Read Yupik 1 Chronicles 11 Bible Online

1 Chronicles 11 - Yupik bible

1 Chronicles 11

¹Tua-llu tamarmeng Israel-aat quyurtut pillgutekluteng David-aamun Hebron-aami, qanerluteng-llu, “Tangerrluku wangkuta elpet enqerpekut kemekluta-llu.

²Avani pellullermi, Saul-aam-llu atanrullran nalliini, elpengullruuq anulluki Israel-aat; ATANEQ-llu, elpet Agayuten, qanellruuq elpenun, ‘Elpet qusngiliurtekciqaatgen yum'a Israel-aat, elpet-llu takarnarqut'legtauciquten ukuni yumni Israel-aani.’”

³Tua-i tamarmeng ciulirnerit Israel-aat taigut atanermun David-aamun Hebron-aami. David-aaq-llu akqutmek taqutuq ellait ilakluki, uqumek-llu mingugaat, angayuqrurtuq-llu Israel-aamun, ATANREM akqellruciatun Samuel-aakun.

⁴Angayuqaq David-aaq tamarmeng-llu Israelite-at ayagtut curugluku-llu Jerusalem-aaq. Tamaani Jebus-aamek piaqluku, Jebusite-at-llu nutem tamatum nunam yui, cali tamakumiunguluteng.

⁵Jebusite-at qanrutaat David-aaq watqapik iterngaitniluku nunarpiim iluanun, ilangcivkenaki David-aam tegua asvailngua Zion-aam, pilangaat-llu “David-aam Nunarpiinek,”

⁶David-aaq qanertuq, “Kina imna ciumek tuqucikuni Jebusite-amek atanruarkauguq alerquasten͞guluni-llu.” Joab-aq-llu qetunraa Zeruiah-m mayurtuq ciumek, tua-i ellii atanirturtengurtuq.

⁷David-aaq-llu uitaluni asvailngurmi; taumek aterpagcimauq David-aam Nunarpiinek.

⁸Ellii-llu nunarpaliuq uivetmun avatiikun ayagnirluku Millo-mek qaqilluku kassutmun; Koab-am-llu kituggluku ilii nunarpiim.

⁹David-aaq-llu angliurtuq pingiinarluni, tua-i ATANREM nayuani.

¹⁰Wani-wa makut David-aam neq'ayarat anguyagtai, capkuciumastain angayuqauviani, pillgucirluki tamalkuita Israel-aat, atanrusqelluku, maliggluku qaneryaraa ATANREM pitekluki Israel-aat.

¹¹Man'a igausngalqaat David-aam pinilriarin angutet; Jashobeam-aaq Hachmonite-aq ciuqliqluku pingayun; elliin narulkarcuutmikun tuqutellruluki yuinaat akimiaq (300), ataucikun.

¹²Tungliuluni-llu elliinun “Pingayuni” Eleazar-aaq, qetunraa Dodo-m, Ahohite-am.

¹³Elliin pillguciumallrua David-aaq Pasdammim-aami Philistine-at quyurtellratni callugnaluteng. Tamaani cuqtangqertuq nunamek nauvikumaluni amllernek mukaarkanek, angutet-llu qimagluteng Philistine-anek.

¹⁴Tau͡gaam ellii nangengqallruuq qukaani carr'ilqam, callugluki, tuqurqelluki-llu Philistine-at; ATANREM-llu anirtullrui angelriakun qakvautekun.

¹⁵Pingayun atanerruat yuinaq qulmek (30) ilait angutet, atrartut teggalqumun David-aamun nayunermi Adullam-aami, anguyagtait Philistine-at qavartaumallratni Kuignayuani Rephaim-aam.

¹⁶David-aaq uitallruuq cayailkuciumalriami; quyungqalriit-llu Philistine-at tuani Bethlehem-aametellruut.

¹⁷David-aaq qanertuq nerinitellriatun, “Waniwa-tuq kia imum cikiqerlia merr'illua mermek elakaanek Bethlehem-aam, iteryaram canianelngurmek.”

¹⁸Tua-llu pingayun neq'ayarat anguyagtet itertut uitaviatnun Philistine-at, mertarluteng-llu elakaanek Bethlehem-aam iteryaram canianelngurmek, ut'rulluku-llu David-aamun. Tau͡gaam meryunritaa; merpek'naku kuvaa elliitekluku ATANERMUN

¹⁹qanerluni-llu, “Yaaqsigli wangnek ciuqerrani Agayutma waten piarkaukumku man'a. Merlaku-qaa unguviita augat makut angutet? Tua-i ellait unguvaseng qevvluku taicatgu tamana.” Taumek elliin meryunritaa. Makut pilqait pingayun neq'ayarat anguyagtet.

