Read Yupik 2 Kings 14 Bible Online

2 Kings 14 - Yupik bible

2 Kings 14

¹Aipaani allrakuan Jehoash-aam, Joahaz-aam qetunraan, angayuqrullran Israel-aami, Amaziah, Joash-am qetunraa, angayuqrurtuq Judah-mi.

²Allrakungqellruuq yuinaq tallimanek cipluku (25) ayagnillermini angayuqauluni, angayuqrullruuq-llu yuinaq qulngunrita'arnek cipluku (29) Jerusalem-aami. Aanii atengqertuq Jehoaddin-aamek Jerusalem-aarmiunguluni.

³Calillruuq assilriamek tangvallrani ATANREM, tau͡gaam ciuliamitun Angayuqatun David-aatun ayuqevkenani; atami Joash-am pillratun pillruluni.

⁴Agayutnguanun-llu agayularviit piunrirtellrunritai; tua-i yuut cali ekuagilartut, tepkegcilrianek-llu aruviararaqluteng tamakutgun.

⁵Egmian-llu Amaziah-m piksagucamiu angayuqauluni piningqellni, tuqutai atanerruat tuqucestellri atami, angayuqrulriim.

⁶Irniarit tau͡gaam tuqutenritai tuqucillret; maliggluku igausngalria ATANREM alerquutekellra kalikaini Moses-aam Alerquutain: “Angayuqaulriit tuqucimangaitut irniarita picurlallrit pitekluki, irniarulriit-llu tuqucimangaitut angayuqameng picurlallrit pitekluki; yuut tuqucimaarkaugut kiingan tau͡gaam ellaita assiilnguq atullrat pitekluku.”

⁷Amaziah tuqucillruuq tiissitsaanek qulnek (10,000) Edomite-anek anguyagten̄ek Salt Valley-mi; teguluku-llu nunarpak Sela anguyagkun acirluku-llu Joktheel-amek, tauna-llu ateqluku una erneq tekilluku.

⁸Tua-llu Amaziah ayagceciuq kevganek qaneryartulrianek Israel-aam Angayuqranun Jehoash-amun tungaunatek qalarucugluku.

⁹Tau͡gaam Angayuqam Jehoash-aam kiugaa qanerluni: “Caqerluni cukilanaq Lebanon-aami qanermek ayagceciuq napamun cedar-aamun: ‘Paniin qetunramnun tuniu nuliqsagutnauraa.’ Yuilqurmiutaq-llu ungungssiq tamaagguirtuq cukilanaq-llu tutmarluku ayalurrluku.

¹⁰Amaziah, cirlakellruan Edom-aaq, umyuan-llu quyigtuq. Elarakevkenaku niitnaullren kingunerpeni uitauraa. Ciin picurlak ayagniryarciu arenqiallugutmek tau͡gaam taitarkaq elpenun yugpenun-llu?”

¹¹Tau͡gaam Amaziah niicuumiituq. Tua-i Angayuqaq Jehoash-aaq an'uq malikluki anguyagten̄i, anguyagluku-llu Beth Shemesh-aami, Judah-melngurmi.

¹²Anguyagtai-llu Amaziah-m cirlakluki, tamarmeng-llu anguyagtai qimagtut kingunermeggnun.

¹³Jehoash-aam-llu teguaqaa Amaziah, Jerusalem-aaq-llu curugluku, navgurluku-llu nunarpiim qacarnera Ephraim Gate-amek Corner Gate-aq tekilluku, tamana yaaqsigtauq yuinarnek qulnek (200) yaaltanek.

¹⁴Tegui-llu tamalkuita suulutaat qerrirlit-llu, tamalkuita-llu Agayuvigpiim aklui, angayuqam-llu eniin akitulriarutai, teguanek-llu tegulluni, ayaulluki-llu ut'rulluki Samaria-mun.

¹⁵Tamarmeng Jehoash-aam caliallri, alingura'arpek'nani-llu anguyallra Judah-m Angayuqra Amaziah, igausngaut ukuni: Kalikaat Igausngaviit Angayuqrin Israel-aam.

¹⁶Jehoash-aaq-llu tuquuq tungmagcimaluni-llu Samaria-mi Israel-aam angayuqrin tungmaggviatnun, qetunraa-llu Jeroboam-aaq angayuqrurtuq eniini.

¹⁷Judah-m Angayuqra Amaziah unguvallruuq akimiarni allrakuni Israel-aam angayuqran Joash-am tuqullran kinguani.

¹⁸Ilait piurallrin Amaziah-m, igausngaut ukuni: Judah-m Angayuqrin Kalikait.

¹⁹Jerusalem-aami-llu picirkiulriartangqertuq Amaziah tuqutnaluku, tua-i qimagtuq nunarpagmun Lachish-aamun, tau͡gaam inglukestain maligtaat tuavet tuqulluku-llu.

²⁰Temii-llu horse-aamun elliluku ut'rutaat Jerusalem-aamun tungmagcimaluni-llu angayuqat tungmaggviatnun David-aam Nunarpiini.

²¹Qetunraa-llu Azariah, allrakungelria akimiaq ataucimek cipluku (16), Judah-m yuin nasqerruciraat angayuqrurrluku.

²²Azariah-m-llu tegunqigtaa Elath-aq nautenqiggluku-llu atami tuqullran kinguani.

²³Akimiaratni allrakuin atanirturillran Judah-mi Amaziah-m, Joash-am qetunraan, Jeroboam-aaq Jehoash-aam qetunraa angayuqaqsagutellrua Israel-aam, atanirturillruuq-llu Samaria-mi yuinaak malruk ataucimek ciplukek (41) allrakuni.

²⁴Calillruuq assiitellriamek tangvallrani ATANREM; maliggluku piciryarallra ciuqlirmi Angayuqam Jeroboam-aam, Nebat-aam qetunraan, taum maryartellrukii Israel-aaq assiilngurmun.

²⁵Ataam-llu tegunqigtaa tamalkuan Israel-aam nunautellra Hamath Pass-amek negeqvamelngurmek, Dead Sea-q tekilluku. Man'a akqutkelqaa ATANREM, Israel-aam Agayutiin, tumekluku pisten̄i prophet-aaq Jonah, Amittai-am qetunraa, Gath Hepher-aarmiu.

²⁶ATANREM tangrrai Israel-aat cakneq nangteqellrat, wani-wa atauciunger'mi uitalriartailan qillerqumalriamek wall'u qillerqumanrilngurmek; watqapik kitumek ikayurtekaunani Israel-aaq.

²⁷Tau͡gaam ATANREM pillerkiuraqenritaa Israel-aaq piunrirteqapiggnaluku akwarpak piungairulluku, taumek anirturai Angayuqakun Jeroboam II-aakun Joash-am qetunraakun.

²⁸Wani-wa Jeroboam II-aam caliallri, alingura'arpek'nani anguyalallra, ataam-llu utercetellrak Damascus-aankuk Hamath-aaq-llu Israel-aamun, igausngaut ukuni: Kalikait Angayuqrin Israel-aam.

²⁹Jeroboam-aaq-llu tuquuq tungmagcimaluni-llu angayuqat qunguumaviatni, Zachariah-llu qetunraa angayuqrurtuq eniini.