Read Yupik 2 Kings 7 Bible Online

2 Kings 7 - Yupik bible

2 Kings 7

¹Tau͡gaam Elisha qanertuq, “Niisgu qanellra ATANREM! Waten ATANEQ qanertuq: Unuaqu waten erneq pitarikan Samaria-mi kipucugngaciquci qulnek uspernek miilimalriamek mukaarkamek ataucimek qerrirlimun akilirluku, uspernek-llu yuinarnek barley-mek cali ataucimek qerrirlimek akilirluku.”

²Tua-llu angayuqam aipirturtii, qanertuq Elisha-mun, “Tamana tuaten pingaituq, ATANEQ tungaunani taivkaringraan mukaarkamek egmian!” Elisha-m kiugaa, “Nakmiin iigpegun tangerciqan, tau͡gaam nerngaituten neqkam iliinek.”

³Angucetangqellruuq cetamanek mamyuilngulegnek iteryarain Samaria-m elatiini, qanruyutut-llu ellmeggnun, “Ciin wani aqumgaceta tuqunatkamten̄un?

⁴Iteryaaqengramta nunarpagmun paluciqukut; wani tau͡gken uitakumta, cali tua-i tuquciqukut. Ataki, ayalta Syrian-aat pelatekaumaviatnun; uitaskatkut unguvaciqukut, tuquskatkut-llu tua-i tuquciqukut.”

⁵Tua-i tan'geriarallrani ayagtut Syrian-aat pelatekaumaviatnun; tau͡gaam tekicameng elatiinun piut yugtaunani.

⁶ATANREM Syrian-aat niicetellruaki nepiitnek agiirtellriit anguyagterugaat horse-aalget ekumassuutelget-llu akalrialegnek, Syrian-aat-llu umyuartequt angayuqratnun Israel-aat akilillruyukluki Hittite-at, Egytian-aat-llu angayuqat anguyagtait-llu curuusqelluteng.

⁷Taumek qimallrulliniut atakuarallrani pelatekateng, horse-aateng, ciulvateng pelatekaumavigteng-llu ayuquciatun unilluki.

⁸Taukut-llu cetaman angucet tekicameng pelatekaumallrata elatiinun, itertut pelatekamun, nerluteng-llu merluteng-llu tamaanelngurnek, tegulluteng-llu qerrirlinek, suulutaanek, aturanek, ayaulluki-llu iirait; ataam-llu uterrluteng itertut allamun pelatekamun, tuaten-llu cali piluteng.

⁹Tua-llu ellmeggnun qanruyutut, “Wangkuta elluamek pinritukut. Niitekegcinarqellriamek pingqellriakut, wangkuta kiimta nallunritnarqenritarput. Ertellerkaa utaqakumteggu qanrutkevkenaku, nallunailngurmek anucimirqecetaarumaciqukut. Ataki ayagluta wanirpak qanrucarturlaut angayuqam atanerruari.”

¹⁰Tua-i unitaat Syrian-aat pelatekaumaviat, uterrluteng-llu Samaria-mun, qayagaurluki-llu iteryaram tarikestai qanrulluki, “Ayallruukut Syrian-aat pelatekaumaviatnun, kitumek-llu tangerpek'nata niitevkenata-llu; horse-aarit ciulvait-llu petuirumavkenateng, pelatekat-llu ayuqucimegcetun uitaluteng Syrian-aat uniyuciicetun.”

¹¹Tua-i iteryarat tarikestaita tamana qanrutkaat, qanrutekluku-llu eniini angayuqam.

¹²Cali erteksaunani, tau͡gaam angayuqaq maktuq qanerluni-llu atanerruaminun, “Qanrutnaamci Syrian-aat pillerkiuraatnek. Nallunritaat kaigucirput; taumek pelatekaumauvigteng uniskait iirluteng-llu yuilqumun, umyuarteqluteng, ‘Ankata nunarpagmek unguvaita teguciqaput, iterluta-llu nunarpagmun.’”

¹³Iliit-llu atanerruarin qanertuq, “Yuut-wa tua-i maanelnguut nunarpagmi qaillun anagngailnguut, au͡gkucetun amllertun ak'a tuqullertun. Taumek ayagcecilta angutnek talliman elussitat uitaqalriit aturtelluki, nallunrirniarput qaillun piciitnek.”

¹⁴Tua-i nakmiut malrugnek angutegnek horse-aalgegnek, angayuqam-llu ayagcetak tungairtelluki Syrian-aat anguyagtet, qanrullukek, “Ayaglutek paqteki.”

¹⁵Tua-i ayagtuk kingunrirturluki tekilluku Jordan-aaq; tumyarami-llu tangrrait aturat saskut-llu Syrian-aat unitellrit qimallermeggni. Uterrlutek-llu qanemciuk angayuqamun.

¹⁶Tua-llu Samaria-m yuin anluteng uayaaraat pelatekaumaviat Syrian-aat. ATANEQ-llu qanellruciatun qulen usperet assinkacagiit mukaarkat, yuinaat-llu usperet barley-mek tunumaut ataucimun qerrirlimun.

¹⁷Wani-wa angayuqran Israel-aam elkartellruluku atanerruaq, elliin nakmiin aipirturten̄i, murilkesten͞guluku nunarpiim ikirtuqaanun. Tauna yuut tutmaulluku tuqutaat, Elisha-m qanellruciatun angayuqam tangerrsartullrani.

¹⁸Tua-i Elisha qanellruan angayuqamun, “Qulen usperet barley-mek, yuinaat-llu usperet miilimalria mukaarkaq tunumaciquq ataucimun qerrirlimun, uum nalliini iteryaraini Samaria-mi.”

¹⁹Atanerruam kiullrukii Elisha, “Tamana tuaten pingaituq ATANEQ tungaunani egmian taivkaringraan mukaarkamek!” Elisha-m-llu kiullrukii, “Elpet nakmiin iigpegun tangerciqan, tau͡gaam nerngaituten tamaaken.”

²⁰Tua-i tamana elliinun piciurtuq, nunarpiim iteryaraani yuut tutmarluku tuqulluku.