Read Yupik 2 Kings 19 Bible Online

2 Kings 19 - Yupik bible

2 Kings 19

¹Tuani Angayuqam Hezekiah-m niicamiu, aturani allgurai, ellminek-llu all'uni missuullernek, iterluni-llu ATANREM eniinun.

²Ayagcelluki-llu Eliakim-aaq qaunqesten͞gulria enemini, Shebna igarta, ak'allaurtellriit-llu agayulirtet, aturarluteng missuullernek prophet-aamun Isaiah-mun qetunraanun Amoz-aam.

³Qanertuq-llu elliinun, “Waten qanertuq Hezekiah-q, Man'a erneq erneqaa uitacurlautem qanleryaucimallrem, qessakumallrem-llu; mikelnguut yuurtellerkameggnun tekiutelaryaaqut, tau͡gaam pinirtaituq anglicaumallerkaitnun.

⁴Tua-i-llu pingatuq Atanrem Agayutvet niisngatai qanellri Rabshakeh-m, atanermi atanran Assyria-m ayagcetellri piciliutekluku unguvalria Agayun, qessakluki-llu qaneryaraat ATANREM Agayutvet niitellri; taumek erinan naluggu piicagluten pitekluki uitaqalriit unicimaluteng.”

⁵Tuani pistii Angayuqam Hezekiah-m tekicami Isaiah-mun.

⁶Isaiah-m qanrutai, “Qanerniartuci atanerpecen̄un, ‘Waten qanertuq ATANEQ; Alingevkenak tua-i niicavki qaneryaraat, tamakut aturluki pistain atanran Assyria-m qanvialugacatnga.

⁷Tangerrluku elliiciqua anernermek elliinun, tua-i niiciquq qannguamek uterrluni-llu nunaminun; wiinga-llu iquvkarciqaqa nuussirpagkun elliin nakmiin nuniini.’”

⁸Rabshakeh-q-llu utercami tangrraa atanra Assyria-m callulria inglulirluku Libnah-q; niituq-llu ataneq ayallrucianek unilluku Lachish-aaq.

⁹Ataneq-llu niituq taumek Tirhakah-mek atanranek Ethiopia-m, “Tangerrluku, tauna ayagtuq callugyarturluten inglukluten,” ayagceciuq-llu qanerten̄ek ataam Hezekiah-mun, qanerluni,

¹⁰“Waten qanrutarkaugarci Hezekiah-q atanra Judah-m; ‘Agu Agayutevnun atavikekevnun iqluvkaryaqunak akqellrakun Jerusalem-aaq tunumangaitniluku unatainun atanran Assyria-m.

¹¹Tangerrluku elpet niitellruan qaillun atanran Assyria-m pillra tamalkuitnun nunanun, piunrirluki tamakut cakneq. Cali-llu elpet tegumaciqngatuten?

¹²Agayutaita-qaa taungullgutkellriit anirtullruit tamakut, taungullgutkellriit atama piunrillrin, Gozan-aaq, Haran, Rezeph-aaq-llu, yuut-llu Eden-aarmiut Telassar-amelnguut?

¹³Nauwa atanra Hamath-aam, atanra Arpad-aam, atanra-llu nunarpiim Sepharvaim-aam, atanra-llu Hena-m, wall'u atanra Ivvah-m?’”

¹⁴Hezekiah-q-llu akurturtuq igamek unataitnek qaneryarturtet, naaqaa-llu; Hezekiah-llu mayurtuq eniinun ATANREM, maniluku-llu ciuqerranun ATANREM,

¹⁵Hezekiah-llu piicagtuq ciuqerrani ATANREM qanerluni: “ATANEQ Agayutii Israel-aam, aqumgalriaten aqumllerpeni quliigni cherubim-aak, Agayutnguuten elpet kiivet, avatiitni tamarmeng angayuqauviin nunam; piliaqellruan qilak nuna-llu.

¹⁶Maniluku ciuten ATANEQ, niilluki-llu, uillukek iigken ATANEQ, tangerrluten-llu; niilluki-llu qanellri Sennacherib-aam, taum ayagcetellri iqlukutekluku unguvalria Agayun.

¹⁷Piciulriaruuq ATANEQ, atanrin Assyria-m piunrillrui taungullgutkellriit nunatuumaita,

¹⁸eggluki-llu agayutait kenermun; tua-i agayutngunrilata, tau͡gaam piliaqait yuut unataita, muriit teggalqut-llu; taumek caunriumaut.

¹⁹Taumek watua, ATANEQ Agayutemtaa, anirturkut, kaigavikamken unatainek, tamarmeng angayuqauviin nunam nallunrirnauraat elpet ATANEQ Agayutngucin kiimenak.”

