Read Yupik 1 Chronicles 12 Bible Online

1 Chronicles 12 - Yupik bible

1 Chronicles 12

¹Wani-wa makut angutet taillret David-aamun Ziklag-aami, nalliini piyugtacimitun ayagasciigatellran tua-i-wa pitekluku Saul-aaq qetunraa Kish-am; ilagausngaut-llu pinilrianun angutnun ikayuastem̄inun anguyautellrani.

²Tamakut pitgaqusten͞guut, pitgaryugngalriaruut elluqutengqerrluteng-llu elluquyugngaluteng atunem iqsumegteggun tallirpimegteggun-llu; tamakut Benjaminite-augut, Saul-aam tungelqurri.

³Ciulirneruuq Ahiezer-aaq, tua-llu Joash-aq, tamarkenka qetunraqlukek Shemah-m Gebeah-rmium, cali-llu Jeziel-aaq Pelet-aaq-llu qetunraak Azmaveth-aam; Beracah, Jehu Anathoth-aamek,

⁴Ismaiah Gibean-aamek, pinilria angun iliit yuinaq qulmek cipluku (30); Jeremiah, Jahaziel, Johanan, Jozabad Gederah-mek,

⁵Eluzai, Jerimoth, Bealiah, Shenariah, Shephatiah, Haruphite-aq;

⁶Elkanah, Isshiah, Azarel, Joezer, Jashobeam-aaq-llu, Korahite-aq;

⁷Joelah-llu, Zebadiah-llu, qetunraak Jeroham-aam Gedora-mek.

⁸Gadite-anek agelriartangqellruuq David-aamun cayailkuciumalriami yuilqumi, pinilriit elisngalriit anguyagtet, piqaqunqellriit capkutatgun narulkarcuutetgun-llu, taukut kegginait ayuqut kegginaicetun yugtutulit, taukut cukalialuteng tuntuyagarcetun ingritgun pektelartut.

⁹Ezer-aaq ciuqliq, Obadiah tunglia, Eliab-aaq pingayuak,

¹⁰Mishmanah cetamiit, Jeremiah tallimiit,

¹¹Attai arvinelgat, Eliel malrunelgat,

¹²Johanan, pingayunelgat, Elzabad qulngunritariit,

¹³Jeremiah qulngurutiit, Machbannai-a qula ataucimek cipnerat.

¹⁴Makut Gadite-at atanerruaqait anguyagtet, ikgellrulria yuinaat talliman cipluku (100) amllenrulria-llu tiissitsaaq cipluku (1,000).

¹⁵Makut angutet taukuugut qerallret Jordan-aakun ciuqlirmi iralumi, uryuumallragni cen̄aq, callugluki-llu tamalkuita tamaani kuignayugmelnguut, calaratmun kanavatmun-llu.

¹⁶Ilait-llu angutekenka Benjamin-aankuk Judah-llu taigut asvaiqcaumalriamun David-aamun.

¹⁷David-aaq an'uq pairrsaagluki qanrulluki-llu, “Elpeci taikuvci yugniqluci ikayurnalua, ircaquqa nuvutarkauguq elpecen̄un; tau͡gaam tun'arkaukuvcia inglumnun, alarngalriartaicaaqengraan unatemni, kitaki Agayutiita atamta tangerrlici kituggluci-llu.”

¹⁸Tua-llu Anerneq taiguq Amasai-amun, ciuqliatnun yuinaq qulnek cipluku (12), qanerluni-llu, “Wangkuta pikarpekut, David-aaq; elpenun ataki qetunraan Jesse-m! Uitanqegcin, uitanqegci elpenun, uitanqegci-llu ikayurtevnun! Tua-i Agayutvet ikayuaten.” Nutaan David-aam ciuniurai, atanerruarurrluki-llu anguyagtem̄inun.

¹⁹Ilaita angutain Manasseh-m unitellruat David-aamun ayallrani pillgutekluki Philistine-at callugyarturluku Saul-aaq. (Tau͡gaam ikayunritai, tua-i picirkiristait Philistine-at arenqiirturluteng ayagcecatgu qanerluteng, Aarnarquq qamiqumten̄un uniskakut Saul-aamun).

²⁰Ellii ayallrani Ziglag-aamun makut angutai Manasseh-m unitellruat elliinun: Adnah, Jozabad, Jediael, Michael, Jozabad, Elihu, Zillethai-aq-llu, ciuqliulriit tiissitsaanun Manasseh-mi.

