Read Yupik 2 Kings 24 Bible Online

2 Kings 24 - Yupik bible

2 Kings 24

¹Jehoiakim-aam angayuqrullran nalliini Nebuchadnezzar-aam, angayuqran Babylon-aam, anguyagaa Judah, Jehoiakim-aaq-llu pisteksagutaa pingayuni allrakuni; tua-llu ingluliurutuq Nebuchadnezzar-aamun.

²ATANEQ ayagceciuq anguyagten̄ek Chaldean-aanek, Syrian-aanek, Moabite-anek, Ammonite-anek-llu anguyagluku Jehoiakim-aaq piunrirrnaluku Judah, ATANEQ qanellruciatun, pisten̄i prophet-aat tumekluki, tuaten piciqniluni.

³Man'a waten piuq alerquuciatun ATANREM, au͡gaasqelluki Judah-m yui tangerqem̄inek, tamalkuita assiilnguut pitekluki Manasseh-m atullri,

⁴pinarqutailnguut-llu augit pitekluki aunrarcetellri; tua-i imillruaku Jerusalem-aaq pinarqutailnguut augitnek, ATANREM-llu au͡g'aricunritaa tamatumek.

⁵Wani-wa caliallrin Jehoiakim-aam, tamarmeng-llu pillri, igausnganritut-qaa Kalikarni Igausngaviitni Angayuqrin Judah-m?

⁶Jehoiakim-aam-llu qavallgutkai atani, Jehoiachin-aaq-llu qetunraa ataniurtuq enairluku.

⁷Angayuqra-llu Egypt-aam anenqigtenrituq Egypt-aamek, tua-i-wa angayuqran Babylon-aam tegullruaku tamalkuan angayuqran Egypt-aam pikillra ayagluku Brook of Egypt-aamek tekilluku Euphrates River-aaq.

⁸Jehoiachin-aaq akimiaq pingayunek cipluku (18) allrakungellruuq angayuqrurtellermini, ataniullruuq-llu iraluni pingayuni Jerusalem-aami. Aanii atengqertuq Nehushta-mek panikluku Elnathan-aam Jerusalem-aarmium.

⁹Assiitellriamek calillruuq tangvallrani ATANREM, aturluki tamalkuita atami pillri.

¹⁰Angayuqrullran nalliini Babylonian-aat anguyagcet, ciuliqagterluteng Angayuqam Nebuchadnezzar-aam atanerruarinek, ullallruat Jerusalem-aaq kassugulluku-llu.

¹¹Nebuchadnezzar-aaq-llu angayuqra Babylon-aam taiguq Jerusalem-aamun pistem̄i kassugusngainanrani;

¹²Jehoiachin-aaq-llu angayuqra Judah-m tun'uq ellminek angayuqranun Babylon-aam, ellii, aanii, pistai, atanruvigmi-llu atanerruari. Angayuqran-llu Babylon-aam teguaqsagutaa pingayunelgatni allrakut ataniullrin,

¹³ayaulluki-llu tamalkuita akitulriit Agayuvigpagmi, angayuqam-llu eniinelnguut, navgurluki-llu tamalkuita suulutaat assigtat Solomon-aam Israel-aam angayuqran piliallri, ATANREM ciunguluku qanrutkellruciatun tuaten piarkaullra.

¹⁴Ayautai-llu tamalkuita Jerusalem-aam yui, tamalkuita angutet alingura'arpek'nateng pinilriit, qulen tiissitsaat (10,000) amllertaluteng quyurrluteng, tamalkuita-llu elisngalriit calianek, ilakluki caviliurtet; kina uitavkenani, kiingita tua-i yuut arrsaunkacagai unilluki Judah-mi.

¹⁵Nebuchadnezzar-aam ayautaa Jehoiachin-aaq Babylon-aamun, aanii, nulirri, atanerruari, angutet-llu ciuliqagtai Judah-m.

¹⁶Angayuqran-llu Babylon-aam ayautai angutet alingura'arpek'nateng pinilriit amllertaluteng tiissitsaat malrunelgen (7,000), tiissitsaat (1,000) elisngalriit calianek ilakluki caviliurtet, tamarmeng pinirluteng anguyautmun engelqerruluteng.

¹⁷Angayuqran-llu Babylon-aam, Mattaniah Jehoiachin-aam angii, angayuqrurtaa Judah-mun Jehoiachin-aaq enairluku atra-llu cimirluku Zedekiah-mek.

¹⁸Zedekiah allrakungellruuq yuinaq ataucimek cipluku (21) angayuqrurtellermini, atanrullruuq-llu qula ataucimek cipluku (11) allrakuni Jerusalem-aami. Aanii atengqertuq Hamutal-aamek panianek Jeremiah-m Libnah-rmium.

¹⁹Angayuqaq-llu Zedekiah calillruuq assiitellriamek tangvallrani ATANREM, Jehoiakim pillruciatun.

²⁰ATANEQ-llu eq'urteqapigcami Jerusalem-aam Judah-m-llu yuinun au͡g'allrui tangerqem̄inek. Zedekiah-llu inglulituq angayuqranun Babylon-aam.