Read Yupik 2 Kings 4 Bible Online

2 Kings 4 - Yupik bible

2 Kings 4

¹Wani nulirra iliita quyungqalriit prophet-aat ayagtuq Elisha-mun qanerluni-llu, “Uika tuquuq! Nallunrilucirpetun, Agayun qigcikluku yuullruuq, tau͡gaam watua angun akiilngungqerrvia taiguq teguyarturlukek qetunraagka pisteknalukek akiliuteklukek uima akiilnguanun.”

²Elisha-m-llu qanrutaa, “Camek piciqsiken? Qanrusnga, camek pingqercit enevni?” Arnaq kiuguq, “Camek piitua, angenrilngurmek tau͡gaam assigtamek uqumek imalegmek.”

³Tua-llu Elisha-m qanrutaa, “Elaqlirpenun agluten navraa imailngurnek assigtanek piugngatacirpetun.

⁴Qetunraagken-llu iterci enemun, patuluku amiik, uqumek-llu imirluki assigtat; una muiraqan calligtaqluku.”

⁵Tua-i arnam unilluku itertuq eneminun qetunraagni maliklukek, amiik-llu patuluku, teguluku-llu angenrilnguq assigtaq uqumek imalek kuvluku-llu caqutnun qetunraagmi taitaqagneki.

⁶Tamarmeng imangata assigtat, aptuq allamek cali pitangqerrucianek. Aipaagnek-llu kiugaa, “Tauna nangenruuq.” Uquq taq'uq maqnermek.

⁷Arnam-llu uterrvikluku Elisha, prophet-aaq qanrutaa, taum qanrutaa, “Ayagluten tunyarturki uqut akililluki-llu tamalkuita akiilnguten, ilakuarit qetunraagken-llu yuutekniaci.”

⁸Erenret iliitni Elisha ayagtuq Shunem-aamun, tuani tukuulria arnaq uitauq. Kelgaa-llu neresqelluku, tuakenirnek-llu ayallni tamalkuan Shunem-aamun nerlartuq taum arnam eniini.

⁹Arnaq-llu qanertuq uiminun, “Taringaqa una maavet taiguralalria Agayutmun yuk'ucia tanqilriaruluni.

¹⁰Ataki angenrilngurmek eneliqaalta enem qaingani inglercirluku, estuulumek, aqumllermek, kenurralirluku-llu, nani taigaqami tuantelarniartuq.”

¹¹Erenret iliitni Elisha utertuq Shunem-aamun mayurluni-llu tuavet enecuarmun mernuinercirnaluni.

¹²Pisten̄i-llu Gehazi qanrutaa, “Taisqiu Shunammite-aq.” Taingan,

¹³qanertuq Gehazi-mun, “Qanrusgu, tangrriu yagarutkellruan man'a wangkuk piteklunuk: akiluku camek wangnun pisqumasit? Angayuqamun-qaa wall'u anguyagtet atanirturtiitnun camek qanrucicesqumauten?” Arnam-llu kiugaa, “Kepqutaitua maani nakmiin yuunka ilagarluki uitiima.”

¹⁴Elisha-m Gehazi aptaa, “Camek-mi tua-i wii piciqsia elliinun?” Gehazi kiuguq, “Atam-wa arnaq qetunraituq, uinga-llu ak'allaurrluni.”

¹⁵Elisha-llu ellimeqlirtuq, “Qanrusgu wavet taisqelluku.” Tailuni-llu nangertuq amiigmi.

¹⁶Elisha-m-llu qanrutaa, “Uum nalliini allamiku qetunramek tegumiarciquten.” Arnaq qanlertuq, “Ala-i! Nakleklua iqluunrilnga. Agayutem yukaaten!”

¹⁷Tau͡gaam arnaq qingartuq, qetunrangluni-llu tuani up'nerkaan, Elisha-m qanrutellruciatun.

¹⁸Allrakut qavcin kinguatni, quyurciyaram nalliini, unuakut iliitni tan'gaurluq an'uq atani ullagluku, calillrani naucetaarvigmi calilriit quyurciluteng ilagarluki.

¹⁹Piqatarraarpek'nani qanertuq ataminun, “Qamiquqa akngirnarquq! Qamiquqa akngirnarquq!” “Kevegluku agusgu aaniinun,” atii qanertuq pistem̄un.

²⁰Tua-i kevegluku aaniinun agutaa, aaniin-llu tegumiaqaa mikelnguq erenrem qukallra tekilluku, taum-llu nalliini tuquluni.

²¹Arnam-llu mayuulluku ellia Elisha-m ingelrinun, amiik-llu patuluku an'uq.

²²Uini-llu qayagaurluku qanrutaa, “Taivkari pistet iliitnek ciulvagmek malilirluku. Prophet-aaq Elisha ullagnarqaqa. Piugngaritemni uterciiqua.”

²³Uingan-llu aptaa, “Ciin unuamek ayakatarcit? Sabbath-aarunrituq wall'u Nutaram Iralum Nerevkaritekevkenaku.” Arnaq qanertuq, “Canrituq.”

