Read Yupik 2 Kings 6 Bible Online

2 Kings 6 - Yupik bible

2 Kings 6

¹Erenret iliitni quyungqalriit prophet-aat Elisha-m ataniuqengai qanemyuugartut elliinun, “Uitavigput angayuqaqluten piviitessiyaagtuq.

²Ataki ayagceskut Jordan-aamun muragnek aqvalluta, enelinaurtukut uitavigkamten̄ek.” Elisha-llu kiuguq, “Ayagci.”

³Tua-llu iliita aguagutaa maligtesqelluteng. Elisha-m kiugaa, “Ayagciqua.”

⁴Tua-i ayagtuq maliggluki. Tekicameng-llu Jordan-aamun kepuriut napanek.

⁵Iliit iqurqiinanermini piqertuutaan kegginaa igtuq mermun; qayagpagluni-llu, “Elisha, qaillun piqatarcia? Piqertuutaq navrauguq.”

⁶Elisha-llu aptuq, “Natmun igta?” Apertuucani iggvillranek, keputuq muragmek, eggluku-llu tuavet, piqertuutaam-llu qamiqurra cavik pugtercelluku.

⁷Ellii-llu qanertuq, “Mayuresgu.” Tua-i angutem yaggluni tegua.

⁸Angayuqran Syria-m anguyallerminiu Israel-aaq, qanellgutkai atanerruani nakmikiluni-llu nani pelatekaumavigkaminek.

⁹Tau͡gaam Elisha ayagceciuq qanermek angayuqranun Israel-aam aarcirturluku taum nunam mallgeskiikun ayaasqevkenaku, Syrian-aat tuanetniluki curugyukaarluki.

¹⁰Angayuqran-llu Israel-aam aarcirturai yuut tuani uitalriit, taukut-llu keltut. Waten Elisha-m aarcirtularaa, tua-i Israel-aam angayuqra ellminek aviutaqluni qavcirqunek.

¹¹Umyugaa-llu angayuqran Syria-m cakneq nuniituq man'a pitekluku; anguyagtem̄i-llu atanerruarit taivkarluki apluki, “Nalirpeci ingluarvikau angayuqra Israel-aam?”

¹²Iliit-llu kiuguq, “Kia ingluarvikenritaa, atanemaa, angayuqaq; Elisha-m prophet-aam qanrut'laraa Israel-aam angayuqra qanllerpenek enevni-llu kitumek niitestaunak qanllerpenek.”

¹³Qanertuq-llu, “Ayagluci yuarciu nanlucia, wiinga teguniarqa.” Qanrutaat, “Dothan-aametuq.”

¹⁴Tua-i tuavet ayagceciuq elussitalegnek, pekcessuutelegnek anguyagterugarnek-llu; tekitut-llu tuavet unugmi kassugulluku-llu nunarpak.

¹⁵Pistai-llu Elisha-m makcameng unuakuarmi anluteng tangrrait, anguyagtet elussitalget pekcessuutelget-llu kassugusngakiit nunarpak. Pista-llu qanertuq, “Arenqiapaa, angayuqamaa, qaillun piciqseta?”

¹⁶Elisha qanertuq, “Alingevkenaci, pingqertukut amllenritnek ellaita piitni.”

¹⁷Tua-llu piicagtuq, qanerluni, “ATANEQ, piicagvikamken, ikireskek iik tangerrnaurtuq.” Tua-i ATANREM iik ikirtak ayagyuam tan'gaurluum, tangrraa-llu ingriq patumaluni elussitalegnek pekcessuutelegnek-llu kenruluteng avatairumaluku Elisha.

¹⁸Syrian-aat-llu atrarluteng curullratni, Elisha piicagtuq, “ATANEQ, ukut yuut cikmirceski.” ATANREM piicautii kiuluku cikmircetai.

¹⁹Tua-llu Elisha-m ullagluki qanrutai, “Iqlukun tumyarakun ayagtuci; una nunarpak yuaqengaqenritarci. Maligcia, ayauciiqamci-llu angutmun yuaqengarpecen̄un.” Ayautai-llu Samaria-mun.

²⁰Tamaa-llu itrameng Samaria-mun, Elisha qanertuq. “ATANEQ, ikireski iingit ukut angutet, tangerrnaurtut.” Tua-i ATANREM kiugaa piicautii; ataam tangerrsaurtelluki, maaten piut Samaria-m iluani uitallinilriit.

²¹Angayuqran Israel-aam tangrramiki Syrian-aat, Elisha aptaa, “Tuqullaki-qaa? Tuqullaki-qaa?”

²²Elisha-m kiugaa, “Tuqusngaitaten. Tuqucugngaaten-qaa teguaqelten nuussirpagpegun urluverpegun-llu? Cikirki tau͡gaam kelipanek mermek-llu nerniartut merluteng-llu, nutaan-llu utertelluki angayuqratnun.”

²³Tua-i upyutai nererpallerkaat; nerumariata-llu merluteng-llu, ayagcetai utertelluki Syria-m angayuqranun. Tuakenirnek-llu Syrian-aat taqluku Israel-aat nuniitnun anguyalallerteng.

²⁴Kinguqvaarni Benhadad-am angayuqran Syria-m quyurtai tamalkuita anguyagten̄i, mayurluteng-llu kassugutaat Samaria.

²⁵Angelriamek-llu kainiqut Samaria-mi kassugusngallratni, kiituani ciulviim qamiqurran kiputellerkaa akinguq yuinarnek cetamanek (80) qerrirlinek, usperem-llu avga yaqulget dove-at anait[1] akiluteng tallimanek qerrirlinek.

²⁶Tuani angayuqra Israel-aam kitullrani mengliikun nunarpiim qacarneran, arnaq qayagpagtuq, “Ikayurkut, atanemaa, angayuqaaq!”

²⁷Elliin-llu kiugaa, “ATANREM ikayurngailkaten, qaillun ayuqelriakun wii ikayurciken? Mukaarkamek-qaa avalingqertua wall'u wine-amek?

²⁸Camek arenqiallugutengqercit?” Arnam kiugaa, “Una arnaq qanertuq wangnun, ‘Qetunraan cikiutekiu nerniarput unuamek, unuaqu wii qetunraqa nerniarput.’

²⁹Tua-i kenirarput qetunraqa nerluku-llu. Unuaquan-llu qanertua arnamun, ‘Cikiutekiu qetunraan, nerniarput’; tau͡gaam iillrullinia qetunrani.”

³⁰Angayuqam niicamiu arnam qanellra aturani allgurai, yuut-llu qacarnerem mallgeskiini uitalriit tangrraat missuullernek atullinicia iluqliqluki aturaminun.

³¹Qanerluni-llu, “Agayutem kaugtuqilia tuqullua Elisha, Shaphat-aam qetunraan, qamiquirumanrilkan unugpailgan.”

³²Ayagceciuq-llu pistem̄ek aqvavkarluku Elisha. Taum nalliini Elisha enemini uitallruuq ilaluni ciulirnernek sen̄ircestem̄inek. Angayuqam-llu kevgaa tekipailgan Elisha qanertuq ciulirnernun, “Tauna tuqutarayuli taivkariuq tuqucestekamnek. Tauna tekiskan amiik patukiciu, itercecaqunaciu-llu. Angayuqaq tungaunani kingunrakun iterciqngan.”

³³Qallatellguteknginanrani-llu, angayuqaq tekituq qanerluni-llu, “Man'a pinerrlugun ATANERMEK kingunengqertuq! Ciin-mi tua-i waniwa utaqaqatarcia camek piqataucia?”