Read Yupik 2 Kings 16 Bible Online

2 Kings 16 - Yupik bible

2 Kings 16

¹Akimiaq malrugnek cipnengutiini (17) Pekah-m Remaliah-m qetunraan ataniullran Israel-aami, Ahaz Jotham-aam qetunraa angayuqrurtuq Judah-mi

²allrakungluni yuinarnek (20), atanrullruuq-llu akimiaq ataucimek cipluku (16) allrakuni Jerusalem-aami. ATANERMI Agayutmi tangvallrani ilukegcinarqellrunrituq caliara, ciuliami Angayuqam David-aam pillruciatun

³maliggluki Israel-aam angayuqrin ayuqucillrat. Ekuallruluku-llu qetunrani elliitekluku agayutnguanun, maliggluku uuminarqeqapigtellria piciryaraat angayuqauvillgutkelriit ATANREM anevkallrin nunamek Israelite-at ciunratnek.

⁴Ahaz-aq-llu ekuagilartuq aruviarluni-llu agayutnguanun agayularvigni, qemini, aciitni-llu cuyangqellriit napat.

⁵Tua-llu Rezin-aam angayuqran Syria-m, Remaliah-m-llu qetunraan Pekah-m, Israel-aam angayuqran, anguyagaak Jerusalem-aaq, kassugulluku-llu, tau͡gaam Ahaz-aq cirlakesciiganaku.

⁶(Taum-llu nalliini Edom-aam angayuqran tegunqigtaa nunarpak Elath-aaq anlluki-llu Judah-m yui Elath-aami uitalriit. Edomite-at-llu elkartut Elath-aamun cali maa-i una erneq engelkarrluku tamaanlluteng.)

⁷Tua-i-llu Ahaz-aq ayagceciuq kevganek Tiglath Pileser-aamun, Assyria-m angayuqranun, qanerluni, “Wiinga pistekarpenga qetunraqlua-llu. Tailuten aviucarturnga angayuqranek Syria-m Israel-aam-llu angayuqranek, taukuk anguyakiignga.”

⁸Ahaz-am tegui qevlercetellriit suulutaat-llu Agayuvigpagmek, angayuqam-llu eniin akivianek, tuyuqluki-llu cikiutnguluki Assyria-m angayuqranun.

⁹Assyria-m-llu angayuqran niilluku; an'uq anguyagyarturluku Damascus-aaq, teguluku-llu, yui-llu ayaulluki teguaqluki Kir-amun, Rezin-aaq-llu tuqulluku.

¹⁰Tuani Angayuqaq Ahaz-aq ayagtuq Damascus-aamun, tangerrsarturluku Angayuqaq Tiglath Pileser-aaq, tangrraa-llu ekuavik tuani, Uriah-mun-llu agayulirten͞gunermun ayuqeqapiarii ekuaviim tuyuqaa, elucia, taqenqegcaarluku tautun ayuqeqapiarluku.

¹¹Uriah-llu agayulirta ekuavigmek piliuq tautun ayuqelriamek taqluku-llu Ahaz-aq uterpailgan.

¹²Tekicami Damascus-aamek Ahaz-am tangrraa ekuavik. Malkaniraa-llu ekuavik, mayurluni-llu qainganun,

¹³ekuagiluni-llu elliiguq ungungssimek mukaarkamek-llu, kuvluku-llu wine-aq elliitni, auk-llu ilakuyutem elliitii ciqrulluku elliiviim qainganun.

¹⁴Punerneq-llu ekuavik ATANERMUN tunumalria uitallruuq akunliigni nutaram ekuaviim Agayuvigpiim-llu, tua-i Ahaz-am nugtartaa neglirneranun ekuavimi.

¹⁵Angayuqam-llu Ahaz-am alerquraa Uriah-q agayulirta qanerluni, “Qaingani angtuam ekuagikina unuakum ekualuku elliitiinek, atakuqlim-llu elliitiinek mukaarkamek, angayuqam-llu ekualuku elliitnek; ilakluki tamarmeng nunam yuin ekualuki elliitait, mukaarkaq-llu elliitiit, wine-aq-llu elliitiit; ciqrulluku-llu qaingatnun tamalkuan augat ekualuki elliitet; tau͡gaam punerneq ekuavik wii kangiiturvik'larciqaqa.”

¹⁶Uriah-m agayulirtem makut tamalkuita caliaqai Angayuqam Ahaz-am alerquuciatun.

¹⁷Angayuqam-llu Ahaz-am au͡g'arai punerneret akalrialget atulaqait Agayuvigpagmi ermigcuucet-llu au͡g'arluku qainganelnguut. Punerneq-llu mervik au͡g'araa qula malrugnek cipluku punerneret kuluviit angucalut qaingatni uitalleq, elliluku-llu qainganun teggalqum tusnganrem.

¹⁸Assyrian-aam-llu angayuqam ilukegcillerkaa pitekluku cali au͡g'araa Agayuvigpagmek angayuqam aqumlleran tusngallra capluku-llu angayuqam iteryaraa Agayuvigpagmun.

¹⁹Wani-wa ilait caurallrin Ahaz-am, caliallri-llu, tamakut-qaa igausnganritut Kalikarni Igausngaviitni Angayuqrin Judah-m?

²⁰Tua-i Ahaz-am qavallgutkai atani, tungmagcimaluni-llu pillgutekluki atani Nunarpiini David-aam; Hezekiah-llu ataniurtuq enairluku.