Read Yupik 2 Kings 9 Bible Online

2 Kings 9 - Yupik bible

2 Kings 9

¹Tua-llu prophet-aam Elisha-m taisqaa ayagyuat prophet-aat iliit qanrulluku-llu, “Upluten Ramoth-aamun Gilead-aamelngurmun ayii. Una caqun uqumek imalek malikluku,

²tekiskuvet yuarniaran Jehu, Jehoshaphat-aam qetunraa Nimshi-m tutgarii. Itruskiu kiingan enem iluqlianun yuilngurmun,

³teguluku-llu caqun uqumek imalek kuvniaran qamiqurranun qanerluten, ‘Waten qanertuq ATANEQ, wiinga mingugamken angayuqrurrluten Israel-aamun.’ Amiik-llu ikirrluku anluten qimakina; qariyaqunak.”

⁴Tua-i ayagyuaq prophet-aaq ayagtuq Ramoth-aamun.

⁵Tekicami piuq anguyagtet atanerruarit arenqiirturluteng quyungqalriit; qanertuq-llu, “Qanerkangqertua elpenun, atanirturtaa.” Jehu-llu aptuq, “Nalimten̄un qalarcit?” Kiugaa, “Elpenun.”

⁶Tua-i nangertuq, maliklutek-llu enemun iterlutek, taum-llu ayagyuam prophet-aam kuvaa olive-aat uquat Jehu-m qamiqurranun qanrulluku, “Waten qanertuq ATANEQ Agayutii Israel-aam, mingugamken angayuqaurrluten ATANREM yuinun Israel-aanun.

⁷Tuqutarkaugan angayuqan ataneq, Ahab-am qetunraa, anucimirqecetaarniarqa Jezebel-aaq tuqutellri pistenka prophet-aat allat-llu pistenka pitekluki.

⁸Tamarmeng Ahab-am ilakuralriari kinguvri-llu tuqucimaarkaugut; tamalkuita angucet ilakuralriarini piunrirciqanka, ayagyuat ak'allaurtellriit-llu ayuqluki.

⁹Wiinga piciqanka ilakuralriari Israel-aam Angayuqran Jeroboam-aam, Israel-aam-llu Angayuqran Baasha-m pillrucimtun.

¹⁰Jezebel-aaq-llu tungmagcimangaituq; temii qimugtet nerciqaat Jezreel-am nuniini.” Mat'umek-llu qanrraarluni ayagyuaq prophet-aaq an'uq enemek qimagluni-llu.

¹¹An'uq-llu Jehu atanerruarullgutminun, taukut aptaat, “Assirtuten-qaa? Camek picirluni au͡g'um usviilnguum angutem tangerrsugtaten?” Jehu kiuguq, “Nallunritarci camek piyuucia.”

¹²Taukut kiugaat, “Qang'a, nalluarput! Qanruskut camek qanerta!” Jehu-llu qanertuq, “Qanrutaanga ATANEQ qanerniluku: ‘Mingugamken angayuqrurrluten Israel-aamun.’”

¹³Egmian-llu Jehu-m atanerruarutngullgutain sagtait aturateng akret qaingatnun Jehu-m nangerngavigkiurluku, cupu'uryarat-llu cupait, qayagpagluteng-llu, “Jehu angayuqauguq!”

¹⁴Tua-llu Jehu, qetunraa Jehoshaphat-aam Nimshi-m qetunraan, aassaqluni picirkiurtuq Angayuqaq Joram-aaq piluku, tauna Jezreel-ami uitauq, tuavet ayallruluni mamcirnaluki ekini anguyallermeggni Syria-m Angayuqra Hazael-aaq Ramoth-aami ekiliumallni. Tua-i Jehu qanertuq atanerruarullgutminun, “Pillguciquvcia, kina Ramoth-aamek anevkaryaqunaciu aarcirturyarturluki Jezreel-amelnguut yuut.”

¹⁶Ekluni-llu ayagassuutminun akalrialgegnun ayagtuq Jezreel-amun. Tuani Joram-aaq cali assiriksaitellruluni, Judah-m-llu Angayuqra Ahaziah tuantellruuq tangerrsartuumaluku Joram-aaq.

¹⁷Jezreel-ami tarikestem qertulriami nacessvigmi tangrrai Jehu malii-llu agiirtellratni. Qayagpagtuq-llu, “Angutnek agiirtellrianek tangertua.” Joram-aaq-llu kiuguq, “Horse-aalegmun paqceski yugnikek'ngaqucirput wall'u inglukucirput.”

¹⁸Tua-i kevgam horse-aarluni pairrsaagaa Jehu qanrulluku-llu, “Angayuqaq nallunricugtuq yugnikutekun taicirpenek.” Jehu kiuguq, “Tamana umyuarniurutkaqenritan! Kingunemkun maligesnga.” Nayurta-llu nacessvigmelnguq qanertuq, “Kevgam tekicaaqai, tau͡gaam utertenrituq.”

