Read Yupik 2 Kings 18 Bible Online

2 Kings 18 - Yupik bible

2 Kings 18

¹Pingayuatni allrakuin Hoshea-m qetunraan Elah-m angayuqran Israel-aam, Hezekiah-q qetunraa Ahaz-am, angayuqra Judah-m, ayagnirtuq ataniurluni.

²Yuinaq tallimanek cipluku (25) allrakungellruuq ayagnillermini ataniurluni, ataniullruuq-llu allrakuni yuinaq qulngunrita'arnek cipluku Jerusalem-aami. Aanii atengqellruuq Abi-amek panikluku Zachariah-m.

³Ellualriamek pillruuq tangvallrani ATANREM, maliggluki tamiin David-aam atami pillri.

⁴Au͡g'arai agayutnguanun elliiviit, navgurluki-llu napartet tegalqut, kepurluku-llu Asherah. Atrartaa-llu navgurluku mikliriluki punerneq ciissirpaguaq Moses-aam piliaqellra. Tauna erneq tekilluku Israel-aam ekuavik'lallrua aruviarnek; aterpagcimauq Nehushtan-aamek.

⁵Ukverumallruuq ATANERMUN Agayutiinun Israel-aam; tua-i kinguakun elliitun ayuqellriartaitellruuq tamalkuitni Judah-m angayuqrini, wall'u ciungani angayuqrullerni.

⁶Tua-i-wa tegumiaqellruamiu asvaunani ATANEQ; unitellrunritaa-llu maligtellerminek ellii, tau͡gaam aturluki alerquutet ATANREM alerquutekellri Moses-aamun.

⁷ATANREM-llu nayullrua; natmun aya'agqami piluaqalartuq. Inglulitellruuq angayuqranun Assyria-m, kevgiuryugpek'naku-llu.

⁸Piunrirtai Philistine-at tekilluku Gaza nunatuumaan, nacessngaviitnek ayagnirluki cayailkuciumalrianun nunarpaitnun.

⁹Cetamiitni allrakuin Angayuqam Hezekiah-m, malrunelgatni allrakuin Hoshea-m qetunraan Elah-m, angayuqran Israel-aam, Shalmaneser-aam angayuqran Assyria-m anguyagaa Samaria-q avatairluku-llu.

¹⁰Iquatni-llu allrakut pingayun tegullrua. Arvinelgatni-llu allrakuin Hezekiah-m, qulngunritariitni allrakuin Hoshea-m angayuqran Israel-aam, Samaria-q tegumallruuq.

¹¹Angayuqran Assyria-m ayautai Israelite-at Assyria-mun, elliluki-llu Halah-mun, Habor-aamun-llu, kuiganun Gozan-aam, nunarpaini-llu Medes-aam.

¹²Tua-i-wa niisnganrilatgu qanellra ATANREM Agayutmeng tau͡gaam navgurluku akqutii, tamalkuita-llu Moses-aam ATANREM kevgaan alerquutekellri; niitenritait wall'u aturpek'naki.

¹³Akimiarunritariitni allrakuin angayuqam Hezekiah-m, Sennacherib-aam angayuqran Assyria-m anguyagai tamalkuita cayailkutalget nunarpai Judah-m teguluki-llu.

¹⁴Hezekiah-llu angayuqra Judah-m ayagceciuq angayuqranun Assyria-m Lachish-aami, qanerluni, “Wii alartellruunga; anguyallren arulairesgu, ca piyullren akilirciqaqa.” Angayuqran-llu Assyria-m kiugaa Hezekiah, Judah-m angayuqra, tiissitsaanek cetamanek (4,000) uspernek qerrirlinek, yuinarnek-llu yuinarnek (400) uspernek suulutaamek tuyuusqelluni.

¹⁵Hezekiah-m-llu cikiraa tamalkuitnek qerrirlinek Agayuvigpagmi uitalrianek, akiviini-llu angayuqam eniini uitalrianek.

¹⁶Taum nalliini Hezekiah-m au͡g'arterai suulutaat amiiginek Agayuvigpiini ATANREM, amiiget-llu naparyaitnek Hezekiah-m angayuqran Judah-m qalliliutellrinek, tunluki-llu angayuqranun Assyria-m.

¹⁷Angayuqra-llu Assyria-m ayagceciuq Tartan-aanek, Rabsaris-aanek, Rabshakeh-nek-llu malilirluki amllernek anguyagten̄ek Lachish-aamek Angayuqamun Hezekiah-mun Jerusalem-aami. Taukut-llu mayurtut tekilluteng-llu Jerusalem-aamun. Tekicameng-llu uitaut qurrluryaraani qulliim mer'em, tumyaraanelngurmi 'lumarralistet caliviatni.

¹⁸Pitekliata-llu angayuqamek an'ut Eliakim-aaq qetunraa Hilkiah-m, enem tamarmi tarikestii, Shebnah-llu igarta, Joah-llu qetunraa Asaph-aam, cat pilriit igautestiit.

¹⁹Rabshakeh-llu qanertuq ellaitnun, “Hezekiah-mun qanqici, ‘Waten qanertuq angelria angayuqaq, Assyria-m angayuqra: Cam nalirugtevkenak waten pivkartaten?

