut ukuni: Kalikait Igausngaviit Israel-aam Angayuqrin.

¹³Joash-aq-llu tuquuq tungmagcimaluni-llu angayuqat qungurviatni Samaria-mi, qetunraa-llu Jeroboam II-aaq angayuqrurtuq enairluku.

¹⁴Prophet-aaq Elisha naulluunguq tuqutekaminek, tuquqatarluni-llu inangqallrani, Israel-aam Angayuqran Jehoash-aam tangerrsarturaa, ciuqerrani-llu qialuni-llu qanertuq, “Atamaa! Atamaa! Ingluliurutellruan Israel-aaq pinilriaruluten!”

¹⁵Elisha-m-llu ellimerraa, “Aqvaten urluvermek pitegcautnek-llu”; Jehoash-aaq-llu aqvatuq,

¹⁶Elisha-m-llu qanrutaa, “Pakiggu urluveq”; angayuqaq-llu tuaten piuq, Elisha-m-llu unatni ellii angayuqam unatainun.

¹⁷Qanerluni-llu, “Ikiresgu egaleq Syria-m tungiinelnguq”; elliin-llu ikirtaa. Tua-llu Elisha qanertuq, “Pitgaa”; pitgartuq-llu. Pitgautiini prophet-aaq ilungluni qanertuq, “ATANREM pitegcautekaaten, aturluten cirlakciqaa Syria. Anguyagciqaten Syrian-aat Aphek-aami cirlakvigpenun.”

¹⁸Cali qanertuq, “Teguki pitegcautet”; tegui-llu. Qanertuq-llu, “Kaugturru nuna”, kaugturaa-llu pingayurqunek, taqluni-llu.

¹⁹Tuatnallran Elisha-m umyugaa assiircetaa, qanerluni-llu angayuqamun, “Kaugturarkauyaaquten tallimarqunek wall'u arvinlerqunek; tuatnallrukuvet kaugturyaran Syria piunrirvigpenun; wani-wa cirlakarkaurtan Syria pingayurqunek.”

²⁰Tua-i Elisha tuquuq, tungmagtaat-llu. Quyuqetaarluteng-llu Moabite-at itervik'laraat Israel-aam nunii up'nerkarqan.

²¹Caqerluteng angutmek tungmagciinanratni, tamakut ilait quyurmeng uayaarissaagalriit tangrruugut, yuut-llu tauna tema tuqumalria egtaat Elisha-m qunguanun qimagluteng-llu. Egmianun-llu enri Elisha-m temem agtuaki tauna angun unguirtuq, nangerrluni-llu.

²²Wani-wa Angayuqam Hazael-aam caknercetaarturallrui Israel-aat Jehoahaz-aam angayuqrullran taktaciatun,

²³tau͡gaam ATANREM naklekumallrui takumcukumaluki-llu. Piunrircetellrunritai-llu, tau͡gaam ikayullrui akqut'lillni pitekluku Abraham-aaq, Isaac-aaq, Jacob-aaq-llu pillgutekluki. Qangvaq-llu yun'i nalluyagutellruvkenaki.

²⁴Syria-m Angayuqra Hazael-aaq tuquan, qetunraa Benhadad-aaq angayuqrurtuq enairluku.

²⁵Israel-aam-llu Angayuqran Jehoash-aam cirlakaa Benhadad-aaq pingayurqunek tegunqiggluki-llu nunarpiit Benhadad-aam tegullri Jehoash-aam atiin Jehoahaz-aam angayuqaullran nalliini.