²⁴Arnam-llu aqumviliraa ciulvak, qanerluni-llu pistem̄un, “Ayagcessgu ciulvak cukataciatun, cukailcaryaqunaku-llu pisqevvailemken.”

²⁵Tua-i ayagtuq tekilluni-llu Elisha-m uitavianun Mount Carmel-aami. Elisha-m-llu tangrramiu agiirtellrani qanertuq Gehazi-mun pistem̄inun, “Atam man'a, arnaq Shunammite-aq tailria!

²⁶Aqvaqurluten pairrsaaggu apniaran canriluciitnek ellii, uinga, qetunraa-llu.” Arnam-llu Gehazi qanrutaa qaillun pinritniluteng,

²⁷tau͡gaam tekicami Elisha-mun, put'uq ciuqerranun it'gaakun-llu teguluku. Gehazi-m ullagluku tuaken cingqataryaaqaa. Tau͡gaam Elisha qanertuq, “Uitasgu, tangenrritan-qaa cakviuqapigtellra? ATANREM-llu mat'umek qanruteksaitaanga.”

²⁸Tua-llu arnaq qanertuq, “Kaigavikellruamken-qaa qetunrarkamnek? Qanrutellrunritamken-qaa ellmikun neryuniurutkamnek pisqevkenii?”

²⁹Elisha-m tuiggvikluku Gehazi qanrutaa, “Naquggluten, ayaruqa aturluku ayii. Pairkengkuvet kitumek arulairluten aryuqutmek piyaqunaku; kia-llu aryuqutmek pikaten akiyaqunaku; cumiggluten enemun agkina ayaruqa-llu kegginaanun mikelnguum elliluku.”

³⁰Tua-llu aanii mikelnguum qanertuq, “ATANEQ unguvaciatun elpet-llu unguvacirpetun, wiinga unisngaitamken.” Tua-i Elisha-m nangerrluni maligtaa arnaq.

³¹Gehazi-llu ayagtuq ciungagnegun elliluku-llu ayaruq kegginaanun mikelnguum, tau͡gaam nepaituq tangellra-llu tuqumalriatun ayuquq. Tua-i utertuq Elisha pairrsaagluku qanerluni-llu, “Mikelnguq tupanrituq.”

³²Elisha itrami enemun tangrraa mikelnguq inglerni tuqumaluku.

³³Elisha iterluni amiik patuluku, allamek ilaunatek, piicagtuq ATANERMUN.

³⁴Qainganun-llu mikelnguum inartuq, qaneni qanranun elliluku, iigni-llu iigkenun, unatni-llu unatainun; qainganun Elisha nengcan mikelnguum kemga puqlanguq.

³⁵Ataam makluni Elisha utertaartuq, ataam-llu mayurluni nengtuq mikelnguum qainganun; mikelnguq-llu aqestuq malrunlerqunek, iigni-llu uillukek.

³⁶Elisha-m Gehazi taisqelluku qanrutaa mikelnguum aanii taisqesqelluku. Itran Elisha-m qanrutaa, “Waniwa qetunraan.”

³⁷Arnam put'uq Elisha-m it'gainun, nuna agturluku; qetunrani-llu teguluku an'uq.

³⁸Elisha ataam tekituq Gilgal-aamun piitnaq tusngallrani tamiini nunami. Elitnauriinanermini quyungqalrianek prophet-aanek, qanrutaa pisten̄i, “Kenermun egalvagmek maniiluten, soup-amek keniuski prophet-aat.”

³⁹Iliit an'uq naucetaarvigmun avurnaluni naumalrianek, nataqulluni-llu wine-at avayaatnek avurluni-llu manuni imiraa nakacuguaruluki, uterrluni-llu ingqiluki keniramun avulluki, nalluluki cauciit.

⁴⁰Neqliurluki-llu angutet neresqelluki. Tau͡gaam uigutmeggni qanertut Elisha-mun, “Agayutem yuani, man'a keniraq tuqunarqelriamek avungqertuq!” Neryuumiinaku-llu.

⁴¹Elisha qanertuq. “Taicia mukaarkamek miilimalriamek.” Egatmun-llu kuvaa, qanerluni-llu, “Cali neqliurciki.” Tamana-llu neqiit camek canganarqellriamek pitaituq.

⁴²Cat iliitni angun taiguq Baalshalishah-mek, tailluku Elisha yuinarnek barley-nek kelipanek, tuani allrakumi qecukarraallernek, nutaranek-llu miilimanrilngurnek mukaarkanek. Elisha-m kevgani ellimerraa taukut prophet-aat nerevkaasqelluki tamakunek,

⁴³tau͡gaam pistem kiugaa, “Qaillun ukut neqkiutekqatarcia yuinarnun tallimanun (100) angutnun?” Elisha-llu ataam qanenqigtuq, “Tuniki nernaurtut, waten qanran ATANEQ, ‘Nerciqut ilakuiluteng-llu.’”

⁴⁴Tua-i pistem neqkat ellii ciuqerratnun. Tamarmeng-llu ner'ut ilakuiluteng-llu, ATANREM qanellruciatun.