Read Yupik 1 Chronicles 10 Bible Online

1 Chronicles 10 - Yupik bible

1 Chronicles 10

¹Wani Philistine-at callugait Israel-aat; angutait-llu Israel-aat qimagtut ciunratnek Philistine-at, iqumalartut-llu tuqucimaluteng Ingrimi Gilboa-mi.

²Philistine-at-llu anguluku Saul-aaq qetunrai-llu tuqutaat Jonathan-aaq Abinadab-aq-llu Malchishua-q-llu, qetunrai Saul-aam.

³Callullrat-llu cagniuq inglulirluku Saul-aaq, urluvelget-llu nataqaat akngircimaluni-llu pitgaqutulitgun.

⁴Tua-llu Saul-aaq qanertuq anguyaucessuutmi tegumiaqestiitnun, “Amuluku nuussirpiin, kapia-llu tamatumek, makut nuugiumanrilnguut tailuteng anglaniteksuaraatnga.” Tau͡gaam tegumiaqucestiin piyuumiitaa tua-i-wa cakneq alingami. Taumek Saul-aam elliin teguluku nuussini iquvikaa.

⁵Tegumiaqucicestiin-llu tangrramiu Saul-aaq tuqucia, ellii-llu iqumiuq nuussiminun, tuquluni-llu.

⁶Wani-wa Saul-aaq tuquuq; pingayun-llu qetunrai, tamarmeng-llu ilai tuquut quyurmeng.

⁷Tamarmeng-llu angutain Israel-aam tamaanelnguut tangrrait anguyagtet qimalriit Saul-aaq-llu qetunrani-llu tuqumaciat, peggluki-llu nunateng qimagtut; Philistine-at-llu ullagluki uitavikait.

⁸Unuaquan-llu Philistine-at tailuteng uayarnaluki tuqumalriit, nataqait Saul-aaq qetunrani-llu iqumaluteng Ingrimi Giboa-mi.

⁹Uayaaraat-llu teguluku-llu qamiqurra akngircailkutai-llu, ayagceciluteng-llu qanerten̄ek qaqilluku nuniit Philistine-at, qanrutkesqelluku niitekegcinarqellria agayutnguanun yugnun-llu.

¹⁰Elliit-llu akngircailkutai agayuviitnun agayutnguameng, qillruluku-llu qamiqurra agayuvianun Dagon-aam.

¹¹Tau͡gaam yuut tamarmeng Jabesh-gilead-aat niicamegteki tamalkuita Philistine-at pillrit Saul-aamun,

¹²tamarmeng alinguraranrilnguut angutet nangerrluteng, teguluku ayautaat temii Saul-aam temait-llu qetunrain, tailluku-llu Jabesh-aamun. Qunguutait-llu naparpiim oak-am acianun yagluteng-llu ernerni malrunlegni.

¹³Tua-i Saul-aaq tuquuq pektayiitenritlerminun; ellii-wa ukvenrituq ATANERMUN tuatnaluni atunritai alerquutai ATANREM kangiiturvikluku-llu angalkuruaq, ayuqucirtuusqelluni.

¹⁴Ayuqucirturcetaarpek'nani-llu ATANERMUN. Taumek ATANREM tuqutaa, tunluku-llu angayuqauvik David-aamun qetunraanun Jesse-m.