²⁰Tua-llu Isaiah-q, qetunraa Amoz-aam, ayagceciuq Hezekiah-mun qanerluni, Waten qanertuq ATANEQ, Agayutiit Israel-aat; piicauten wangnun pitekluku Sennacherib-aaq, atanra Assyria-m, niitellruaqa.

²¹Maa-inguuq qaneryaraa ATANREM qanellra pitekluku ellii. “Taum temciarautekaaten, taum caunrilkaaten— arnami paniani Zion-aam; ungaulugaa qamiquni kingunerpenek, paniani Jerusalem-aam.

²²Kina iqluqusiu picilirluku-llu assiitellrianek? Inglulirluku kina qatguurasit ucuryaggluten-llu iigken naluumalukek? Inglukluku Tauna Tanqilriara Israel-aam?

²³Kevgarpegun iqluqutekan ATANEQ, qanellruavet-llu, ‘Wii pekcessuuterugamkun mayullruunga qertuqritnun ingrit, yaaqsilrianun-llu marainun Lebanon-aam; kepurluki-llu acetunrit napat, cucunanqurrit-llu teggelriit napat; itellruluki-llu yaaqsinqut uitaqerviit, napatuqrii-llu.

²⁴Elaglua-llu elakanek merlua-llu yaaqvarmiutarmek mermek, kinercetanka it'gama aluitnek tamalkuita kuiggaarai Egypt-aam.’

²⁵“Niiteksaitarpenga-qaa picirkiurumarillruaqa man'a ak'arpak? Uptellruaqa ciuqvanek maa-i piciureskeka, elpenun piunriisqelluki cayailkuciumalriit nunarpiit caunrirluki.

²⁶Yirtuumastait cirlaurtut qacuvallaumaluteng ayuquciinateng, ayuqliriluteng-llu yuilqum naunraitun, evesraartun, canegtun enet qaingitni; qakikaitun nauvailegmeng.

²⁷“Tau͡gaam nallunritaqa elpet aqumgacin, anucin, itrucin-llu, eqmalluggluten-llu ingluklua.

²⁸Tua-i-wa eqmallugtellruavet ingluklua ucuryagtellren-llu taiguq ciutegemnun, wiinga elliciqaqa negcika qengagpenun nallunricesqumakeka-llu qanerpenun, tuigciiqamken-llu utetmun tumllerpegun taillerpeni.

²⁹“Man'a-llu nallunailkutaugarkauguq elpenun; mat'umi allrakumi; nerlararkauguten naunrarnek ellmeggnek naullernek, aipaani-llu allrakum naulrianek cali ayuqaitnek; pingayuatni nauceciiciquten quyurciluten-llu, naucetaarvililuten-llu ner'aqluten-llu naugillritnek.

³⁰Uitaqalriari-llu eniin Judah-m acilqunglarciqut acitmun naugiluteng-llu qulmun;

³¹tua-i anciqut Jerusalem-aamek ilakuarraat, Ingrimek-llu Zion-aamek quyungqalriit anakallret. Takumcutaucian ATANREM man'a piciqaa.”

³²Taumek qanertuq ATANEQ, pitekluku atanra Assyria-m, “Ellii taingaituq wavet nunarpagmun wall'u pitgarngaunani pitegcautmek tuavet, wall'u taingaunani ciuqerranun capkutarluni qertulriamek-llu pilingaunani inglulirluku.

³³Taillermikun tumyarakun, ataam aturluku utertarkauluni, ellii-llu iterngaunani nunarpagmun, qanertuq ATANEQ.

³⁴Tua-i piyailkuciumaarkaungamku una nunarpak anirturnaluku, wangnek piteklua pitekluku-llu pisteka David-aaq.”

³⁵Taumi-llu unugmi an'gilaa ATANREM ayagtuq, tuqurqelluki-llu yuinaat pingayunelgen tallimanek tiissitsaat (185,000) uitaviatni Assyrian-aat; angutet-llu makcameng unuakuarmi, tangerrluku, makut tamarmeng tuqumalriit temait.

³⁶Tua-llu Sennacherib-aaq angayuqra Assyria-m ayagtuq, uterrluni nunaminun, uitaluni-llu Nineveh-mi.

³⁷Agayuinanrani-llu eniini Nisroch-am agayutmi, Adrammelech-aam Sharezer-aam-llu qetunraagken, tuqutaak nuussirpagkun, qimaglutek-llu Ararat-am nuniinun. Esarhaddon-aaq-llu qetunraa ataniurtuq enairluku.