¹⁹Allamek cali horse-aalegmek ayagceciuq, taum-llu aptaa Jehu ciuqlirmi apyutellranek. Ataam Jehu kiuguq, “Tamana umyuarniurutkarkaqenritan! Kingunemkun maligesnga.”

²⁰Ataam nayurta qanertuq, “Tekicaaqai, tau͡gaam utertenrituq. Ciuliqagtiita akalrialgek ayagcuutegni ayautak picuqcarpek'nani, Jehu-m pilauciatun!”

²¹Joram-aaq qanertuq, “Ayagassuuteka upciu.” Tua-i tuaten piut, an'uq-llu Angayuqamek Ahaziah-mek maligluni, allakarmek ayagassuuterlutek, Jehu pairrsaagluku. Pairtaak-llu Naboth-aam Jezreelite-am nunautiini.

²²Joram-aam-llu aptaa, “Uitanqegcitkun-qaa taiguten, Jehu?” Jehu-m kiugaa, “Qaillun uitanqegcicetangqerciqa, cali pingqerrluta angalkut caliaritnek, agayutnguanun-llu agayuyaramek aanavet Jezebel-aam ayagnillrinek?”

²³“Inglulitnguuq, Ahaziah!” Joram-aaq qayagpagtuq, kingutmun caulluku ayagassuutni qimagluni-llu.

²⁴Jehu-m urluvni amua, pinirtacimitun-llu pakigluku pitgaraa Joram-aaq tunuakun ircaqrua kapluku. Joram-aaq iquuq ayagassuutegmini tuquluni.

²⁵Jehu-llu qanertuq Bidkar-amun ikayuminun, “Aqvaluku temii egesgu Naboth-aam Jezreelite-am nunautiinun. Neqkaqkiu pektellmegni mengleqliqlunuk horse-aatgun kingunrakun Ahab-am Angayuqam Joram-aam atiin, ATANREM qanrutkellrukai makut qaneryarat Ahab-aq piluku:

²⁶‘Akwauvaq tangellruaqa tuqucimallra Naboth-aam qetunraagken-llu. Akqillruunga-llu anucimirqecetaarciqniluten wani uumi yuilqumi taukut tuquvillratni.’ Jehu-m alerquraa ikayuni, taumek Joram-aam temii teguluku egesgu Naboth-aam nunautiinun, piciurrluku ATANREM akqutkellra.”

²⁷Judah-m angayuqran Ahaziah-m tangrramiu man'a, qimagtuq Beth Haggan-aam tungiinun, Jehu-m-llu kingunrakun maligtaa. Anguyagten̄i-llu alerqurai, “Ellii-llu tuquciu!” taukut-llu akngirtaat ayagassuutegni ayautellrani Gur-amun mayuryaram tumyaraakun, canimelkiinun nunarraam Ibleam-aam. Tau͡gaam ayagtu'rtuq akngiringang'e'rmi tekisviminun nunarpak Megiddo, tuani-llu tuquluni.

²⁸Pistain-llu ayautaat ayagassuutegken'gun temii ut'rulluku Jerusalem-aamun tungmaggluku-llu angayuqat qungurviatnun David-aam Nunarpiini.

²⁹Qula ataucimek cipluku allrakuani Joram-aam, Ahab-aam qetunraan, Ahaziah ayagnirtuq ataniurluni Judah-mi.

³⁰Jehu-llu tekituq Jezreel-amun. Jezebel-aaq, niitellruami qaillun pillratnek, iigni mingugak, nuyani-llu kenuggluki, nangerrluni-llu unavet pekcaraq tangvagluku angayuqam eniin egalrakun.

³¹Jehu-llu itellrani ikirtuqakun qayagpagtuq “Zimri-q![2] Tuqutarayulimi elpet! Ciin maavet taisit?”

³²Jehu ciuggluni qayagpagtuq, “Kia pillgucirtanga?” Malruk wall'u pingayun angayuqam eniini atanerruarat kanavet tangvagaat egalerkun,

³³Jehu-m-llu qanrutai, “Igceciu!” Tua-i igcetaat, auga-llu qecvallerrluni enem qacarneranun, horse-aat-llu qaingatnun. Jehu-m-llu ayagassuutni ayagcetaa temii qaingirluku,

³⁴iterluni-llu angayuqam eniinun, nerluni-llu. Nerumariami qanertuq, “Ayaulluku arnaq tauna aniqlaamalria tungmagciu; angayuqam-wa tua-i panikngaku.”

³⁵Tau͡gaam tungmagcarturtai anngameng camek nataqutenritut nerrlainarmek tau͡gaam qamiqurranek, enritnek-llu unatain it'gainek-llu.

³⁶Uterrluteng-llu Jehu qanrucatni, qanertuq, “Man'a ATANREM qanelqaa waten piciqniluku pisten̄i Elijah tumekluku: ‘Jezebel-aam temii qimugtet nerciqaat Jezreel-am nuniini.

³⁷Temii-llu peksagingaciquq tamaani anatun, kia-llu nallunairciigaciiqai temiin aklui.’”