²⁰Wani-wa Abishai anelgutii Joab-am, ciuliqagtiit yuinaq qulmek cipluku (30) angutet. Narulkarcuutmikun inglulirluki yuinaat akimiaq (300) angutet tuqulluki-llu, qakvaqengluni at'nguq avatiitgun pingayun.

²¹Ellii arcaqerluni neq'ayarauguq taukuni yuinaq qulmek cipluku (30), alerquasteksagutellruat-llu. Tau͡gaam pitacirtullrunritai taukut “Neq'ayarat Pingayun”.

²²Benaiah-llu qetunraa Jehoiad-aam pinilriaruuq angun Kabzeal-aamek, angelriatgun ikayuakengtuli; Iqutellruak-llu malruk anguteluaqak Moab-armiuk. Ellii-llu cali ekluni elanermun qanillrani tuqutellrua yugtutuli.

²³Elliin-llu cali tuqutellrua angun Egypt-aarmiu, angun cakneq angelria, it'ganret pingayunelgat avguluku sugtutalria. Egypt-aarmiu unatmikun tegumiangqertuq narulkarcuutmek cakneq angelriamek; tau͡gaam Benaiah-m atrarvikluku ayarungqerrluni, allurtaa-llu Egypt-aarmiu narulkarcuutiinek, tuqulluku-llu elliin nakmiin narulkarcuutiikun.

²⁴Makunek pillruuq Benaiah qetunraa Jehoiad-aam, tuqluutengluni-llu atermek avatiitgun pingayun pinilriit angutet.

²⁵Pivakumalriarurtuq ilakluki yuinaq qulmek cipluku (30) tau͡gaam elliin pitacirtullrunritai pingayun. David-aam-llu ellminun tarikesteksagutaa.

²⁶Pinilriartait angutet anguyagtet ukuugut: Asahel anelgutii Joab-am, Elhanan qetunraa Dodo-m Bethlehem-aarmiu,

²⁷Shammoth Harod-aamek Helez-aaq Pelonite-aq,

²⁸Ira qetunraa Ikkesh-aam Tekoa-mek, Abiel-aaq Anathoth-aamek,

²⁹Sibbecai Hushathite-aq, Ilaia Ahohite-aq,

³⁰Maharaia-q Netophah-mek Heled-aaq qetunraa Baanah-m Netophah-mek,

³¹Ithai-aq qetunraa Ribai-am Gebeah-mek Benjaminite-auluni, Beniah Pirathon-aamek,

³²Hurai-aq kuiggaarainek Gaash-am, Abiel-aaq Arbathite-aq,

³³Azmaveth-aaq Baharum-ek, Elliahba Shaalbon-aamek,

³⁴Hashem-aaq Gizonite-aq, Jonathan-aaq qetunraa Shagee-m Hararite-am,

³⁵Ahiam-aaq qetunraa Sacher-aam Hararite-am, Eliphal-aaq qetunraa Ur-am,

³⁶Hepher-aaq Mecherathite-aq, Ahijah Pelonite-aq,

³⁷Hezro Carmel-aamek, Naarai-aq qetunraa Ezbai-am,

³⁸Joel-aaq anelgutii Nathan-aam, Mibhar-aq qetunraa Hagri-m,

³⁹Zelek-aaq Ammonite-aq, Naharai-aq Beeroth-aamek, tegumiaqucicestii Joab-am qetunraan Zeruiah-m,

⁴⁰Ira Ithrite-aq, Gareb-aaq Ithrite-aq,

⁴¹Uriah Hittite-aq, Zabad-aaq qetunraa Ahlai-am,

⁴²Adin-aaq qetunraa Shiz-am Reubenite-am, ciuliqagtiita Reubenite-at, yuinaat-llu qulen cipluku (30) ilakluki,

⁴³Hanan-aaq qetunraa Maacah-m, Joshaphat aaq-llu Mithnite-aq,

⁴⁴Uzzi-aq Ashterathite-aq, Shama Jeiel-aaq-llu qetunraak Hotham-aam Aroerite-am,

⁴⁵Jediael-aaq qetunraa Shimrim, Joha-llu anelgutii, Tizite-aq,

⁴⁶Eliel-aaq Mahavite-aq, Jeribai, Joshaviah-q-llu, qetunraa Elnaam, Ithmah-llu Moabite-aq,

⁴⁷Eliel, Obed, Jaaziel-aaq-llu Mezobaite-aq.