Read Yupik 2 Kings 5 Bible Online

2 Kings 5 - Yupik bible

2 Kings 5

¹Naaman-aaq, atanirturtiit anguyagtain Syria-m, quyilriamek pirpakellrua pivakluku angayuqran Syria-m, Naaman-aaq-wa tumekluku ATANREM qakvaucetellruaki Syria-m anguyagtai. Pinilriaruluni alinguraralriaruvkenani, tau͡gaam apqucingqertuq mamyuilngurmek.

²Tamaani Israel-aat iliitni anguyallermegteki ayautellruut nasaurlucuarmek Israelite-amek, nulirran-llu Naaman-aam pisteksagulluku.

³Erenret iliitni qanertuq arnamun pikestem̄inun, “Angayuqama-tuq tangerrsarturliu prophet-aaq Samaria-mi! Canrircecaraa mamyuilnguanek.”

⁴Naaman-aam man'a niicamiu ullagluku angayuqaq qanrutaa nasaurluum qanellranek.

⁵Angayuqaq-llu qanertuq, “Ayii wanirpak, igamek ayagceciciqua angayuqratnun Israel-aat.” Tua-i ayagtuq, ayaulluni tiissitsaanek qulnek (30,000) qerrlimek, arvinlegnek tiissitsaanek (6,000) suulutaanek, qulnek-llu aturaqegtaarnek.

⁶Igaq-llu angayuqratnun Israel-aat tunyarturaa, qanrumalria, “Uum igam tekiskaten, nallunritniaran Naaman-aaq pisteka elpenun ayagcessuciqa, canrircecesqelluku mamyuilnguanek.”

⁷Angayuqran-llu Israel-aam naaqngamiu igaq, aturani allgurai qanerluni-llu, “Agayutnguunga-qaa tuquciyugngalua unguvavkariyugngalua-llu, taumek-qaa uum angutem igaqiinga canrircecesqelluku angun mamyuilnguanek? Nallunaituq qanemyuugautmek ayagniringnaquq ingluklua.”

⁸Tau͡gaam prophet-aaq Elisha niicami angayuqratnun Israel-aat allgurniluki aturani, qanrucarturcetaa angayuqaq qanerluni, “Ciin allgurciki aturaten? Taivkarru watua wangnun, nallunrirnauraa prophet-aartangqerrucia Israel-aami.”

⁹Naaman-aaq taiguq elussitamikun pekcessuutetgun-llu, arulairluni-llu amiiganun Elisha-m eniin.

¹⁰Elisha-m pista anevkaraa qanrutesqelluku, “Ayagluten eruryartua Jordan-aamun malrunlerqunek, qain assiriarkauguq ciungani ayuqucillermitun, menuiruciiquten-llu.”

¹¹Tau͡gaam Naaman-aaq qenertuq, ayagluni-llu qanerluni, “Umyuarteqsaaqua ilumun tungaunaku anenayukluku wangnun piicagluni-llu ATANERMUN Agayutminun, angalalluki unatni quliikun mamyuilnguum, canrirtellua-llu!

¹²Abana-qaa Pharpar-aq-llu, Damascus-aami kuigek, assinrunrituk tamarmeng kuigini Israel-aam? Eruryunaitua-qaa taukugnun, carriullua-llu?” Tua-i tuigtuq ayagluni-llu qenerteqapiggluni.

¹³Tau͡gaam pistain ullagluku qanertut elliinun, “Prophet-aam-qaa pisqekaten camek angelriamek, tuaten piyanrituten? Qaillun pitanruyarta waten qanqan elpenun, ‘Erua, carriulluten-llu?’”

¹⁴Tua-i atrarluni akurtuq malrunlerqunek Jordan-aamun, Elisha-m alerqullruciatun, qainga-llu canrirtuq mikelnguyagaam kemgatun ayuqliriluni, carriulluni-llu.

