Read Yupik 2 Kings 22 Bible Online

2 Kings 22 - Yupik bible

2 Kings 22

¹Josiah-q pingayunlegnek allrakungellruuq ayagnillermini ataniurluni Judah-mi, ataniullruuq-llu yuinaq qula ataucimek (31) cipluku Jerusalem-aami. Aanii atengqellruuq Jedidah-mek panikluku Adaiah-m Bozkath-armium.

²Calillruuq ellualriamek tangvallrani ATANREM, ayuqucingqerrluni-llu ayuqucillranek ciuliami David-aam, maliggluki Agayutem alerquutai.

³Akimiaq pingayunek cipluku (18) allrakungluki ataniullran Angayuqam Josiah-m ayagcetaa Shaphan-aaq qetunraa Azaliah-m, qetunraan Meshullam-aam igartem, Agayuvigpagmun qanerluni:

⁴“Ayii Agayulirten͞gunermun Hilkiah-mun, qanrutekniarai amllertaciit akit agayulirten͞gunret quyurtellrit yugnek Agayuvigpiim iteryaraani.

⁵Qanrutniaran akit tunesqelluki calistainun Agayuvigpiim kitugutain. Akilirarkaugait

⁶muraliurtet, enelistet, teggalqiurtet-llu, akikluki-llu kiputellritnun muragnun teggalqunun-llu, tumarutkainun enem.

⁷Cikiumallret akinek naaqillgutken̄arqinritut tunumallernek ellaitnun, assirluki auluk'laitki.”

⁸Hilkiah-llu agayulirten͞guneq qanertuq Shaphan-aamun igartem̄un, “Nataqellruanka kalikait Alerquutet Agayuvigpagmek.” Hilkiah-m-llu tunai kalikat Shaphan-aamun, elliin-llu naaqai.

⁹Shaphan-aaq-llu utertuq angayuqamun, qanemciluni-llu, “Pistevvet teguit akit Agayuvigpagmi uitallret tunluki-llu atanerruaritnun kitugcilalriit.”

¹⁰Tua-llu qanertuq, “Hilkiah-m agayulirtem cikillruanga kalikarnek.” Naaqitaa-llu angayuqaq qastuluni.

¹¹Angayuqam-llu niicamiu naaqumallrat alerquutem kalikain, aturani allgurai civuuraluni.

¹²Mat'umek-llu alerquraa Hilkiah-q agayulirta, Ahikam-aaq-llu qetunraa Shaphan-aam, Achbor-aq-llu qetunraa Micaiah-m, Shaphan-aaq igarta, Asaiah-q-llu angayuqam nayurtii, qanerluni:

¹³“Ayagluci apqaurucicarturcia ATANERMUN, Judah-m-llu yui tamalkuita, alerquutaitnek ukut kalikaat, angelriaruan-wa eq'uqertii ATANREM kumangelria wangkutnun, ciuliamta atullrunrilatki igausngalriit ukuni kalikarni, atuugarkauyaaqelriit igausngacimegcetun wangkuta pitekluta.”

¹⁴Tua-i Hilkiah agayulirta, Ahikam-aaq, Achbor-aq, Shaphan-aaq, Asaiah-llu ayagtut Huldah-mun arnamun prophet-aamun, nulirranun Shallum-aam qetunraan Tikvah-m, qetunraan Harhas-aam, murilkestiin aturarviim, (watua uitaluni Jerusalem-aami Second Quarter-aami) qanrutaat-llu tamatumek.

¹⁵Arnam-llu qanrutai uterrluki angayuqamun qanrutesqelluku,

¹⁶mat'umek qaneryaramek ATANERMEK kingunelegmek: “Anucimirqecetaaqata'arqa Jerusalem-aaq tamalkuita-llu yui, kalikarni angayuqam naaqellrin igausngaciicetun.

¹⁷Ellaita cakaallruatnga ekuagiaqluteng-llu aruviarnek allanun agayutnun, eq'urtelqa kumarcatgu caliamegteggun tamalkuitgun. Eq'utelqa kumanguq Jerusalem-aam tungiinun, nipcimangaunani-llu.

¹⁸Tau͡gaam angayuqranun Judah-m, ayagcecestellerpeci apqaurucicesqelluni ATANERMUN, waten qanqici, Waten qanertuq ATANEQ, Agayutii Israel-aam: niilluki igausngalriit kalikarni,

¹⁹umyualinqigcavet ircaqurpegun, ellmikutuurrluten-llu ciuqamni, niitellerpeni aniqlaateka uumun nunamun, yuinun-llu, nunakarniiruciiqniluku yui-llu aniqlaatngurciiqniluki, allgullruavki-llu aturaten qialuten ciuqamni, wiinga-llu niitellruaqa piicauten, qanertuq ATANEQ,

²⁰taumek quyurciiqamci atavcen̄un, yuunrirciquci-llu nepaitmi, iigpeci-llu tangerrngaitaat assiitellria taitarkaqa maavet nunamun.” Taukut-llu angutet utertut Angayuqamun Josiah-mun mat'umek qanerkarluteng.