Read Yupik 2 Kings 25 Bible Online

2 Kings 25 - Yupik bible

2 Kings 25

¹Qulngunritariitni allrakut ataniullmi, qulngurutiitni iralut, qulngurutiitni iralum erenrin, Nebuchadnezzar-aaq Babylon-aam angayuqra taiguq malikluki tamalkuita anguyagten̄i; kassugulluku-llu; avatiikun-llu qacarneq naparrluku.

²Nunarpak-llu kassugusngallruat Angayuqam Zedekiah-m atanirturillra qula ataucimek allrakungellranun.

³Erenrin qulngurutiitni iralut cetamiita piitnaq arcaqassiyaagan nunarpagmi neqkairutut yui.

⁴Tua-llu navgutut nunarpiim qacarnerakun; Babylonian-aat-llu kassugusngangraatgu nunarpak tamarmeng anguyagcet qimagtut unugmi. Tumekluku atanruviim naucetaarvia, anluteng-llu iteryarakun akuliignelngurkun qacarnerek, qimagluteng-llu Arabah-m tungiinun.

⁵Tau͡gaam Babylonian-aat anguyagtaita kingunrirturluku Angayuqaq Zedekiah, anguluku teguat manigcetellriami yaaqsinrilkiini Jericho-m; tamarmeng-llu anguyagtain unitaat.

⁶Ayautaat-llu Angayuqamun Nebuchadnezzar-aamun Riblah-mun uitavianun, tuani-llu Nebuchadnezzar-aam itengqallerkiuraa.

⁷Zedekiah-mun-llu tangvagcelluki qetunrai tuqutait, Nebuchadnezzar-aam-llu Zedekiah-m iik qagercetak, kalivnercirluku-llu ayaulluku Babylon-aamun.

⁸Iralut tallimiitni, malrunelgatni iralum erenrin yuinaunritariitni allrakuin Angayuqam Nebuchadnezzar-aam, Babylon-aam angayuqran, Nebuzaradan-aaq, ciuqliat angayuqam murilkestain, anguyagtain-llu atanirturtiit tekituq Jerusalem-aamun.

⁹Ekuavkarluki-llu enii Agayuvigpak, angayuqam enii, tamalkuita-llu Jerusalem-aami piuranrita enait.

¹⁰Anguyagtain-llu Chaldean-aat pillgutain ciuliqagtiita qaunqestet, itumtait qacarneret avatiinelnguut Jerusalem-aam.

¹¹Tamalkuita-llu yuut uitaqallret nunarpagmi Nebuzaradan-aam ayautai Babylon-aamun, uitaqallret elisngalriit calianek, ilautellret-llu Babylonian-aanun.

¹²Tau͡gaam unitai Judah-mun ilait arrsaunkacagait yuut, nunautailnguut, wine-aliurten͞gusqelluki naucetaarvigni-llu calisqelluki.

¹³Naparyat-llu punerneret Agayuvigpagmi uitallret, akalrialget-llu atuulalriit Agayuvigpagmi, angtuaq-llu punerneq mervik navguqapigtait, ayaulluki-llu punerneret Babylon-aamun.

¹⁴Ayaulluki-llu egatet, qanikciurutet, nipcissuutet, qantat aruviarcuutet, tamalkuita-llu assigtat punerneret atuulallret agayuvigpagmi agayuaqata,

¹⁵kenercissuutet-llu qantat uivluaraat. Tamalkuita ayaulluki cat pilimalriit suulutaat wall'u qerrirlit.

¹⁶Taukuk-llu punernerek malruk naparyak, angelria-llu mervik, Solomon-aam piliallri Agayuvigpagmun, uqamaicessiyaagameng qaillun uqamaltassiarciiganateng.