²¹Tamakut ikayullruat David-aaq inglulirluki quyuqetaarluteng curulalriit; tua-i tamakut tamarmeng pinilriaruluteng piugngalriaruluteng angutet, alerquasten͞gluteng-llu anguyagten̄i.

²²Wani-wa unuaquaqan angutet taiguralartut David-aamun ikayurnaluku.

²³Makut naaqutkait avverqumallrata saskutgun anguyagtet, taillret David-aamun Hebron-aami, nugtarrnaluku angayuqauvia Saul-aam elliinun, maliggluku qaneryaraa ATANREM.

²⁴Angutai Judah-m tegumiarluteng capkutanek narulkarcuutnek-llu amllertaut tiissitsaat arvinelgen tiissitsaam-llu avga yuinaat-llu akimiaq (6,800) saskulget anguyagtet.

²⁵Simeonite-anek-llu pinilriit angutet piyugnarqellriit anguyagmun, tiissitsaat malrunelgen yuinaat-llu talliman (7,100).

²⁶Kevite-anek-llu, tiissitsaat cetaman tiissitsaam-llu avga yuinaat-llu talliman (4,600).

²⁷Takarnarqut'lek Jehoiada, eniinek Aaron-aam, pillguterluni-llu tiissitsaanek pingayunek tiissitsaam-llu avga yuinaat-llu qulen (3,700).

²⁸Zodak-aq, ayagyuaq pinilria piyugnarluni, ilaluni yuinaq malrugnek cipluku (22) alerquasten̄ek elliin nakmiin atami eniinek.

²⁹Benjaminite-anek-llu tungelqurrinek Saul-aam, tiissitsaat pingayun (3,000), tamakut ilaita man'a tekilluku aturaat takaqutseng eniinun Saul-aam.

³⁰Ephraimite-anek tiissitsaat yuinaat tiissitsaam-llu avga yuinaat-llu akimiaq (20,800), pinilriit angutet piyugngalriit nallunailnguut atameng eniini.

³¹Avmegteggun-llu kinguvellgutkellriartai Manasseh-m akimiaq pingayunek tiissitsaat (18,000), tamakut tugerluteng aprumalriit tailuki David-aaq atanrurcartuusqelluku.

³²Issachar-amek-llu angutet taringumalriit pilrianek, nalluvkenaku qaillun Israel-aat pillerkaat, yuinaat qulen ciulirneret (200), ilakluku tamalkuita tungelquteng acimeggni alerquakengateng.

³³Zebulun-aamek yuinaak malruk tiissitsaat qulmek cipluku (50,000) pinariaqan pitulit anguyagtet, akluliumaluteng tamalkuitnek saskuinek anguyaucaram, ikayurarkauluku David-aaq atauciurrluteng picirkiuramegteggun.

³⁴Naphtali-mek tiissitsaat (1,000) alerquastet pillguterluteng yuinaq qula malrunlegnek tiissitsaanek (37,000) angutnek, saskungqerrluteng capkutanek narulkarcuutnek-llu.

³⁵Danite-anek, yuinaq pingayunlegnek tiissitsaanek tiissitsaam-llu avga yuinaat-wa talliman (28,600) saskuliumaluteng anguyautellerkameggnun.

³⁶Asher-aamek, yuinaak malruk tiissitsaat (40,000) pinariaqan pitulit anguyagtet upingalriit anguyautellerkameggnun.

³⁷Reubenite-at Gadite-at-llu avmegteggun-llu Manasseh-m yaatiinek Jordan-aam, yuinaat arvinelgen tiissitsaat (120,000) angutet saskulget tamalkuitnek anguyaucessuutnek.

³⁸Tamarmeng makut anguyiit, upingaluteng callullerkameggnun, taigut Hebron-aamun tamalkirrluteng piurcarturluku David-aaq atanrurrnaluku Israel-aanun; ayuqluteng-llu tamarmeng Israel-aat umyuangqertut ataucimek David-aam atanrurtellerkaanek.

³⁹Tamaantellruluteng-llu pillgucirluku David-aaq ernerni pingayuni, nerluteng merluteng, anelgutaita upyutellruiceteng ellait.

⁴⁰Cali-llu-wa nunalgutaita, Zebulun-aamek Issachar-amek, Naphtali-mek-llu taitellruameng neqkanek donkey-tgun, qulugtellriatgun, ciulvagteggun, angucalutgun-llu amllernek atu'urkameggnek neqkanek, cake-aanek, issuumanek, wine-anek uqunek, kuluviit angucaluitnek, qusngiyagarnek-llu, tua-i angnirpiimeng Israel-aani.