Read Yupik 2 Kings 8 Bible Online

2 Kings 8 - Yupik bible

2 Kings 8

¹Wani-wa Elisha qanellruluni arnamun Shunem-aami uitalriamun, nauwa qetunraa elliin Elisha-m canrircetellrukii, “Upluten ayii tamalkuita ilaten malikluki, arulairniartuci natmun piyugngallerpecen̄un; ATANEQ ayagceciqataan piitnamek, tusngaarkauluni-llu nunamun malrunlegni allrakuni.”

²Tua-i arnaq nangerrluni tuaten piuq qanruciatun Elisha-m: ayagluni malikluki ilani uitaluni-llu Philistine-at nuniitni malrunlegni allrakuni.

³Allrakut-llu malrunelgen kinguatni, arnaq utertuq Israel-aamun, ullagluku-llu angayuqaq takumcuca'arviksarturaa eneni nunautni-llu ataam ellminun utercecesqelluki.

⁴Tuani angayuqam qanellgutkellrua Gehazi, Elisha-m pistii, qanerluni, “Qanrusnga tamaitnek irr'inarqelrianek Elisha-m caliallrinek.”

⁵Qanemcisnginanrani-llu angayuqaq Elisha-m unguircecillranek tuqumalriamek, arnam takumcuca'arvikaa angayuqaq. Gehazi-llu qanertuq, “Angayuqaaq, wani-wa tang arnaq, waniwa-llu qetunraa Elisha-m unguircetellra!”

⁶Angayuqam arnaq apcani qanrutaa Gehazi-m qanruciatun tuaten pillruniluku. Angayuqaq-llu atanerruamek nallunairiuq arnam ikayurtekaanek, qanerluni, “Ataam uterteski arnamun tamalkuita piutai, tapeqluki akillrata amllertaciit naucetaarviit naugillrit ayaggaanranek una erneq tekilluku.”

⁷Elisha-llu ayagtuq Damascus-aamun Syria-m Angayuqra Benhadad-aaq naulluullran nalliini. Qanrucatni-llu Elisha tamaavet tekitniluku,

⁸qanertuq Hazael-aamun, “Ayaulluten cikiutmek pairrsaaggu Elisha, piniaran kangiituutekesqelluku ATANERMUN assiriarkauciqa wall'u assiriarkaunriluciqa.”

⁹Tua-i Hazael-aaq ayagtuq pairrsaagluku, cikiutnek ang'aqluni ayuqenrilngurnek assinqurraitnek Damascus-aarmiutarnek, yuinaak malruk (40) ungungssit qulugtellriit atmirluki. Tekicamiu-llu nangerrluni ciuqerranun, qanertuq, “Kevgarpet Benhadad-am, Angayuqran Syria-m, taivkaraanga aptesqelluten assiriarkaucirminek wall'u assiriarkaunrilucirminek naulluutminek?”

¹⁰Elisha-llu kiuguq, “ATANREM wangnun nasvallrua tuquciqniluku; tau͡gaam qanrucarturru assiriciqniluku.”

¹¹Elisha-m-llu meciknauqanirluku tangrraa, uluqsaunaku-llu tangvagluku, kiituani Hazael-aaq uitacurlanguq. Alqunaq-llu Elisha qiaguq.

¹²Hazael-aam aptaa, “Ciin qiasit?” Elisha kiuguq, “Nallunrilamki arcaqalriit assiitellriit pillerkaten Israel-aam yuinun. Ekuavkarciqaten asvairqumalriarit, tuqurqeciqaten-llu angutait ayagyuat nuussirpagkun, piqertuulluki-llu navgurluki mikelnguit tuqulluki, pilagluki-llu ikirrluki arnait qingalriit.”

¹³Hazael-aaq-llu qanertuq, “Qaillun pilua tuaten pitalriamek piningqerciqsia? Wiinga-wa yuunginaulrianga!” Elisha-m kiugaa, “ATANREM nasvitellruanga angayuqauciqniluten Syria-mi.”

¹⁴Hazael-aaq-llu utertuq Benhadad-amun, taum-llu aptaa, “Camek Elisha-m qanrutaten?” Hazael-aam kiugaa, “Qanrutaanga pinritevkenak assiriciqniluten.”

¹⁵Tau͡gaam unuaquani Hazael-aaq uligmek tegutuq, akurrluku-llu mermun, angayuqaq-llu epluku tuqutaa. Hazael-aaq-llu Benhadad-am eniini angayuqrurtuq Syria-mi.

¹⁶Tallimiitni allrakuin Joram-aam, Ahab-aam qetunraan Israel-aami angayuqrullran, Jehoram-aaq Jehoshaphat-aam qetunraa, ayagnirluni angayuqrurtuq Judah-mi

¹⁷allrakungluni yuinaq akimiarmek malrugnek cipluku (32), atanirturillruuq-llu Jerusalem-aami pingayunlegni allrakuni.

¹⁸Nuliangqellruuq Ahab-am panianek, Ahab-am-llu ilakuralriarin pillracetun maligtellrui Israel-aam angayuqrin assiitellriit piciryarait. ATANREM-llu tangvallrani assiitellriamek calillruuq,

¹⁹tau͡gaam ATANREM piunrircuumiitaa Judah, akqellruamiu David-aaq pisten̄i kinguvri atanirturirrlainarciqniluki.

²⁰Jehoram-aam atanirturillran nalliini Edom-aaq inglulituq Judah-mun, allakarluni-llu angayuqauviurrluni.

²¹Tua-llu Jehoram-aaq ayagtuq Zair-amun akalrialget pekcessuutni tamalkuita ayaulluki, tuani-llu Edomite-at anguyagcet avatairait. Unugmi-llu makluni, pekcessuutmi atanirturtait tuqutait Edomite-at avatairumasteteng; tau͡gaam anguyagtai saggluteng qimagtut kingunermeggnun.

²²Tuakenirnek Edom-aaq Judah-mek avtellruuq una erneq tekilluku. Libnah-llu inglulitellruuq tamatum nalliini.

²³Jehoram-aam allat caurallri igausngaut Kalikaitni Judah-m Angayuqrin.

²⁴Jehoram-aaq-llu yuunrirtuq tungmagcimaluni-llu angayuqat tungmaggviatnun David-aam nunarpiini, qetunraa-llu eniini angayuqrurtuq.

²⁵Allrakuini qula malrugnek cipluku Israel-aami angayuqaullran Joram-aam Ahab-am qetunraa, Ahaziah, Jehoram-aam qetunraa, angayuqrurtellruuq Judah-mi

²⁶allrakungluni yuinaq malrugnek cipluku (22), angayuqaullruuq-llu ataucimi allrakumi Jerusalem-aami. Aanii atengqerrluni Athaliah-mek, Angayuqam Ahab-am panikluku, Israel-aam Angayuqran Omri-m tutgaqluku.

²⁷Pektellrumiuq-llu Ahab-am ilani-llu piciryarallratgun, assiitellriamek caliluni tangvallrani ATANREM, nengaukngani Ahab-aam.

²⁸Angayuqam Ahaziah-m pillgucillrua Angayuqaq Joram-aaq anguyallrani Syria-m Angayuqra Hazael-aaq. Calluutut-llu Ramoth-aami Gilead-aamelngurmi, tuani-llu Joram-aaq akngirrluku anguyallermeggni.

²⁹Uterrluni-llu Jezreel-amun mamciriyarturluki ekini, Ahaziah-m-llu tuani tangerrsarturaa.