Read Yupik 2 Kings 2 Bible Online

2 Kings 2 - Yupik bible

2 Kings 2

¹ATANREM Elijah teguqatallran nalliini qilagmun ayaulluku ull'uyakun, Elijah-nkuk Elisha-llu egilraullruuk Gilgal-aamek,

²tumemegni Elijah-m qanrutaa Elisha, “Wani uitaqaa; ATANREM Bethel-aaq kiturpek'naku ayaasqellruanga.” Tau͡gaam Elisha-m kiugaa, “ATANEQ unguvaciatun, elpet-llu unguvacirpetun, unisngaitamken.” Tua-i atrartuk Bethel-aamun.

³Prophet-aat-llu Bethel-aamelnguut anvikluku Elisha aptaat, “Nallunritan-qaa unuamek ATANERMUN elpenek teguqataucia angayuqan?” Elisha-m kiugaa, “Aa-ang, nallunritaqa. Tau͡gaam qalaruteksuumiitaqa.”

⁴Elijah-llu qanertuq Elisha-mun, “Wantauraa, ATANREM ayaasqaanga Jericho-mun.” Tau͡gaam Elisha kiuguq, “ATANEQ unguvaciatun elpet-llu unguvacirpetun unisngaitamken.” Tua-i ayagtuk Jericho-mun.

⁵Prophet-aat-llu Jericho-melnguut ullagluku Elisha aptaat, “Nallunritan-qaa unuamek ATANERMUN elpenek teguqataucia angayuqan?” Elisha kiuguq, “Aa-ang, nallunritua; tau͡gaam qalaruteksuumiitaqa.”

⁶Tua-llu Elijah-m qanrutaa Elisha, “Wantauraa, ATANREM ayaasqaanga Jordan-aam Kuiganun.” Tau͡gaam Elisha kiuguq, “ATANREM unguvaciatun elpet-llu unguvacirpetun, unisngaitamken.” Tua-i ayagtuk,

⁷yuinaak-llu malruk qulnek ciplukek (50) prophet-aat maligtagkek Jordan-aamun. Elijah-nkuk Elisha-llu arulairtuk kuigem canianun, taukut-llu yuinaak malruk qulmek ciplukek prophet-aat nangertut yaaqvaarilukek.

⁸Tuani Elijah-m ulikutani yuugaa imegluku-llu, piqerturaa-llu meq ulikutaminek; meq-llu avegtuq, qerartuk-llu kuigem akianun nunakun kinreskiikun.

⁹Qeraumariamek Elijah qanertuq Elisha-mun, “Qanrusnga camek wangnun pisqumallerpenek tegumavailegma.” Elisha-m-llu kiugaa, “Kaigavikamken, paitangqerceskia malrurqugnek tapluku anernerpenek.”

¹⁰Elijah-m-llu kiugaa, “Caperrnarqellriamek piteklirtuten; tau͡gaam akurturciqan tangvakuvnga elpenek tegumallemni; tangvanrilkuvnga akurturngaitan.”

¹¹Qalaruqu'urtuk-llu piyuanginanermegni; alqunaq-llu keneq pekcessuun akalrialek elussitangqerrluni kenernek akuliignun piuq, ull'uyam-llu Elijah qilagmun ayautaa!

¹²Elisha-m tangvagaa qayagpagluni-llu Elijah-mun, “Atamaa, atamaa! Pinilria ingluliurutestii Israel-aam! Ayagtuten!” Tangenqigtenritaa-llu Elijah. Angniinani-llu ulikutani allgaa avegluku.

¹³Elijah-m-llu ulikutaa tegua qainganek igtelleq, uterrluni-llu nangertuq Jordan-aam cen̄iinun.

¹⁴Meq-llu piqerturaa Elijah-m ulikutaanek qanerluni, “Nauwa ATANEQ, Agayutii Elijah-m?” Ataam-llu piqerturaa meq, avegtuq-llu, piyualuni-llu qerartuq akilirneranun.

¹⁵Prophet-aat yuinaak malruk qulmek cipluku Jericho-mek tangrraat qanerluteng-llu, “Pinia Elijah-m tut'uq Elisha-mun!” Pairrsaagaat-llu, ciuqerranun-llu pull'uteng nunamun,

¹⁶qanerluteng, “Yuinaak malruk qulmek ciplukek watua amllertaukut, tamamta pinilriaruluta. Ayagceskut yuaryarturluku angayuqan. Pingatuq anerneran ATANREM teguluku natmun ingrimun unitellia wall'u natmun kuignayugmun.” Elisha-m kiugai, “Qang'a, ayagyaqunaci.”

¹⁷Tau͡gaam aguagutellratni kiaruciirutnatkaanun ayagcetai. Ayagtut taukut yuinaak malruk qulmek ciplukek angucet, tamiini-llu yuarayaaqut Elijah-mek ernerni pingayuni, tau͡gaam nataqevkenaku.

¹⁸Utertut-llu Elisha-mun Jericho-mi utaqallrani, ellaitnun-llu qanertuq, “Qanrutellrunritamci-qaa ayaasqevkenaci?”

¹⁹Angutet-llu Jericho-mek Elisha ullagaat qanerluteng, “Nallunrilucirpetun, Elisha, una nunarpak assilriaruuq, tau͡gaam mer'a assinrituq irnicuarceciaqluni-llu.”

²⁰Ellimerrai-llu, “Qantaq nutaraq taryumek imirluku taiciu.” Tua-i taitaat elliinun,

²¹ayagluni-llu carvamun, eggluku-llu taryuq mermun, qanertuq-llu, “Waten qanertuq ATANEQ: ‘Una meq menuirutaqa; wak'nirnek meq'ellran tuqulriartangqercessngaitaa irnicuaralriartangqercessngaunaku-llu.’”

²²Tua-i meq menuirutellruuq una erneq engelkarrluku, Elisha qanellruciatun tuaten piciqniluku.

²³Elisha Jericho-mek ayagtuq Bethel-aamun; ayainanrani tan'gaurlucuaraat an'ut nunanek anglamiqutekluku-llu. Qayagpagaluteng, “Ayii maaken, qamiqulegmi mequmalriamek!”

²⁴Elisha-llu tuigtuq, tangvanerrlugtai-llu, aniqlaaluki-llu ATANREM atrakun. Malruk-llu arnacaluk taqukak napanek anlutek allguragkek yuinaak malruk malrugnek (42) cipingalriit tan'gaurluut.

²⁵Tuaken-llu ayagtuq egmirluni Ingrimun Carmel-aamun, tuaken-llu uterrluni Samaria-mun.