²⁰Umyuartequten-qaa qanengssaggaat elisngaaqsukluki piniutnguyukluki-llu anguyagmun! Kitumek watua cacetuqutengqercit, ingluliuravnga wii?

²¹Neryuniurutkan-qaa Egypt-aamun ikayullerkan, tuaten pikuvet cuplulegmek ayarungqellriatun ayuquq, navegluni unaten kapsugngaa. Tuaten Pharaoh-q, angayuqra Egypt-aam, ayuquq kia imum cacetuqutekekani.

²²“‘Tau͡gaam qanquvet wangnun, “Wangkuta cacetuqutekarput ATANEQ Agayutvut,” pikenritai-qaa ekuaviit Hezekiah-m au͡g'allri qanerluni Judah-mun Jerusalem-aamun-llu, “Agayuarkauguci uum ciuqerrani ekuaviim Jerusalem-aami”?

²³Tailuten watua, pillerkiurtek angayuqaqa-llu Assyria-m angayuqra; cikirciqamken tiissitsaagnek malrugnek (2,000) elussitanek, ugingavikestekaitnek angutnek tuaten pitalrianek piyugngakuvet!

²⁴Pitacirturciigataten Assyrian-aat atanerruat aciqsikacaaqengraatgu, tau͡gken neryuniurtuten Egyptian-aat taivkarinayukluki elpenun akalrialegnek ayagassuutnek anguyagten̄ek-llu.

²⁵Cali-llu, cakaarluku-qaa ATANEQ taillruyukarpenga anguyagluku man'a nuna piunrirnaluku? ATANEQ qanertuq wangnun, anguyaggu man'a nuna piunrirrluku.’”

²⁶Tua-llu Eliakim-aaq qetunraa Hilkiah-m, Shebnah-llu, Joah-llu, qanertut Rabshakeh-nun, “Qalaruski pisteten Aramaic-aatun qaneryaraicetun, taringetuamteggu; qalarutenrilkut Judah-m qaneryaraatun yuut niitevkarluki qacarnermelnguut.”

²⁷Tau͡gaam Rabshakeh-m qanrutai, “Atanema-qaa ayagcetellruanga makunek qallacesqellua atanirturtevcen̄un elpecen̄un-llu, qacarnermi aqumgalriit yuut pivkenaki, ner'arkaurcecimalriit anameggnek mer'arkaurcecimalriit-llu teq'umeggnek?”

²⁸Tua-llu Rabshakeh-q nangertuq qayagpagluni-llu qastuluni Judah-m qaneryaraatun: “Niiciu qanellra angelriim angayuqam, Assyria-m angayuqran!

²⁹Waten qanertuq angayuqaq, ‘Hezekiah-mun iqlutmurucecaqunaci, elliin aviucugngangailaci wii unatemnek.

³⁰Hezekiah-mun cacetuqutengevkarcecaqunaci ATANERMEK qanellrakun, ATANREM ilumun aviuciiqaakut, una-llu nunarpak tunumangaituq unatainun angayuqran Assyria-m.’

³¹Niicugninriciu Hezekiah. Angayuqran Assyria-m picirkiraaci anluci nunarpagmek tunesqelluci ellminun. Nutaan tamarpeci nerniartuci nakmiin pivcen̄ek wine-arkanek naucetaanek, figs-aanek-llu nakmiin napautevcen̄ek, merluci-llu nakmiin mervigpecen̄ek.

³²Tainatkamnun ayaulluci-llu nunamun nunavci ayuqiinun, nunamun mukaarkartalegmun wine-artalegmun-llu, nunamun kelipartalegmun wine-arkanek-llu naucetaartalegnun, nunamun olive-aat napaitnek pitalegmun paatakaartalegmun-llu, unguvasqelluci, tuqusqevkenaci-llu. Niicugniyaqunaciu-llu Hezekiah iqlutmurutessaangraaci qanerluni, ATANREM aviuciiqaakut.

³³Agayutaita-qaa allat angayuqauvillgutkellriit aviutelarait nunait angayuqranek Assyria-m?

³⁴Nauwa-mi agayutait Hamath-aam, Arpad-aam-llu? Nauwa-llu agayutai Sepharvaim, Hena-m, Ivvah-m-llu? Aviutellruat-qaa Samaria-q unatemnek?

³⁵Naliata agayutain nunam aviutellruaki nunautait unatemnek? Tua-llu cam umyuarteqevkartaci ATANERMUN aviutnayukluku Jerusalem-aaq?”

³⁶Tau͡gaam yuut nepaitut kiuvkenaku-llu aperyararraungraan, tua-i Angayuqam Hezekial-aam qanrutellruateng, “Kiuyaqunaciu.”

³⁷Tua-llu Eliakim-aaq qetunraa Hilkiah-m, murilkesta eniini, Shebna-llu igarta, Joah-llu qetunraa Asaph-aam cat igaucestiit, taigut Hezekiah-mun aturateng allgumaluki, qanrulluku-llu qanellrinek Rabshakeh-m.