¹⁵Tua-i utertuq Elisha-mun, maligugani malikluki, nangerrluni-llu ciuqerranun; qanertuq, “Nutaan waniwa nallunriraqa agayucetailucia tamalkuan nunam qaingani, Israel-aam tau͡gaam Agayutiinek; taumek akurturru cikiuteka elpenun.”

¹⁶Tau͡gaam Elisha qanertuq, “ATANEQ unguvaciatun, kevgiuqengaqa, akurturngaitua camek.” Taum aguagucaaqaa ciuniuresqelluku, tau͡gaam Elisha-m ciuniuryunritaa.

¹⁷Tua-llu Naaman-aaq qanertuq, “Ciuniuqatanrilkuvgu, malruk ciulviik ucikanragnek nunamek pilii kingunemnun ut'rutarkamnek, wani-wa wak'nirnek ayaglua elliingaitua ekualuki elliitnek allanun agayutnun kiingan tau͡gaam ATANERMUN.

¹⁸Taumek neryuniurtua ATANREM au͡g'aritellerkaanek maligeskumku angayuqaqa itellrani agayuvianun Rimmon-aam piicagyarturluni, akitmigcimaluni-llu tallimnun, cikeskuma-llu Rimmon-aamun, ATANREM au͡g'ariskilia.”

¹⁹Elisha-m-llu qanrutaa, “Ayii uitanqegciluten.” Tua-i Naaman-aaq ayagtuq. Ayakanrakun yaaqsigivailgan,

²⁰Gehazi, pistii Elisha-m, qanertuq, “Angayuqama ayagceskii Naaman-aaq Syrian-aaq, ciuniurpek'naki cikiutai taitellri. ATANEQ unguvaciatun, malirqerciqaqa, tegullua-llu camek elliinek.”

²¹Tua-i Gehazi ayagtuq Naaman-aaq maliggluku. Naaman-aam-llu tangrramiu aqvaqulria kingunermikun, yuuguq pekcessuutegminek ciuniurnaluku, apluni-llu, “Ca-qaa imna qaillun piuq?”

²²Tauna-llu qanertuq, “Tamarmeng assirtut. Angayuqama ayagcetaanga elpenun qanrutesqelluten, ‘Waniwa watua tekitellriartangqertuq ingrilegtaanek Ephraim-aam malrugnek ilagketnek quyungqalriit prophet-aat; elliin-llu cikiisqumaak elpenun tiissitsaanek pingayunek (3,000) qerrirlinek yuutekagnek-llu malrugnek aturaqegtaaraagnek.’”

²³Naaman-aaq-llu qanertuq, “Kitaki teguten arvinlegnek tiissitsaanek (6,000) qerrirlinek.” Aguagutaa-llu, qillrulluki-llu qerrirlit malrugnun kalngaagnun, malrugnun-llu pistegminun tunlukek ilaklukek malrugnek yuutekagnek aturaqegtaaraagnek, ayagtellukek-llu Gehazi-m ciungakun.

²⁴Tekicameng-llu pengumun Elisha-m uitavianun, Gehazi-m teguak kalngaak itrullukek-llu enemun. Naaman-aam-llu pistek utercetak.

²⁵Itertuq-llu enemun nangerrluni-llu angayuqami ciuqerrani, Elisha-llu qanertuq elliinun, “Naken pisit, Gehazi?” Ellii-llu qanertuq, “Natmun ayaksaitua.”

²⁶Tau͡gaam Elisha-m qanrutaa, “Pillgucinritamken-qaa anernerkun angutem yuuluni pekcessuutminek pairrsaallraten? Akurturnariuq-qaa akinek aturanek-llu, olive-aat napaitnek, wine-at naucetaarviitnek, qusnginek, kuluvagnek, angutnek pisten̄ek, arnanek-llu pisten̄ek?

²⁷Watua-llu mamyuilngua Naaman-aam tuciiquq elpenun, kinguverpenun-llu akwarpak.” Tua-i Gehazi an'uq Elisha-m uitallranek mamyuilngurluni, qatertaluni qanikcartun.