Read Yupik 2 Kings 15 Bible Online

2 Kings 15 - Yupik bible

2 Kings 15

¹Allrakut yuinaq malrunelgatni (27) Angayuqam Jeroboam II-aam Israel-aami angayuqrullran, Azariah, Amaziah-m qetunraa, ayagnillruuq angayuqruluni Judah-mi

²allrakungluni akimiaq ataucimek cipluku (16), angayuqrullruluni-llu Jerusalem-aami allrakuni yuinaak malruk qula malrugnek cipluku (52). Aanii atengqertuq Jecoliah-mek Jerusalem-aarmiunguluni.

³Calillruuq ellualriamek ATANREM tangvallrani, maliggluki tamalkuita atami Amaziah-m pillri.

⁴Tau͡gaam agayutnguanun agayularviit piunriumallrunritut, tua-i yuut cali ekuagilartut elliitnek, aruviararaqluteng-llu tamakuni.

⁵ATANREM-llu tuc'etaa Azariah mamyuilngurmun apqucimun, tamana-llu assirivkenani unguvallran taktaciatun, enemi-llu allakarmi uitaluni. Qetunraan-llu Jotham-aam angayuqirai ilani, atanirturluki-llu nunam yui.

⁶Wani-wa ilait callrin Azariah-m caliallri-llu tamarmeng igausngaut ukuni: Kalikaat Igausngaviit Judah-m Angayuqrin.

⁷Azariah-llu tuquuq tungmacimaluni-llu angayuqat tungmaggviatni David-aam Nunarpiini, Jotham-aaq-llu qetunraa angayuqrurtuq enairluku.

⁸Allrakut yuinaq akimiaq pingayunek cipluku (38) Azariah-m, Judah-m angayuqran, atanirturillran, Zachariah Jeroboam-II-aam qetunraa, angayuqrurtellruuq Israel-aamun, angayuqrullruuq-llu Samaria-mi arvinlegni iraluni.

⁹Calillruuq-llu assiitellriamek tangvallrani ATANREM, ciuliami pillruciicetun. Maligtellrua assiitellria ayuqucillra Angayuqam Jeroboam-aam, Nebat-aam qetunraan, taum maryartellrukii Israel-aaq assiilngurmun.

¹⁰Shallum-aaq-llu, Jabesh-aam qetunraa, picirkiurtuq Angayuqam Zechariah-m tungiinun, tuqutaa-llu Ibleam-aami, ellii-llu angayuqrurrluni enairluku.

¹¹Wani-wa Zachariah-m callri, igausngaut ukuni: Kalikaat Igausngaviit Angayuqrin Israel-aam.

¹²Tua-i akqun piciurtuq ATANREM akqutkellra Jehu-mun: “Kinguveten cetamaingit tekilluku angayuqauciqut Israel-aami.”

¹³Shallum-aq, Jabesh-aam qetunraa, ayagnillruuq ataniurluni allrakuin yuinaak malruunritariitni (39) Uzziah-m angayuqrullran Judah-mi, atanrullruuq-llu iralumi ataucimi Samaria-mi.

¹⁴Tua-llu Menahem-aaq, Gadi-m qetunraa, ayagtuq Tirzah-mek Samaria-mun, tuqulluku-llu Shallum-aq, ellii-llu angayuqrurrluni eniini.

¹⁵Wani-wa callri Shallum-aam, picirkiullra-llu assinrilnguq ilakluku, igausngaut ukuni: Kalikaat Igausngaviit Angayuqrin Israel-aam.

¹⁶Taum nalliini Menahem-aaq ayallermini Tizrah-mek, piunrirteqapigtaa nunarpak Tappuah yugtuumaan, nuna-llu avatiinelnguq, nunarpak elliinun tunenrilan. Tuaten-llu arnat qingalriit aqsait allegluki ikirtelarai.

¹⁷Allrakuini yuinaak malruunritariitni (39) Azariah-m angayuqran Judah-m, Menahem-aaq, Gadi-m qetunraa angayuqrurtellruuq Israel-aami, ataniullruuq-llu Samaria-mi qulni allrakuni.

¹⁸Calillruuq-llu assiitellriamek tangvallrani ATANREM; tuqullni-llu erneq tekilluku maligtellrua Angayuqam Jeroboam-aam, Nebat-aam qetunraan, ayuqucillra, taum maryartellrukii Israel-aaq assiilngurmun.

¹⁹Pul-am-llu, angayuqran Assyria-m, anguyagaa Israel-aaq, Menahem-aam-llu qerrirlinek cuqnek yuinaq akimiarmek cipluku pingayunelgen-wa (38 tons) cikiraa, elliinun ikayuusqelluku pinimi tuknikanillerkaa angayuqaullermini tamaani nunami.

