Read Yupik 2 Kings 21 Bible Online

2 Kings 21 - Yupik bible

2 Kings 21

¹Manasseh qula malrugnek cipluku (12) allrakungellruuq ayagnillermini ataniurluni, ataniullruuq-llu yuinaak malruk akimiarmek ciplukek (55) Jerusalem-aami. Aanii atengqertuq Hephzibah-mek.

²Calillruuq assiitellriamek tangvallrani ATANREM, aturluki uuminarqeqapigtellriit piciryarait angayuqauvingqellgutkelriit ATANREM anevkallrin Israel-aam yuin ciunratnek.

³Tua-i-wa nautenqigtellruamiki agayutnguanun ekuaviit Hezekiah-m atami piunrirtellri; ekuavililuni-llu Baal-amun, agayutngualiluni-llu Asherah-mek, kevgiurluki-llu Ahab-aam, angayuqran Israel-aam pillruciatun, agayuaqluni-llu agyanun qilagmelngurnun.

⁴Ekuavililuni Agayuvigpagmi, ATANREM qanrutkellrani ellii tuani agayularvikesqelluni.

⁵Ekuaviliuq-llu malrugni Agayuvigpiim elatiinelnguugnun carr'ilnguugni agayularvigkagnek agyanun.

⁶Ekualuku-llu qetunrani elliitekluku, qalartaqluni ciunerkamek canek-llu piarkanek, calillgutkaqluki-llu tuqumalriit qanellgutketukait angalkut-llu. Angelriamek assiilngillruuq ATANERMUN, eq'urtengevkarluku.

⁷Agayutngualiallni-llu Asherah-m ayuqii ellia Agayuvigpagmun tuavet ATANREM qanrutkellranun David-aamun, qetunraanun-llu Solomon-aamun: “Wani Jerusalem-aami, wani Agayuvigpagmi, uitauq cucukelqa qula malrugnek cipluku ilakellriartainek Israel-aam wangnun agayularvigkauluku;

⁸Israel-aam yuin niisngakatgu tamalkuan Alerquun Moses-aam kevgama cikiutekellra ellaitnun, antessngaitanka nunamek ciuliaritnun cikiuteklemnek.”

⁹Tau͡gaam Judah-m yuin maligtaqutenritut ATANERMUN, Manasseh-m-llu ciuliqagtai arcaqanritnun assiilngurnun atulallritnun angayuqauviit yuita ATANREM antellrin tamaaken nunamek yum'i ciunratnek.

¹⁰ATANEQ-llu qanertuq tumekluki pisten̄i prophet-aat,

¹¹“Manasseh-m, angayuqran Judah-m, atuaki makut uuminarqeqapigtellriit, arcaqanruqapigtellriit Amorite-at pillritni ciunermini uitallret, agayutnguamikun-llu ciuliqagtellruaki Judah-m yui assiilngirtelluki.

¹²Taumek waten qanertuq ATANEQ Agayutii Israel-aam, Taiciiqua Jerusalem-aamun Judah-mun-llu cakneq assiitqapigtellriamek assiilucia tamarmeng niicestai tatameciqut.

¹³Anucimirqecetaarciqaqa Jerusalem-aaq Samaria anucimirqecetaallemtun, Israel-aam-llu Angayuqra Ahab-aq kinguvri-llu pillrucimtun; perrirciqaqa-llu Jerusalem-aaq yuum perrilauciatun qantaq, perrirraarluku palurrluku-llu elliluku.

¹⁴Pegciiqanka-llu ilakuarrait unguvaqalriit, tunluki-llu ingluitnun, pitarkaurciiqut inglumeggnun uayaarautulriatun-llu ayuqeciqut,

¹⁵tua-i-wa caliangqellruata assiitellriamek tangvallemni, eq'uqertevkarlua-llu, ernermek tuaken ayagluteng atait anrraanratnek Egypt-aamek.”

¹⁶Manasseh-m pinarqutailnguut augat amlleq kuvaa, kiituani Jerusalem-aam tumyarai qurrlurtu'rtut augmek, man'a-llu ilallrukii maryarrluku Judah agayutnguanun, assiilngircelluki ATANREM tangvallrani.

¹⁷Wani-wa caliallrin ilait Manasseh-m, tamalkurmeng-llu callri, assiilnguq-llu atullra, tamakut-qaa igausnganritut kalikarni Judah-m Angayuqrin Igausngallrat?

¹⁸Manasseh-m-llu qavallgutkai atani, tungmagcimaluni-llu naucetaarvianun angayuqat eniita, naucetaarviani Uzza-m; Amon-aaq-llu qetunraa ataniurtuq enairluku.

¹⁹Amon-aaq allrakungellruuq yuinaq malrugnek (22) cipluku ayagnillermini ataniurluni, ataniullruuq-llu Jerusalem-aami malrugni allrakugni. Aanii atengqellruuq Meshullemeth-aamek panikluku Haruz-aam Jothbah-rmium.

²⁰Calillruuq-llu assiitellriamek tangvallrani ATANREM, atani Manasseh pillruciatun;

²¹tamalkuita ayuqeliluki atami caliallri, kevgiurluki-llu agayutnguat atami kevgiullri, agayuaqluni-llu tamakunun.

²²Cakaallrua ATANEQ, Agayutiit ciuliami, niisngavkenaki-llu ATANREM alerquutai.

²³Pistai-llu Amon-aam picirkiurtut inglukluku, tuqutaat-llu angayuqaq eniini.

²⁴Tau͡gaam Judah-m yuin tuqutait taukut tamalkuita Angayuqam Amon-aam tuqucestellri, Josiah-llu qetunraa angayuqrurtaat enairluku.

²⁵Amon-aam pillrin ilait callri, igausnganritut-qaa Kalikarni Igausngaviitni Atanrin Judah-m?

²⁶Tungmagcimauq qungurvianun naucetaarvianun Uzza-m; Josiah-llu qetunraa ataniurtuq enairluku.