Read Yupik 1 Chronicles 15 Bible Online

1 Chronicles 15 - Yupik bible

1 Chronicles 15

¹David-aaq eneliuq Nunarpiini David-aam.[3] Upciluni-llu uitavigkaanek Agayutem Akqutiin Yaassiigan, naparciluni-llu pelatekarkaanek taum.

²Tua-llu David-aaq qanertuq, “Kinkut allat pivkenateng Levite-at tau͡gaam ayauciiqaat Akqutem Yaassiiga, tua-i ATANREM cucukellrui ayaucesqelluku kevgiurarkauluku-llu ellii qangvarpak.”

³David-aam-llu quyurtai tamalkuita Israel-aat Jerusalem-aamun, taicesqelluku Yaassiiga ATANREM nekaanun, uptellerminun uitavikesqelluku.

⁴David-aam-llu quyurtai qetunrai Aaron-aam Levite-at-llu.

⁵Qetunrainek Kohath-am, Uriel-aaq ciulirnerat, yuinaat-llu arvinelgen anelgutni;

⁶anelgutainek-llu Merari-m, Asaiah-q ciulirnerat, yuinaat-llu qulen yuinarnek-llu cipluki (120) anelgutni.

⁷Qetunrainek-llu Gershom-aam, Joel-aaq ciulirnerat, yuinaat-llu arvinelgen qulnek cipluku (130) anelgutni;

⁸qetunrainek-llu Elizaphan-aam, Shemaiah ciulirnerat, yuinaat-llu qulen (200) anelgutni.

⁹Qetunrainek-llu Hebron-aam, Eliel-aaq ciulirnerat, yuinaat-llu cetaman anelgutni.

¹⁰Qetunrainek-llu Uzziel-aam, Amminadab-aaq ciulirnerat, yuinaat-llu talliman qula malrugnek cipnelget (112) anelgutni.

¹¹David-aam-llu quyurcesqai agayulirtet Zadok-aq Abiathar-aaq-llu, Levite-at-llu Uriel-aaq, Asaiah, Joel, Shemaiah, Eliel, Amminadab-aaq-llu.

¹²Qanrulluki-llu, “Elpeci ciuqliqaiceci ataita eniitni Levite-at, menuircarci elpecen̄ek, elpeci-llu anelguceci, tua-i elpeci taitniararci Akqutem Yaassiiga, Agayutiita Israel-aat, uitavigkaanun uptellemnun.

¹³Tua-i-wa elpeci ayautellrunrilavciu ciuqlirmi, ATANREM Agayutemta alairvikcurlallruakut, tua-i-wa caliaqenrilamteggu aturluku naaqicimallra.”

¹⁴Tua-i agayulirtet Levite-at-llu menuircartut ellmeggnek taitnaluku ATANREM Akqutiin Yaassiiga, Agayutiita Israel-aat.

¹⁵Levite-at-llu ayautaat Akqutem Yaassiiga tusmegteggun muragteggun, Moses-aam alerquutellruciatun maliggluku qaneryaraa ATANREM.

¹⁶David-aam cali alerquagai ciulirnerit Levite-at ellimerresqelluki anelgutait aturten͞gusqelluki qastuluki aturcetaaresqelluki, aturcetaatgun ayuqenrilngurteggun angnirnariluku.

¹⁷Tua-i Levite-at ellimerraat Heman-aaq, qetunraa Joel-aam; ilakutai-llu, Asaph-aaq qetunraa Berechiah-m; qetunrainek-llu Merari-m anelgutmeng, Ethan-aaq-llu qetunraa Kushaiah-m.

¹⁸Ikayuusqelluteng-llu nakmikait Levite-at harp-atgun quyilrianek erinalegteggun aturcetaaresqelluki, Zachariah, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, Mikneiah-llu, iteryarat-llu tarikestegket Obededom Jeiel-aaq-llu.

¹⁹Aturtet-llu, Heman, Asaph, Ethan-aaq-llu neplircetarkauluki punerneret qantarngalnguut;

²⁰Zachariah, Aziel, Shemiramoth, Jehiel, Unni, Eliab, Maaseiah, Benaiah-llu qelutviararkauluteng pillratun Alamoth-am.

²¹Tau͡gaam Mattithiah, Eliphelehu, Mikneiah, Obededom, Jeiel, Azaziah-llu ciuliqagtarkauluteng qerrsilrianek qelutviarluteng maliggluku Sheminith-aaq.

²²Chenaniah, ciuliqagtiit Levite-at aturcetaatgun, ciuliqaggnarqai aturcetaalriit, taringumiiki tamakut.

²³Berechiah Elkanah-llu murilkestekarkaulukek iteryaraan Akqutem Yaassiigem.

²⁴Shebaniah, Joshaphat, Nethanel, Amasai, Zachariah, Benaiah, Eliezer-aaq-llu agayulirta, cup'arkaugait cupu'uryarat ciunrani Akqutem Yaassiigan. Obededom-aaq Jehiah-llu tarikesten͞guciquk iteryaraanun Akqutem Yassiigem.

²⁵Tua-i David-aam ciulirnerit-llu Israel-aat atanerruarit-llu tiissitsaat (1,000s), ayagtut taicarturluku ATANREM Akqutiin Yaassiiga eniinek Obededom-aam angnirluteng.

²⁶Tua-i-llu cali Agayutem ikayuaki Levite-at tegumiaqestellregket ATANREM Akqutiin Yaassiigegken, ekuagiut malrunlegnek nulirten̄ek, malrunlegnek-llu qusngit angucaluitnek.

²⁷David-aaq aturangqertuq 'lumarraqegtaarmek, tamarmeng-llu-wa Levite-at tegumiaqestegket Akqutem Yaassiigegken, aturtet-llu, Chenaniah-q-llu ciuliqagtiit aturcetaartet, aturtet-llu; David-aaq-llu qat'gailitartuumaluni.

²⁸Tua-i tamarmeng Israel-aat taitaat ATANREM Akqutiin Yaassiiga qayagpagaluteng maliggluki nepait cupu'uryarat, qantarngalnguut-llu, qastuluteng-llu aturcetaarluteng qelutviatgun.

²⁹Yaassiiga-llu Akqutiin ATANREM itrucatgu nuniinun David-aam, Michal-aaq, pania Saul-aam, uyangtuq egalerteggun, tangrraa-llu ataneq David-aaq yurarluni angnirluni; qacungakaa-llu ircaqumikun.