²⁰Menahem-aam pitekliutekellruluki akit Israel-aam tukuulriartainek umyugait aturpek'naki cikiqengevkarluki, yuk atauciq elliivkaraqluku yuinaak malruk qulnek cipluki (50) qerrirlinek. Tua-i angayuqra Assyria-m nakmiin nunaminun utertuq.

²¹Menahem-aam tamarmeng caliallri igausngaut ukuni: Kalikaat Igausngauviit Angayuqrin Israel-aam.

²²Menahem-aaq-llu tuquuq tungmagcimaluni-llu, qetunraa-llu Pekahiah angayuqrurtuq eniini.

²³Judah-m Angayuqran Azariah-m atanirturillran yuinaak malruk qulmek cipluku (50) allrakuani, Pekahiah, Menahem-aam qetunraa, angayuqrurtuq Israel-aami, Samaria-mi-llu atanirturiluni allrakugni malrugni.

²⁴Assiitellriamek-llu calillruuq ATANREM tangvallrani; maligtellrua Angayuqam Jeroboam-aam, Nebat-aam qetunraan, ayuqucillra, taum ciuliqagtellrukii Israel-aaq assiilngurmun.

²⁵Pekahiah-m-llu anguyagtaini atanerruarulria Pekah, Remaliah-m qetunraa, picirkiurtuq Pekahiah inglukluku ilaluni yuinaak malruk qulmek cipnelegnek (50) angutnek Gilead-aarmiunek, tuqutaat-llu Pekahiah Samaria-mi iluqlirmi asvairqumalriartaani angayuqam eniin; ellii-llu ataniurluni enairluku.

²⁶Wani-wa callri Pekahiah-m tamarmeng igausngaut ukuni: Kalikaat Igausngaviit Angayuqrin Israel-aam.

²⁷Allrakuin yuinaak malruk qula malrugnek cipnengutiigni (52) Azariah-m, Judah-m angayuqran ataniullran, Pekah, Remaliah-m qetunraa, Israel-aami angayuqrurtuq, ataniurluni-llu Samaria-mi yuinarni (20) allrakuni.

²⁸Ellii-llu assiitellriamek calillruuq ATANREM tangvallrani; maliggluku assiitellria ayuqucia Angayuqam Jeroboam-aam, Nebat-aam qetunraan, taum maryartellrukii Israel-aaq assiilngurmun.

²⁹Pekah-m angayuqrullrani Israel-aami, Tiglath Pileser-aam, Assyria-m angayuqran, tailuni tegui nunarpiit Ijon, Abel Beth Maacah, Janoah, Kadesh, Hazor-aaq, Gilead-aam nunai, Galilee, Naphtali-llu; yuut-llu ayaulluki teguaqluki Assyria-mun.

³⁰Yuinaurutiitni-llu allrakuin Jotham-aam, Uzziah-m qetunraan, ataniullran, Hoshea, Elah-m qetunraa, picirkiurtuq inglukluku Pekah, Remaliah-m qetunraa, tuqulluku-llu, ellii-llu angayuqrurrluni enairluku.

³¹Wani-wa pillri Pekah-m, callri-llu tamarmeng, igausngaut ukuni: Kalikaat Igausngaviit Angayuqrin Israel-aam.

³²Allrakuan aipaani ataniullran Pekah-m, Remaliah-m qetunraan, angayuqruluni Israel-aami, Jotham-aaq, Uzziah-m qetunraa, ayagnirtuq ataniurluni Judah-mi

³³yuinaq tallimanek cipluku (25) allrakungluni, ataniullruuq-llu Jerusalem-aami allrakuni akimiaq ataucimek cipluku (16). Aanii atenqertuq Jerusha-amek, Zadok-am panikluku.

³⁴Jotham-aaq-llu calillruuq ellualriamek tangvallrani ATANREM atami Jotham-aam pillruciatun.

³⁵Tau͡gaam agayutnguanun agayularviit piunriumallrunritut; cali tua-i yuut elliilartut ekuagiluteng, aruviarluteng-llu tamakuni. Jotham-aam piliaqellrua Neglirnermi Iteryaraa Agayuvigpiim.

³⁶Wani-wa tamarmeng cat pillri Jotham-aam, tamarmeng-llu caliallri, igausngaut ukuni: Kalikaat Igausngaviit Judah-m Angayuqrin.

³⁷Jotham-aam angayuqrullran nalliini ATANREM ciuqlirmek ayagcetellruak Syria-m Angayuqra Rezin-aaq, Israel-aam-llu Angayuqra Pekah anguyagtelluku Judah.

³⁸Jotham-aaq-llu tuquuq tungmagcimaluni-llu angayuqat qungurviatnun David-aam Nunarpiini; qetunraa-llu Ahaz-aq angayuqrurtuq eniini.