Read Yupik 2 Kings 3 Bible Online

2 Kings 3 - Yupik bible

2 Kings 3

¹Jehoshaphat-aam Judah-m angayuqran atanirturillra amllertariqerluki allrakut akimiaq pingayunek cipluku (18), Jehoram-aaq Ahab-am qetunraa angayuqrurtuq Israel-aami, Samaria-mi-llu atanirturiluni allrakuni qula malrugnek cipluku.

²Assiitellriamek calillruuq ATANREM tangvallrani, tau͡gaam utumanruluni atamini aanamini-llu Jezebel-aami; au͡g'araa-llu agayutnguaq Baal-aq atami piliallra.

³Tau͡gken ciuqlirmitun Angayuqatun Jeroboam-aatun Nebat-aam qetunraatun, ciuliqagtellrua Israel-aaq assiilngurmun taqsugpek'nani-llu.

⁴Tamaani Mesha angayuqra Moab-am qusnginek anglicarilartuq; allamiaqan-llu taitelaraa Israel-aam angayuqra tallimanek tiissitsaanek (100,000) qusngiyagarnek, melqurritnek-llu yuinaat talliman tiissitsaat (100,000) angucalut qusngit.

⁵Tau͡gaam Ahab-aq tuquan, angayuqra Moab-am inglulituq Israel-aamun.

⁶Egmianun-llu Angayuqaq Jehoram-aaq ayagtuq Samaria-mek quyurrluki-llu tamalkuita anguyagten̄i.

⁷Qanermek-llu ayagceciuq Jehoshaphat-aamun Judah-m angayuqranun; “Angayuqra Moab-am inglulituq wangnun; maligciiqerpenga-qaa Moab-aq anguyakumku?” Angayuqam Jehoshaphat-aam kiugaa, “Camek pisqumakuvnga piqainaugua, anguyagtenka-llu tuaten piut elussitanka-llu.”

⁸Qanerluni-llu, “Nau͡gg'un ayagciqseta?” Jehoram-aam kiugaa, “Yaaqsinrakun ayagciqukut yuilqurtaa Edom-aam tumekluku.”

⁹Tua-i angayuqra Israel-aam ayagtuq maligluni Judah-m angayuqranek Edom-aam-llu angayuqranek. Pektellerteng nalkuirpek'nateng ernengluku malrunlegni meriutut, merkairulluteng anguyagtet ungungssiit-llu akluitnek atmalget.

¹⁰Tua-llu angayuqra Israel-aam qanertuq, “Qaillun pisciigaliukut! ATANREM elliakut pingayuni Moab-am angayuqranun piyullratun pisqelluta.”

¹¹Jehoshaphat-aaq-llu qanertuq, “Prophet-aamek-qaa pitaituq man'a tumekluku kangiituryaqput ATANEQ?” Tua-llu Israel-aam angayuqran pistain iliita kiugaa, “Elisha Shaphat-aam qetunraa maantuq. Elijah-m ikayuqellrua.”

¹²Jehoshaphat-aaq-llu qanertuq, “Tauna piciuluni prophet-aaruuq.” Tua-i angayuqra Israel-aam, Jehoshaphat-aaq, Edom-aam-llu angayuqra ayagtut Elisha-mun.

¹³Elisha-llu qanertuq angayuqranun Israel-aam, “Ciin wiinga ikayuryarciken? Ayagluten kangiiturviksarturki prophet-aat atavet aanavet-llu kangiiturvik'lalkek.” Tau͡gaam angayuqran Israel-aam kiugaa, “Qang'a; ATANREM ellillruakut pingayuni angayuqani Moab-am angayuqranun piyullratun pisqelluta.”

¹⁴Elisha-llu qanertuq, “ATANERKUN unguvalriakun, kevgiuqengaqa, piciulua qanertua cateksanritamken qigcikenrilkumku ililirten Judah-m angayuqra Jehoshaphat-aaq.

¹⁵Tau͡gaam watua aturcetaartem̄ek taicia.” Aturcetaarta-llu aturcetaarinanrani ATANREM pinian Elisha tutaa,

¹⁶qanertuq-llu, “Waten qanertuq ATANEQ, ‘Man'a kinreskii kuik nanvarraarnek pitangevkarciqaqa.

¹⁷Tangerrngaituci anuqmek ellallugmek-llu, tau͡gaam kinreskii kuik imangeciquq mermek, elpeci-llu, kuluvaci, ungungssit-llu akluvcen̄ek atmalget merkarpecen̄ek nuryugcingaituci.’”

¹⁸Cali Elisha qanertuq, “Man'a-llu cali caperrnarqenrituq ATANERMUN; elliin ilaluku cikirciqaaci Moabite-anek cirlakillerkarpecen̄ek.

¹⁹Cirlakciqaci-llu tamalkuita cayailkuciumalriit tangkegcinarqelriit nunarpait; iquciiqaci atsangtulit napautait, arulairrluki carvat mer'et, naungignarqellriit-llu naucetaarviit atuunrirluki patuluki teggalqunek.”

²⁰Unuaquan, ekuagiyaram elliitnek nalliini, meq carvuq Edom-aam tungiinek nuna-llu patuluku.

²¹Moabite-at niicameng angayuqanun anguyagyartuucirmeggnek, tamalkuita angucet caskunek tegumiaryugngalriit, ayagyuankacagameggnek ak'allaunkacagameggnun, qayagaurumaut nunalgarcimaluteng-llu manuqliuluteng.

²²Unuaquan makcameng, akertem meq ciqinqaumaluku, Moabite-at tangrraat akilirnemeggni kavircen̄ani augtun ayuqluni.

²³Qanertut-llu, “Man'a auguuq! Pingayun inglukutellriit anguyagtet callullrungatut tuqurqulluteng! Ayagluta uayaryarturnaurarput pelateka'arviit!”

²⁴Tau͡gaam tekicatgu pelatekarvik, Israelite-at curukarait kaiyimluki kingutmun. Israelite-at maligtait, tumemeggni tuqutaqluki Moabite-at

²⁵nunarpait-llu tamalkuita piunrirrluki. Kituraqamegteki nunakeggneret, tamarmeng Israelite-at teggalqunek eggvik'larait naucetaarviit tamarmeng patunatkaatnun; arulairtaqluki-llu carvat mer'et, iqulluki-llu tamalkuita assilriit atsanek naugitulit napat; kiituani nunarpak Kir Heres-aaq angayuqam uitavia kiimi ellirtuq, elluqustet-llu kassugulluku teguat.

²⁶Tuani Moab-am angayuqran tangrramiu cirlakumaqatallni, tiissitsaam avga yuinarnek qulnek cipluku (700) anguyagten̄ek nuussirpalegnek malilirluni pellungnaqsaaqai ingluni qimagnaluni angayuqranun Edom-aam; tau͡gaam pisciigatut.

²⁷Tua-i tegua yum'i amaqliat, atanirturiarkauyaaqelleq kingumikun, ekualuku-llu nunarpiim qacarneran qaingani elliitekluku agayutiinun Moab-am. Israelite-at-llu cakneq alingenga'artut; tua-i kingupiartut nunarpagmek uterrluteng-llu nakmiin nunameggnun.