Read Yupik 2 Kings 17 Bible Online

2 Kings 17 - Yupik bible

2 Kings 17

¹Allrakuin qula malrugnek cipnengluku (12) Ahaz-am Judah-m angayuqran, Hoshea Elah-m qetunraa, ayagnirtuq ataniurluni Israel-aamun Samaria-mi, ataniurluni-llu qulngunrita'arni allrakuni.

²Assiitellriamek-llu calillruuq tangvallrani ATANREM, tau͡gaam ciumini Israel-aam atanellritun pitavkenani.

³Shalmaneser-aam Assyria-m angayuqran anguyagaa; Hosea-llu nunaliurteksagutaa, allamiaqan-llu akililaraa Shalmaneser-aaq.

⁴Tau͡gaam Angayuqran Assyria-m taringaa Hoshea-m aarnarqucia; tua-i-wa ayagcecillruan kevganek So-mun angayuqranun Egypt-aam, akiliutmek-llu cikinrirluku angayuqra Assyria-m pilaucirmitun allamiaquaqan; taumek angayuqran Assyria-m teguvkaraa, qillerqelluku-llu itertaa.

⁵Tua-llu angayuqran Assyria-m itervikaa nuna tamalkuan tekilluni-llu Samaria-mun, allrakut-llu pingayun aturluki kassugusngaluku.

⁶Allrakuin qulngunritariitni Hoshea-m atanirturillran Assyria-m angayuqran tegua Samaria, ayautai-llu Israelite-at Assyria-mun, nunalgarrluki-llu Halah-mun, Habor-aamun, kuiganun Gozan-aam, nunarpainun-llu Medes-aam.

⁷Man'a waten piuq, tua-i-wa Israel-aam yui assiilngillruata ATANERMUN agayutmeggnun, anucestellermeggnun Egypt-aam nuniinek angayuqranek-llu Pharaoh-mek. Qigcikillratnek-llu allanek agayutnek,

⁸piyualallratnek-llu piciryaraicetun taukumiut ATANREM anevkallrin ciunratnek Israel-aam yuin, piciryaraitnek-llu angayuqrin Israel-aam nallunrircetellrinek.

⁹Israel-aam-llu yui aassaqluteng canek pilartut atawakenrilkainek ATANREM Agayutmeng. Ekuavignek agayularvigkameggnek nauciluteng tamalkuitni nunameggni, mikelqukacagaitni nunat angenkacagaitni-llu;

¹⁰tamaitni qemini napat-llu aciatni naparciluteng teggalqunek ekuavignek ayuqainek-llu agayutnguam Asherim-aam,

¹¹ekuagilartut-llu aruviarnek agayutnguat ekuaviitni, maliggluki tamakut yuut piciryarait ATANREM anevkallrin nunamek ciunratnek. ATANREM eqrutii tupagtelaraat caliamegteggun assinrilngurteggun.

¹²Kevgiurluki agayutnguat, tamakut piluki ATANREM qanrutellrukai, “Mat'umek pingaituci.”

¹³Tua-i cali ATANREM aarcirtularaa Israel-aaq Judah-q-llu tamalkuitgun kevgatgun tamalkuitgun-llu prophet-aatgun, qanerluni, “Tuigci assiilngurmek calillerpecen̄ek alerquutenka-llu maliggluki igausngalriit Alerquutmi cikiutekellrenka ciuliavcen̄un elpecen̄un-llu tunellrenka kevgamkun prophet-aatgun.”

¹⁴Tau͡gaam niicugniyuumiitut, asvaunateng ciuliameng pillruciicetun, taukut ATANERMUN Agayutmeggnun ukvellrunritut.

¹⁵Maligcuumiitait alerquutai, akqun-llu piurtellra pillgutekluki ciuliarit, aarcirtuutai-llu ellaitnun cakevkenaki. Maliggluki agayutnguat, piciunrirluteng, maligtengluki-llu avatmeggni uitalriit angayuqauvillgutkelriit, tamakut piluki ATANREM alerqullrukai piciryarait maligtesqevkenaki.

¹⁶Pegtait-llu tamalkuita alerquutai ATANREM Agayutmeng, pililuteng-llu malrugnek cavigmek urugtagnek elucilirlukek angucaluugtun kuluvagtun; cali-llu pililuteng ayuqeliluku agayutnguaq Asherah, ciktaarvikluki-llu tamalkuita qilagmelnguut, kevgiurluku-llu Baal-aq.

¹⁷Ekualarait-llu qetunrateng, paniteng-llu elliitekluki, ellangcarvikaqluki tuqumalrianun qalarcetulit ciunerkarcutulit-llu, ellmeggnek-llu tunumaluteng assiitellriamek calillerkameggnun tangvallrani ATANREM, tuatnallermeggteggun qenngevkarluku.

¹⁸Taumek ATANREM cakneq qenrutaa Israel-aaq, au͡g'arluki-llu tangerqem̄inek; kiingan Judah-m ilakellriartai uitaqertelluki.

¹⁹Judah-m-llu cali maligtenritai alerquutai ATANREM Agayutmeng, tau͡gaam piyuaguq piciryaratgun Israel-aam nallunrircetellrikun.