¹⁷Naparyak ayuqlutek: tamarmek yuinaq malrunlegnek (27) it'ganernek quyigtalutek, qulirnerkun-llu kangliumaluni punernermek sugtutaluni tallimiit avguluku it'ganernek. Tamarmek kassutmun kuvyangalngurmek qaralirlutek pomegranates-aanek punernernek.

¹⁸Ilakluku-llu, Nebuzaradan-aam, ciuqliata qaunqestet tegua Seraiah agayulirtet ciuqliat, Zephaniah-llu tungliq agayulirta, pingayun-llu iteryaram tarikestai.

¹⁹Nunarpagmek-llu tegutuq ciuliqagtiitnek anguyagtet, tallimanek-llu angutnek angayuqam ayuqucirturtainek nunarpagmi cali uitalrianek; igartiinek-llu ciuliqagtiita anguyagtet, taum ataniumai anguyagtaat kalikaat, allanek-llu yuinarnek pingayunek (60) quyilrianek angutnek.

²⁰Nebuzaradan-aam-llu ayautai angayuqranun Babylon-aam, Riblah-m nunarpiini.

²¹Angayuqran-llu Babylon-aam nangcetai tuqulluki-llu Riblah-mi nunami Hamath-aami. Tua-i Judah ayaucimauq nunaminek.

²²Taukunun-llu uitaqalrianun nuniini Judah-m, Nebuchadnezzar-aam angayuqran Babylon-aam unitellrinun, angayuqaurtaa Gedaliah Ahikam-aam qetunraa, Shaphan-aam qetunraan, nunam angayuqran.

²³Waniwa ciuliqagtaita anguyagtet yuilqumelnguut anguyagteteng ilakluki niitaat angayuqranun Babylon-aam Gedaliah nunamun angayuqrurrniluku, ayagtut-llu malikluki anguyagteteng Gedaliah-mun Mizpah-mi, ukuuluteng: atanerruarat Ishmael-aaq qetunraa Nethaniah-m, Johanan-aaq qetunraa Kareah-m, Seraiah qetunraa Tanhumeth-aam Netophathite-am, Jaazaniah-llu qetunraa Maacathite-am.

²⁴Gedaliah-m-llu qanrutai, “Alingyaqunaci Chaldean-aat atanerruaritnek; uitaurci nunami, kevgiurluku angayuqra Babylon-aam, cat assirluteng pinaurtut elpecen̄un.”

²⁵Tau͡gaam malrunelgatni iralut, Ishmael-aaq qetunraa Nethaniah-m, qetunraan Elishama-m, angayuqam ilakuralriartaan iliit, taiguq maligluni qulnek angutnek, yaggluku-llu tuqutaat Gedaliah, Israelite-at-llu Chaldean-aat-llu uitallgutai Mizpah-mi.

²⁶Tua-llu tamarmeng yuut, arrsaulriit tukuulriit-llu, ciuliqagtait-llu anguyagtet nangertut, ayagluteng-llu Egypt-aamun; tua-i-wa alingameng Chalean-aanek.

²⁷Yuinaq akimiaq malrugnek (37) allrakungellrani teguarullran Jehoiachin-aaq angayuqra Judah-m, qula malruurteqerluki allrakut, yuinaq malrunlegnek cipluku ernengqerluku iraluq, Evilmerodach-aaq angayuqra Babylon-aam, allrakumi ayagnillermini ataniurluni, takumcuyukapiggluni angitaa Jehoiachin-aaq angayuqra Judah-m itercivigmek;

²⁸assirluku pia quyinratnek-llu takarnarqutmek piluku, pillmi ilainun allanun angayuqat teguarumilriit elliitun Babylon-aami.

²⁹Tua-i Jehoiachin-aam aturani itengqallermini atullni yuugai. Unguvami-llu taktaciatun unuaquaqan nerlartuq angayuqam estuuluani.

³⁰Erenret-llu tamalkuita, unguvami taktaciatun, cikiumalartuq angayuqamek canun aturyuk'ngaminun atu'urkaminek.