²⁰ATANREM-llu qessayagutellrui tamalkuita kinguvri Israel-aam, nangteqevkarluki-llu, kiituani tunai inglukestaitnun, ayagtelluki tangerqem̄inek.

²¹Kinguani ATANREM Israel-aaq avcestellran Judah-mek Israelite-at angayuqaqsagutaat Jeroboam-aaq Nebat-aam angayuqameng qetunraa. Jeroboam-aam-llu ayagcetaa Israel-aat maligtellranek ATANEQ angelriamek-llu assiilngirtelluki.

²²Yui-llu Israel-aam pektut assiilngurkun Jeroboam-aam pillrakun; unitevkenaki-llu,

²³ATANREM au͡g'arnatkaanek Israel-aaq tangerqem̄inek, qanellrucimitun prophet-aatgun pistem̄ikun. Tua-i Israel-aaq ayagcecimauq nakmiin nunaminek Assyria-mun una erneq tekilluku.

²⁴Angayuqran-llu Assyria-m yuut ayautai Babylon-aamek, Cuthah-mek, Avva-mek, Hamath-aamek, Sepharvaim-aamek-llu, elliluki-llu nunarpainun Samaria-m, yuinun Israel-aam pivkenaki; teguit-llu avalii Samaria-m, uitaluteng-llu nunarpaini.

²⁵Uitangqerraallermeggni-llu tuani qigcikellrunritaat ATANEQ; taumek ATANEQ ayagceciuq yugtutulinek akuliitnun, tuqutellruit-llu ilait.

²⁶Tua-i angayuqra Assyria-m qanrucimauq, “Yuut ayautellerpet uitavkarluki-llu nunarpaini Samaria-m nalluit alerquutai nunam agayutiin; taumek ayagcecillruuq yugtutulinek akuliitnun, tangerrluku-llu tamakut tuqurqait, tua-i-wa nalluatki alerquutai nunam agayutiin.”

²⁷Tua-llu angayuqra Assyria-m alerquriuq, “Uterceci ataucimek agayulirtem̄ek taitellemten̄ek teguaruluku; utertelluku tuani uitavkarciu, elitnaurnaurai yuut alerquutainek agayutiin nunam.”

²⁸Tua-i agayulirtet iliit ayautellrat Samaria-mek tailuni uitauq Bethel-aami, elitnaurluki-llu qaillun qigciklerkaatnek ATANEQ.

²⁹Tau͡gaam tamarmeng angayuqauvillgutkelriit cali agayut'lilartut pikameggnek, elliaqluki agayutnguat ekuaviitnun Samaria-rmiut piliallritnun. Tamarmeng yuut quyungqalriit agayutnguanek pililartut nunarpagni uitavimeggni:

³⁰Babylon-aam yui piliut ayuqainek agayutem Succothbenoth-aam, Cuth-am-llu yui piliut Nergal-aamek, Hamath-aam yui piliut Ashima-mek,

³¹Avvite-at-llu pililuteng Nibhaz-amek, Tartak-aamek-llu; Sepharvite-at-llu ekualuki irniateng elliitekait Adrammelech-aamun, Anammelech-aamun-llu, agayutegkenun Sepharvaim.

³²Ukut yuut cali agayulartut ATANERMUN, cucuklirluteng-llu ilameggnek agayulirtekanek agayutnguanun agayularvigni, ekuagilararkanek-llu ellait pitekluteng tamakuni.

³³Tua-i agayuvikelaraat ATANEQ, tau͡gken cali agayuaqluteng nakmiin agayutmeggnun egmiulluku piciryaraat kingunermeng nunat.

³⁴Una erneq tekilluku cali tuaten pilartut ciungani pilallermegcetun. Agayuviksuitaat ATANEQ, maligtevkenaki-llu alerquutet picirkiutet-llu cikiutellri Jacob-aam kinguvrinun, Israel-aamek acillmi.

³⁵ATANEQ akqut'lillruuq pillgutekluki ellait, alerqurluki-llu, “Agayuvikeksaunaki allat agayutet; ciktaarvikeksaunaki wall'u kevgiuqsaunaki ekuagiksaunaci-llu tamakunun.

³⁶Tau͡gaam qigcikarkaugarci ATANEQ, anutesteklerci Egypt-aam nuniinek angelriamek piningqerrluni tallimikun-llu yagingalriakun; ciktaarvikarkaugarci ellii, elliiluci-llu ekuagiluci.

³⁷Picirkiutet, alerquutet, elpecen̄un igautekellri, kesianek mulngakluci atulararkaugaci. Niisngaarkaunritaci allat agayutet.

³⁸Nalluyagutarkaunritarci-llu akqun taqelqa pillgutekluci. Niisngaarkaunritaci allat agayutet.

³⁹Tau͡gaam niisngaarkaugarci ATANEQ Agayutsi, elliin anirturciqaaci ingluvcen̄ek.”

⁴⁰Tau͡gaam taukut yuut niicuumiitut, taqevkenaki-llu piciryarateng maligtait.

⁴¹Tua-i makut angayuqauvillgutkelriit qigcikaat ATANEQ, tau͡gaam cali ellaita kevgiurturluki caunrilnguut agayutnguateng; irniarit-llu ayuqmun, irniarita-llu irniarit, atameng pillruciicetun, tuaten pilartut man'a erneq engelkarrluku.